تجربتى الاولى ومشاكل لا تنتهى احتاج دعمكم

[abozeyad]

انا معايا سكودا فيليشيا موديل95 بالتكييف 1300 سى سى اشتريتها من 3 شهور تقريبا وده اول عربية اركبها وكملت تعليم سواقة عليها ...المهم العربية اول ما جيبتها طبقا لخبرتى الصغيرة كانت كويسة ومالاحظتش شئ غريب فيها حتى مشكلة السخونية المشهورة بيها الاسكودا ماكنتش ظاهرة ساعتها ...

اول مشكلة ظهرت وانا فى احد المشاوير العربية سخنت منى ومااخدتش بالى لحد ما الدخنة طلعت من قدام واكتشفنا بعد كده ان مشكلة السخونة جت من فيوز من ابو جنيه ضرب وخلى المروحة ما اشتغلتش فحصل اللى حصل ....بس للاسف من ساعة تلك المشكلة والمشاكل فى العربية عمالة تظهر واحدة ورا التانية!!!

مشكلة السخونية بدات تطفوا على السطح منذ هذه الحادثة غيرت الفيوز مرتين وغيرت قربة المياه بالغطاء وغيرت الترموستات مرتين وحساس الحرارة واخيرا طلمبة المياه وفعلا المياه ما بقتش تنقص كتير بعدها بس مؤشر الحرارة لسه بيعلى وروحت لواحد بتاع امبير قالى المؤشر عندك مقدم 20 نقطة بالخطأ (يعنى بيدى قراية 100 مثلا والحرارة 80 ) المهم ظبطه وبعدها بقت الحرارة شغالة كويس بين ال80 وال90 لفترة ودلوقتى بقت شغالة بين ال80 وال100 والمياه بتنقص بس بكميات صغيرة مش كبيرة زى الاول ...الميكانيكى بيقولى ان العربية كده ما بتسخنش والمشكلة فى المؤشر واهم حاجة ان المروحة بتشتغل والمؤشر بينزل معاك وادينى ماشى بيها على كده ...

طبعا كان فى مشكلة على الماشى كده بتاعة اسطوانة الديبرياج وده غيرناها بواحدة استعمال وقولنا لغاية ما احس ان رجلى خفت على الديبرياج نبقى نجيب طقم ديبرياج كامل بعدين

المشكلة الجديدة بقه ظهرت من اسبوع جيت ادور العربية الصبح وكنت دايس على البنزين سنة عشان بتتعبنى لما تيجى تدور وما بتقومش غير بعد تلت اربع مرات لاحظت خروج دخان ابيض من الشكمان هو صحيح مش كتير والموضوع ده ما تكررش تانى غير لما كنت طالع كوبرى وكان فى زحمة لاحظت برده ظهور دخان ابيض من الشكمان ...الميكانيكى قالى كده هاتحتاج طقم شنبر لان الموتور خف ومش مستعجلين لان الموضوع لسه فى اوله ...

السؤال هنا واللى محتاج رايكم فيه ضرورى ...ازاى اتاكد ان العربية فعلا محتاجة طقم شنبر والموضوع هايتكلف قد ايه عشان كده العربية فتحت بقها وانا مش هاقدر عليها ويا ترى ده اخر المشاكل ولا لسه فى تانى وخصوصا مشكلة السخونة كده خلصت ولا المؤشر بيخدعنى ولا اجيبها من قصيرها واعرضها للبيع ولو حتى بخسارة لغاية ما اشوف واحدة تانية وامرى الى الله

[abozeyad]

هى المشكلة ميئوس منها اوى كده ولا ايه ؟؟؟

[hazem_khidr]

الف مبروك العربيه و ربنا يديك خيرها و يحميك من شرها
دلوقتي العربيه ما فيش فيها مشكله سخونه طالما المروحه بتشتغل و بتفصل و مافيش اي مشكله
بالنسبه للدخان دا مافيش برضه منه مشكله حاليا
لكن غيار الزيت الجديد هات علبه زيت شنبر و حطها مع غيار الزيت و شوف الدخنه حتخف ولا لاء
و بلاش تبيع العربيه لو انت مرتاح لها لان اي عربيه مستعمله اكيد حتلاقي فيها مشاكل

