يوميات سيترونتى........ الـ AX

[aymangalal]

السلام عليكم من جديد
ناخد بريك صغنن من الصور بقى

الصور اللى فاتت هى السطور الواضحة مش اليوميات

هنقول اللى بين السطور و نـ لوك لوك مع بعض ونحكى ونرغى امال الموضوع اسمة يوميات ليه....؟؟؟؟؟!!

بس ملحوظة فى الاول لو لاقيتوا اى كلمة غير مطابقة للمواصفات الاملائية(حروف واقعة او متلخبطة ) خدوا الكلمة بالمعنى او الشبه انى كتير بعد ماكتب واراجع الاقى اخطاء كتير ماشى يا ناس

نقول من الاول للافادة:

اول مافكرت اشترى عربية طبعا احتارت حيرة المبتدىء وخصوصا انى ماليش اى تجارب فى السواقة قبل كده يعنى ماركبتش اى عربية عشان احكم على الامكانيات وكأى مبتدىء برضه اللى بيحكمنى فى البداية هى الميزانية اللى كانت بحد اقصى 20 الف فقولت اشوف حاجه فى حدود 18 او 17 واعمل حسابى بالباقى اظبط اللى محتاجاه العربية لان اى مستعمل مهما ان كانت حالته اكيد هيحتاج

وابتديت رحلة البحث والاطلاع والاستشارات و..... و..... و.......

وابتديت من اول سيات 133 لغاية اى عربية فى رينج الـ 20 الف

وسألت نفسى انا محتاج ايه فى العربية وحطيت اولويات

تكون موتور مرتاح سعة عالية مش اقل من 1300 سى سى ثم كماليات ثم تكييف ان امكن او مجهزة على الاقل ثم حجم مناسب لا هى كبيرة ولا مزنوقة ثم فى الاخر قطع غسار وصيانة واعادة بيع (لانى ماكنتش ناوى ابيع قريب وده لانى بحب احتفظ باللى املكه ولو حبيت اغير اجيب حاجه تانى مع احتفاظى بالقديم

المهم تدرجت لغاية ما وقفت عند بجو 205 وبالفعل نزلت اتفرجت وعاينت(طبعا بمساعدة صديق فاهم ويعرف يقدر) ومالقيتش حاجه عجبتنى فى حالتها بالنسبة للبيجو اللى انا عايزة وفى لحظة تجلى كده (الصديق اللى اشرت له) لفت نظرى لستروين ax او zx لانه كان معاه واحدة ax قبل كده وشكر لى فيها جدا وقالى ان عيبها (اعادة البيع وقطع الغيار والصيانة ) وفيما عدا ذلك كلها مميزات واعتمادية وكماليات فابريقة سنتر وازاز وتكييف وكفاية انها فرنساوى يعنى حاجه محترمة ربكم والحق عجبتنى جدا الفكرة واهملت نقط العيوب (او حطيتها فى دماغى عشان اعرف اتعامل معاها) وبدأت ادور على سيتروينتى وبدأ سعرها فى شهر 8/2010 من 16 ده اقل حاجه شوفتها لغاية 28 ده اكتر حاجه شوفتها وطبعا التدريج بين الرقمين على حسب الحالة

شوفت اعلان عن حاجه بـ 18500 اتصلت وسألت وروحت عاينت واخدت معايا صاحبى شاف وجرب وقالى تمام اساسيات سليمة بس فيها شبهة مساعد يمين مش مشكلة وحاولت انزل من سعرها بالعافية وصلت 17250 بشرط تسجيل العقد مش توكيل(وده شرط البايع) عشان هيشترى حاجه تانية ومش عايز يدفع ضريبة رفاهية على اعتبار ان مالك سيارتين وافقت وكتبنا العقد واستلمت وكتر الف خيره وصلنى بالعربية لغاية رمسيس عشان انا مابعرفش اسوق وجه واحد صاحبى استلمنى وروحنى ع البيت

