قنديل: إلغاء الدعم عن بنزين 95

[أيمن الروبي]

المشاركة الأصلية كتبت بواسطة ezzat2002mo مع احترامى لحضرتك اللى يجيب عربيه توصل ل 150 الف مش محتاج دعم فى البلد دى واكيد دخله يخليه يعيش زى الفل حتى لو سعر اللتر 10جم مش 5 جم وكمان العربيات دى على ما اظن ممكن تحط 92 وما تقولش لا واللى عاوز نزاهه يفنجر من جيبه مش على قفا الشعب المفروض الدعم ده للفقراء مش للاغنياء وكمان لو الدعم وصل لمستحقيه الدوله هيكون عندها ما يمكنها من عمل انشاءات وكبارى وطرق برضه هتفيد زوى الدخول المرتفعه وكمان عاوز اسال معظم اصحاب الاعمال الخاصه المربحه جدا مثلا مدرس خصوصى او تاجر اودكتور عنده عياده شغاله ميه ميه ولا مهندس المكتب شغال الله ينور ولا اى تاجر تجارته مزدهرة ودول اللى ممكن يجيبوا الجيتا او البى ام او المرسيدي ويجيبوا لعيالهم الجولف وغيرة هل تؤدوا حق الدوله فى الضرائب كما ينص القانون ولا بنتهرب وندى الدوله ملاليم او نطلع خسرانين اخر السنه وانا ممكن احكيلك قصص وحواديت فى المواضيع دى ده انا متاكد ان لو كل فرد بيدفع الضرائب صح غير او كبير هنلاقى كميه فلوس رهيبه وهندعم البنزين باسعار غير معقوله ساعتها بس المشكله ان الشعب الغلبان اللى بيركب توكتوك ومواصلات كحيانه هوة اللى بيدفع ضرائب والاغنياء هما اللى عاوزين الدعم بس الميغه دى كانت ايام مبارك وخلت والحمد لله بس انا راىى انه طبيعى جدا رفع السعر للبنزين 95 العالى الجوده بالنسبه للى عندنا فى مصر لان اللى بيستخدمه مش اى فرد فى المجتمع بل انا راىى اننا ممكن نحصل كمان هامش ربح

اوافقك الرأي تماما والله انا اعرف ناس ربنا يزيدهم ويكرمهم وإيانا مبسوطين ومليونيرهات بيعملو حاجات احنا الغلابه مش بنعملها وليا مواقف حصلت معايا كتير تدل علي كده
مثلا مره كنت مع صاحب الشركه في مأموريه للشغل في اسكندريه ونزلنا في هيلتون سموحه واللي نزل في الهيلتون عارف انه بيكون فيه مني بار مليان مشروبات وشيكولاته وسناكس فلقيت صاحب الشركه بيقولي خد من الميني بار اللي انت عاوزه ميهمكش وفوجئت قبل من نغادر الغرفه بساعتين لقيته كاتب كل حاجه انا وهو شربناها واكلناها من الميني بار ونزل اشتراها من سوبر ماركت مترو ورجعها تاني في الميني بار قال يعني احنا مأكلناش ومشربناش حاجه من الميني بار علشان ميحاسبش عليها بالغالي في الفندق والفرق مش كبير
موقف تاني كان في مخالفات علي عربيتي مش انا اللي عاملها وكانت كتير روحت لرئيس نيابة مرور بين السرايات اسمه احمد رفعت وروحت لرئيس نيابات مرور القاهره محمد الخولي والاتنين روحتلهم كذا مره والآقي عندهم ناس معاها عربيات غاليه ومعديه علشان ميدفعوش المخالفات عليهم والغربيه ان البهوات رؤساء النيابه يشيلو من عليهم المخالفات مع انهم ارتكبوها فعلا ومش عاوزين يدفعوها ومش عاوزين يخفضولنا احنا الغلابه المخالفات بتاعتنا

هي فعلا والله مش بتهون غير علي الغلبان
انا والله مبحبش اكسف اي حد يمدلي ايده من شباك عربيتي دايما مخلي فلوس فكه علي التابوه افضل افرقها وانا ماشي وبحكم عملي بمشي كتير مع رجال اعمال مبيهونش عليهم يطلعو جنيه وكمان انا محاسب قانوني عندي عملاء بيكسبو وبتحايا عليهم يدفعو الضريبه اللي عليهم وبخوفهم واقولهم كل ماتدفعوا الملف الضريبي بتاعكم يفضل نايم

وعلي فكره مش كل الاغنياء كده لأطبعا الا مارحم ربي بس في عينات كتير من اللي قولت عليهم بس في ناس المفروض الدعم ميتوجهش ليهم لأ يكون لمستحقيه يعني برده اللي جاي يتفسح من الخليج وراكب همر وفيراري وبنشوفهم كتير في جامعة الدول وعباس العقاد
وفي شرم والغردقه والساحل دول ليه يحصلو علي البنزين المدعم

[فادى]

ما هو فيه نظامين ماشيين فى العالم كله,
يا اما حرية الاسعار
يعنى مفيش دعم, و ده نظام تحرير اسعار الوقود, موجود فى بلاد كتيره و معمول بيه, و لكن فى جانبه الاخر مفيش جمارك و ضرائب خزعبلية على السيارات,
يا اما تشيل من حاجة و تحط فى حاجة, و ده اللى كان معمول بيه فى مصر, يعنى كان بيدعم البنزين بس كان بيفرض فى المقابل جمارك و ضرائب مرتفعة على ركوب السيارات.
يعنى الراجل اللى راكب مرسيدس او بى اللى الناس غضبانة عليه دافع على الاقل نص تمنها جمارك و ضرائب يمكن أكتر من اللى خده من الدعم,

لكن واضح انهم عايزين يخترعوا نظام تالت مش موجود فى اى حتة فى الدنيا, يعنى كل واحد يدفع دم قلبه فى التراخيص و الضرايب و الجمارك و برضو يدفع البنزين بسعره الطبيعى,
انا معنديش مانع يتشال الدعم عن البنزين, لكن فى المقابل لازم برضو تتشال الجمارك و الضرائب المرتفعة على السيارات و الا تبقى الحكومة بتلم فلوس ملهاش حق فيها.