استفسار بخصوص فتيس الاتوماتيك

[haitham_oda]

استفسار عن كيفية تغيير نقل الفتيس فى حالة الحركة على سرعة عاليه من على ال D الى الوضع N للتوفير فى البنزين زى المانوال العربية نوبيرا2 اتوماتيك
وشكرا

[dr_eslam_66]

بص هوا غير مستحب وخلينا نحاول نفسر الموضوع واحدة واحدة.
لو إنت ادورت العربية وسخنت وكله تامام التمام الوضع الطبيعي للـ آر بي إم بيبقى على حوالي 0.9 مش كدة أول ما بتدي غيار الـ D وبتشيل رجلك من الفرامل ومابتدوسشي بنزين اآر بي إم بنخفض سنة صغير ودا له بقى:
الماتور زي ما وضحنا عدد لفاته الطبيعية بدون أي تحميل 0.9
علشان تربط العجل بالماتور من خلال الجير بوكس طبعا الماتور مش هينفع يلف بنفس عدد اللفات لأنه بقى مربوط بحمل فا زي ماتقول إنتا ربط الجير في الماتور فا الماتور سرعته قلت لأنه بيحاول يشد الجير.
(واحد بيجري وإنتا قومت رابط فيه حمل الي بيجري سرعته هتقل.)
طيب علشان سرعة دوران المحرك ماتقلش والعربية تتحرك بسرعة بتبدأ إنتا تدوس بنزين وساعتها بتزود لفات المحرك فا يدور الجير على الترس المناسب فا العجل يدور والحركة تحصل.
الموضوع منقسم بعد هذه المرحلة لقسمين:

• إنتا بتزود بنزين علشان تدي العربية سرعة أكبر ياعني بتزيد من سرعتك ياعني عجلة حركة تصاعدية.

في الحالة دي إنتا لسة رابط الجير في الماتور وعمال تزود تغذية البنزين للماتور علشان يشد الجير والعربية وراه بسرعة أكبر بتزيد مع الوقت.

• إنتا بدأت تخف رجلك من على البنزين سنة سنة لحد ما سرعة العربية ثبتت وبدأت تتحرك بسرعة ثابتة ياعني عجلة سرعة بتساوي صفر.

في الحالة دي إنتا يادوبك بتدي مقدار البنزين الي يقدر يثبت سرعة العربية ياعني لا بتزيد سرعة لفات المحرك ولا بتقللها علشان كدة السرعة ثابتة وعجلة التحرك بتساوي صفر, في الحالة دي دايما العربية بتبقى أيل إنها تهدي سرعتها لو إنتا شيلت رجلك من البنزين ودا بسبب قوى إحتكاك بالطريق والهوا وإلى غيره ودا كله أول ما بيأثر بيأثر على الكاوتش والبودي وبالتالي على الجير فا المقاومة كلها جاية للماتور من خلال الجير وعلشان كدة غنتا بتدوس شعرة البنزين دي علشان تعادل هذه المقاومة وتفضل السرعة ثابتة.
إيه الي هيحصل بقى لو شيلت رجلك من على البنزين ساعتها؟؟؟؟؟؟
ساعتها السرعة هتقل بسبب إني الجييير هوا الي بيحاول يقنع الماتور إنه يهدى والماتور مش هيقاوم وهينزل لعدد لفات تدريجيا بالتناقص تناسب سرعة دوران الجير بوكس وسرعة العربية وهتفضل السرعة تقل بالتدريج إلى حالى السلانسيه والي هيا الماتور بيلف بعدد لفات 0.9 زي ما بدأ, في المرحلة دي هنا الجير بوكس والمقاومة الحاصلة على جسم العربية هيا الي بتجبر الماتور إنه يقلل سرعت.
طيب هيحصل إيه بقى لو حطيت العربية على سرعة معقولة زي 80 أو 90 كيلو متر في الساعة وفصلت دوران الجير عن الماتور (الغيار N) وسيبت العربية تتهادى؟
أولا فعلا الماتور دوراته هتقل لحظيا لعدد دورات 0.9 ودا فعلا أوفر في البنزين ولاكن تعالى بقى وحصلك ظرف خلاك عايز تزود السرعة مش تنقصها أو على الأقل تحافظ عليها ثابتة عن مثلا 70 كيلو متر في الساعة الي هيحصل إنك عايز هتعشق الـ D تاني وإنتا ماشي وعلى السرعة 70 ك/س وهنا هتلاقي عدد لفات الماتور زاد وبردو قسريا وحتىلو إنتا مادوستش بنزين بنسبة مش بسيطة وهتحس بمقاومة العربية وإنخفاض سرعتها بشكل أكبر ودا لأني كان الجير بوكس ماشي بسرعة وإنتا ربط في الماتور فا بيحاول يمشيه معاه في نفس السرعة والي بيحصل هنا كالآتي:

• أولا الجير بوكس هوا الي بيدور الماتور لو إنتا مش دايس بنزين ودا بيؤثر سلبا على عمره الإفتراضي لأنو مش مصمم للعمل بهذه الطريقة ولاكن لما كان الماوتور هو الي بيحرك الجير دا كان طبيعي جدا.
• لو إنتا علشان تحافظ على السرعة أو علشان تزيدها لحظيا بسبب الطارئ الي خلاك عايز تزود السرعة هتضطر تدوس بنزين "بالمعقول ياعني" أول ما الجير يتعشق على طول وادا برضو مش مستحب ولاكن هوا أخف ضررا من النقطة السابقة.

النسبة بقى إلي إنتا وفرتها من البنزين مقارنتا بإستهلاكك للجير بوكس لا تذكر.
تعرضك إنك أخرت إستجابة عربيتك في التسارع أمام أي طارئ يحدث أمامك او خلفك على الطريق تشتريها بفلوس أصلا مش تستغنى عنها بمنتهى السهولة.
كل الشرح الي فات دا على إفتراض إني الجير بوكس مافيهوش غير ترس واحد على الـ D.

[haitham_oda]

شكرا جدا على ردك المفصل وحصرف نظر على الحركة دى

[dr_eslam_66]

هوا ممكن في الإشارة تمور على N مافيشى مشكلة أهو تريح رجلك من على الفرامل "وماتنساش تشد الهاند بريك" وتسترخي كدة شوية بس إستحمل بقى الكلاكسات الي هتلبسها لو سرحت للحظة.

[memodina1]

انا الحقيقة معرفش دكتور اسلام اللى شارح فوق بالتفصيل انما يستاهل الشكر جدا لانة وصل المعلومة ليا انا بصراحة استفدت منة جدا والراجل دا يستاهل كل خير بارك الله فيك اخوك محمد