بعدها شيئا فشيئا اتعلمت السواقة ومشيت بما يرضى الله(ولغاية دلوقتى بمشى عدل عشان يحتار عدوى فيا) وكل ما احس بحاجه اسأل واعرف ده ايه وسببه ايه ولو ماعرفتش اقيم اخلى حد فاهم يسوق ويجرب ويكتشف لى لو فى اى مشاكل فى العربية وكل ما اكتشف حاجه جرى اروح للحاج فرج لانه كان اول واحد اتعامل معاه وارتاحت جدا لانه متخصص وكمان عنده قطع الغيار اللى ممكن احتاجها فى وقت وابتديت اكتشف مشاكل العفشة (بمساعدة الصديق اياه) مره مساعد (اللى قولنا عليه فى الاول) ومرة علبة دركسيون ومره كوبلن ومره فرامل ومره طنابير وهكذا وبعد فتره ادركت ان صاحبها كان مهملها ع الاخر ويمكن مش قادر يصرف عليها او مش بيستخدمها كتير فا بدأت اجدد العفشة كل ما الاقى صوت او اى حاجه غريبة لغاية ما تظبطت كلها

وطبعا الاسعار بتاعة قطع الغيار موجودة فى الموضوع بتاعى (اسعار بعض قطع غيار ستروين ax) فى قسم ستروين (ممكن الرجوع له)

فى البداية خدتها ماشية وشغالة وبما انى ماعرفش حاجات كتير فيها فا ماكنتش قادر اميز بين اللى شغال واللى عطلان (حتى لو حاجه صغيره)

وبمرور الوقت بقيت اقرأ اكتر عن العربية لاكتشاف امكانياتها الحقيقية ولو اى حاجه ناقصة حتى ولو زرار ادور عليه واجيبه عشان تبقى اصليه 100% وكمان انا ما بحبش موضوع توفيق الحاجه على بعضها الا لو اضطريت بعد ما بدور على حاجه معينة لمده شهور

المهم شوفت عربيات كتير ax متعدة فى منتديات اجنبية وشوفت تعديلات كتير فى عربيات تانية برضه فى المنتدى بتاعنا وكنت مشدود اكتر للتعديلات اللى فيها كماليات ووسائل رفاهية بعد ما اتطمن ولله الحمد على الاساسيات عندى شاسية وموتور وكهرباء ودواخل

ونويت والنيه لله انى اظبط بقدر استطاعتى وحلمت ايام واسابيع بالشكل اللى عايز اوصل له فى عربيتى والحمد لله حققت 85% من الحلم وان شاء الله بعد سنتين تلاتة يالكتير اول للـ 100%

العربية كانت محتاجه سمكرة فى كام حته فى الرفرف من التجريح والكبوت والابوب بسبب المعقون المطقطق وطبعا بعدها الدهان اللى كنت ناوى اعمله ابيض لانى شوفته على عربية وعجبنى جدا لكن لانى لسه مانقلتش ملكية فالاقيت الموضوع هياخد لفة لغاية ما انقل ملكية وبعدين اثبت اللون القديم(على حسب ماعرفت) و بعدين ادهن اللون الجديد واروح اثبته على الرخصة اللى لسه هتنتهى فى 8/2011 فا اخدتها من قصيرها وخليتها على لونها زيتى ميتاليك زى الدواخل الفابريقة وطبعا هحتاج اشد الفرش لانى حسيت انه لامم تراب بالهبل وما بينضفش الا لو اتفك غير انه ريح مع الزمن وبقى يحك فى قفلة الابواب والمنظر العام مش مريحنى وكمان كنت عايز اغيرة للون البيج اللى بحبه (الفكره جاتلى لما شوفت عربية bmw دوخل فرشها وخصوصا الابواب لونها بيج) اتهوست بالمنظر وقررت اعمله وطبعا بالمره اعمل ازاز كهرباء ورا مع شوية اضاءة بسيطة كده ونور شبورة والتكييف اللى يا خشارة ملحقتش اعملة لان الموضوع فتح وعدى الميزانية بس على الاقل اطمنت ان المروحة فى التابلوه شغالة وبتطلع هواء ودايرتها مظبوطة بعد ماروحت للكهرباء ووصلته رسالة فنى التكييف (شغل المروحة وظبط الكهرباء عشان مانشكش فى اى حاجه فى دورة الهواء من جوه التبلوه وتعلالى –اللى هوه انا) ولما العملية صرفت مالقيتش فلوس للتكيف اللى كان محتاج (كمبروسر بالقاعدة وسربنتينة وخراطيم وفريون) بمتوسط1500 جنية وكل ده الشغل اللى فى الحوض ومش محتاج حاجه من جوه فا ظبطت جوه وباقى اللى بره ابو 1500 ملحوقة ان شاء الله

