عاوز مساعده بخصوص جنوط الماتريكس

[karem ali]

المشاركة الأصلية كتبت بواسطة m.elhasafy كريم باشا ... قوللى بس إنت فين و أنا أجيبلك حجر الريموت دليفرى لحد البيت أما بخصوص موضوع العفشة فالطبيعى لو بتركب جنط أكبر من الحالى إنك تجيب له كاوتش ذو سمك أقل لتعويض الزيادة فى قطر الجنط و ذلك لعدم تقليل المساحة الباقية بين الكاوتش و الرفرف من الداخل المشكلة إن تقليل سمك الكاوتش بيقلل من قدرته على إمتصاص الصدمات و بالتالى يقع عزم الصدمة بشكل أكبر على العفشة مما يجهدها أكثر من المعدل الطبيعى و الذى يسبب فى النهاية تقليل عمرها الإفتراضى ناهيك عن تكسير عظم من إبتلاه قدره بالركوب معاك لذلك يلجأ من يستخدم جنوط أكبر بكثير من الأصلية بتغيير العفشة بأخرى رياضية (Koni كونى) و هى من أشهر العفشات الرياضية المتوفرة فى مصر ولكنها ليست الجنه الموعودة فالمعروف عن العفشات الرياضية قساوتها بالمقارنة بالعادية مما يجعل العربية أقل راحة مقابل ثبات وهمى و تحمل للصدمات أكثر من العفشة الأصلية أنا شفت مرة بى إم دابليو قديمة شوية صاحبها مركب جنط فوق العشرين بوصة ... سمك الكاوتش لا يذكر بل إحتمال إنه يكون مصمت أساساً و لا يتم نفخه ... أنا كنت حاسس إنه ماشى على الجنط طبعاً مش عايز أقولك كان بيعمل إيه عند المطبات كان شويه هيبطل العربية و ينزل يزقها لإن الكاوتش كان تقريباً لازق فى الرفرف من الداخل عند المشى العادى فمابالك فى المطبات الجنوط فى رأيى عاملة زى عمليات التجميل لو بسيطة بتبقى حلوة و مفيدة لكن لو زادت قوى بتمسخ العربية و تلاقى العربية بقت عربية تانية دمها يلطش و الكارثة إنها بقت كمان معوقة

شكرا استاذ محمد على الشرح الوافى ده كله و كمان عالحجر دليفرى لحد البت طب انا فى العجمى هههههههههههههه
هو حضرتك شوفت شكل الجنط الى انا عاوزه انا كونت سالت و هو موجود منه 14و 15 يعنى موجود منه

[tham1010]

يا كريم ازيك....

انا الماتركس بتاعتى 2001 الكورى فيها الجنوط الاصلية بتاعتها مقاس 15 ومفيش مشاكل خالص منها... على فكرة العربية الماتركس بتنزل فى كوريا بجنوط 15 بس مش عارف ليه فى مصر بتنزل بمقاس 14... اتكل على الله وركب.. لو عاوز اقول لك مقياس الجنط بالظبط ابقى قولى

[sam ram]

خلي بالك يا كريم ان المقاس ال 15 في منه مقاسين في الكتالوج ... المقاس الاكبر بس هو اللي مكتوب لل 1800 ... والمقاس الاصغر شغال عادي و بينزل في الماتريكس الخليجي ...
المقاس حتلاقيه في اول مشاركه ليه ... معلش داخل من الموبايل و المشاركه فوووووووووق خاااااااالص

[Mohamed Elhasafy]

المشاركة الأصلية كتبت بواسطة karem ali شكرا استاذ محمد على الشرح الوافى ده كله و كمان عالحجر دليفرى لحد البت طب انا فى العجمى هههههههههههههه هو حضرتك شوفت شكل الجنط الى انا عاوزه انا كونت سالت و هو موجود منه 14و 15 يعنى موجود منه

العجمى
(إزاى ما أخدتش بالى ده حتى باين من التوقيع)
إحم ... و الله أنا دلوقتى فى القاهرة و إنت عارف ده أنا عينيا ليك

[Mohamed Elhasafy]

على فكرة أنا بضحك بس معاك
يا باشا معاك حتى لغاية العلمين ... و كمان الضبعة ... بس إنت بس تقشر
بس و الله أنا فعلاً ببقى فى القاهرة نص الإسبوع و بقيته فى الإسكندرية ... أكل عيش بقى
بخصوص الجنط فشكله شيك و خلى بالك من المقاس زى ماقالك الإستاذ sam ram لإن المقاس اللى عرضه 205 هيبقى أتقل (علشان كده بينزل لل 1800 سى سى) بس طبعاً هيديك ثبات أعلى و ممكن شكله يكون أجمد
أنا مع رأى الأستاذ عمرو مصطفى (إمشى ورا الكتالوج ... يحتار عدوك فيك) لإن مشكلة الجنط الأتقل إنه هيقلل سحب العربية و ده ممكن يضايقك
المهم و إنت بتشترى حاول تلاقى ماركة كويسة O.Z مثلا أو momo بس خلى بالك علشان الجنوط دلوقتى المضروب منها أكتر من الأصلى
المهم وزن الجنط الجديد ما يزيدش كتير عن القديم علشان سحب العربية مايقلش و لو لقيت الماركات دى أصلية ممكن تلاقيه أخف من القديم!...
و بالنسبة لأستاذ tham1010 اللى بيسأل عن سبب نزول الماتريكس فى مصر بجنوط 14 فبقوله إننا بنحمد ربنا إن عربيات هيونداى بتنزل فى مصر بجنوط عربيات أصلاً مش بجنوط توك توك
و ده طبعاً بسبب سياسة شد الحزام اللى بيتبعها توكيل هيونداى ... إنت مش واخد بالك ولا إيه؟! ... شكلك كده ما شربتش من نيلها