[abozeyad]

المشاركة الأصلية كتبت بواسطة hazem_khidr الف مبروك العربيه و ربنا يديك خيرها و يحميك من شرها دلوقتي العربيه ما فيش فيها مشكله سخونه طالما المروحه بتشتغل و بتفصل و مافيش اي مشكله بالنسبه للدخان دا مافيش برضه منه مشكله حاليا لكن غيار الزيت الجديد هات علبه زيت شنبر و حطها مع غيار الزيت و شوف الدخنه حتخف ولا لاء و بلاش تبيع العربيه لو انت مرتاح لها لان اي عربيه مستعمله اكيد حتلاقي فيها مشاكل

يا باشا جزاك الله كل خير على اهتمامك وردك ...كده الحمد لله انا طمنت شوية بس انا كنت لسه مغير زيت الموتور من يومين ينفع اجيب زيت الشنبر واحطه دلوقتى ولا استنى لما اجى اغير الزيت المرة اللى جاية ...انا باغيره كل الف كيلو تقريبا

[mahranahm]

بص بأه يا كبير
اولا انا اخوك مهران جولف 2
طبعا من الاسم تعرف انى عندى جولف 2 1300 سى سى
انا عملت زيك اول لما جيبت العربية مكن تقول انك كنت بتحكى قصة العربية بتاعتى
يعنى انا جبتها من 3 شهور
واول حاجة جابت معايا اسطوانة دبرياج وغيرتها بأستعمال زيك بالظبط
واول مشوار كبير عملتوا بيها العربية سخنت ولما روحت للكهربائى غيرت فيوز المروحة بتاعت الريداتير زيك بالظبط
زطبعا الباشا الكهربائى غيرى الفيوز بواحد اقل حطلى فيوز 10 وطبعا بعد مشوار عملت نفس الحكاية الفيوز ساح والمروحة مشتغلتش
وعشان انا كنت لازق فى الكهربائى وهو بيعمل الاختبار الاول عشان يتأكد ان ماتور المروحة مش هو الاتحرق عملت زيه بالظبط وبعدين غيرت الفيوز طبعا لانى معنديش خبرة حطيت واحد زية بالظبط
ولكن لما روحت احدى مقابلات منتدانا قولتلهم على المشكلة وطبعا جزاهم الله خيرا كان واحد اسمة محمد فيصل غيرى الفيوز بواحد 30 ومن يومها المروحة شغالة زى الفل .
وطبعا قابلنى موضوع الدخان الابيض دة وكان صعقة انا قولت الماتور فوت وخلاص بأه حعمل عمرة لكن لقيت ان الوقت بالليل وده كان بخار عسان الدخان سخن طالع فى جو بارد .
وبعدين لقيت شوية كركبة فى التوصيلات الكهربائية بس الحمد لله لقيت واحد كهربائى صنيعى ظبطلى الكلام (( لمبة المارشيدير مش شغالة , المساحة , بزبزز المياه بتاعة المساحة )) وكل البالى بالك بأه .
وبعدين عايز اظبط شوية فى العافشة وعايز سمكرى ودوكو وبعدين غيرت البطارية بواحدة جديدة جافة وتمام وبعدين الدوارة فى الصبح بتزهقنى شوية بس بدور فى الاخر . زيك بالظبط

طيب لو انا فكرت زيك وقولت حبيع طيب لازم على كلام ناس كتير اركب زيرو لان مش حلاقى عربية زى المعايا فى الكفاءة والجودة بس زى رأخ اخونا حازم جيبت مستعمل تانى لازم يظهر فيه مشاكل امال اسمة مستعمل ازاى .
فأنا اضم صوتى مع اخويا حازم واقولك لو العربية عجباك معلش استحمل بقدر امكانك لحد لما تجمع مبلغ وتقلب على زيرو وربنا يهديك الى ما يرضاه لك .
وآسف على الاطالة