مروحة الريداتير

[zing0]

السلام عليكم
أنا حصل معايا موقف نسبة حدوثه واحد فى الألف بس هو النصيب.
و بصراحة متأذى منه جداً, و مش عارف آكل أى حاجه.
و للأسف مضطر أحكيه لسببين:
- أنكم غاليين عندى أوى.
- بأحب أرخم

كنت راكن العربية كالعادة أمام الشغل, و خرجت و ركبت و رزعت الباب العنيد ذو الصوت العالى, و ده طبيعى.
2 من زملائى, و لأول مرة, طلبوا يركبوا معايا علشان أوصلهم للكورنيش (فى طريقى)... ثواب.
طبعاً ركبوا و رزعوا الأبواب كالعادة.

آجى أدور!!!!! صوت الموتور و معاه صوت تانى , زى ما يكون سير بيلف بسرعة و بيصوصو؟؟؟
طبعاً بطلت الموتور فى ساعتها و سميت الله و فتحت الكبوت
لاقيته كله شعر أبيض ..... طلعت قطة أتجننت فى مخها و دخلت من تحت العربية و قعدت تحت البطارية. طبعاً أول ما دورت المروحة إللى راكبة فى الموتور أمام الريداتير لطشت فيها و أتعورت (بس الحمد لله لسه عايشه).
و ريشة من المروحة أتكسرت. الحمد لله قدّر الله و ما شاء فعل.
و ربنا يعلم أنى مكانش قصدى أى أذى, بس قدرها تستخبى هنا و متخرجش مع كل الأبواب إللى بتترزع دى. و قدرى إن ريشة من المروحة تتكسر.
طبعاً جريت نضفت الحوض بالجاز.
السؤال دلوقتى: هل لازم أغير المروحه؟
و لو لازم أيه أحسن الأنواع؟ أنا كنت سمعت أن مروحة الشاهين أفضل (تقريباً 8 ريشة) .
إللى كانت راكبة الـ 6 ريشة.
و أخيراً سعرها و سعر التركيب تقريباً كام؟

طبعاً العربية لادا 2105
جزاكم الله خيراً

[طارق ابوذيد]

السلام عليكم ورحمه الله وبركاته .
أخى الكريم قدر الله وما شاء فعل ولانك قمت بفعل الخير فالموضوع بسيط ان شاء الله يمكنك تغير ريشه الموتور فقط بعد التأكد من حاله الموتور على البطاريه وسعر الريشه 25 جنيه

[zing0]

جزاكم الله خيرا
عاوز بس أعرف أجرة الصنايعى تقريباً كام؟
يعنى هل هيحتاج يفك سير الكاتينة كله و لا المروحة ملهاش دعوة؟

[طارق ابوذيد]

المشاركة الأصلية كتبت بواسطة zing0 جزاكم الله خيرا عاوز بس أعرف أجرة الصنايعى تقريباً كام؟ يعنى هل هيحتاج يفك سير الكاتينة كله و لا المروحة ملهاش دعوة؟

السلام عليكم ورحمه الله وبركاته .
أخى العزيز سير الكاتينه ليس له أى علاقه بالمروحه .
أنت ممكن تعملها فك المروحه كامله من الريداتير وخذها معك الى اى تاجر وأطلب منه تغير الريشه وتغيرها مجرد تيله أو صاموله فوق الريشه فالموضوع بسيط جدا

[mr_astra]

من كلامك حاسس ان المروحة راكبة بسير على طلمبة المياة كعادة اللادا
لانك بتقول اول ما دورت المروحة لطشت فى القطة
ييبقى كدة المروحة شغالة على سير مش مروحة بالكهرباء