وبعد كده اجيب شوية كماليات جهاز انذار على طقم طاسات وعراقات وشكاعة ومخدع و....و.... الخ هذه الكماليات

وفضلت اجهز للموضوع ده خلال 6 شهور تقريبا من شهر 9/2010 الى شهر 3/2011 ويشاء السميع القدير اتعرض لضائقة مالية بسبب تغيير السكن

فكنت محتاج اكمل على المبلغ اللى معايا واخد شقة تانية وبكل اسف فكرت فى بيع العربية على نن عينى والله بعد ماجيبت لها حاجات بحوالى 1500ج واكتر على امل اركبها لما اجى اشد وبعد ما صرفت عليها حوالى 6000 ج واكتر من ساعة ما اشتريتها

وقررت البيع وعملت الموضوع وعرضتها طبعا ما زودت على سعرها قيمة اللى اتصرف عليها فى العفشة وبعض الصيانة فا وقفت عليا فى وقتها حوالى بأكتر من 23500 والحمد لله ماشية زى الساعة عرضتها على 22500 قابل للتفاوض فى حدود 22000 وهما اللى كنت محتاجهم ده غير الحاجات اللى ماركبتهاش وقولت يعوض عليا ربنا والاخ الفاضل SAD BIRD الله يجازية خير كان متعاطف معايا جدا ومقدر حالة العربية والحالة اللى كنت فيها عشان بيعها ويعلم الله انه جالى 20 الف ومارضيتش على الرغم من الزنقة اللى انا فيها( مش الزنقة بتاعة القذافى فى ليبيا هههههه) حسيت انى كده برميها بعد ما ظبطها وقعدت حوالى اسبوع ماحدش سأل فيا بعد 4 اتصالات من اللى عايزين يشتروا وبيوقعوا فى سعرها( والحمد اللى انها ما اتباعتش) ربنا فرجها وكرمنا اخر كرم وحسيت نها رجعت لحضنى تانى وعلى طول حدد الفترة اللى هبتدى فيها الشغل خلا اجازات شم النسيم وتحرسر سينا وعيد العمال لانى قررت بعد كرم ربنا انى اعمل فيها كل اللى اقدر عليه بنفسى بعد ما اتعلمت حاجات كتير من المنتدى العظيم ده ومنتديات اجنبية بتعلم ازاى تعمل الحاجه بنفسك وطول الفترة اللى فاتت كنت بجمع معلومات ومواضيع وصور وتجارب واحتفظ بيها عشان التطبيق ومنتظر اشدها بفارغ الصبر بعد مااجمع كل اللى ناقص +اجره الصنايعية+ ثمن الخامات

وقبل ما ابتدى فى اى حاجه طبعا وخصوصا الدوكو روحت لكذا واحد على اسا انها شغل مرمات يعنى اللى عايز يترش هيترش واللى مش عايز(مافيهوش سمكره يعنى) هايتساب والاسعار ابتدت من 450 لغاية 800 ده شغل مرمات لغاية ماربنا وفقنى للاسطى تحى ابو اسامة ورشته على اول شارعنا فى امبابة شاف وعاين وحسبهالى 800 كلها دهان ميتاليك يالاكصدم بالجنوط بالفيبر الداخلى وبعد مافكيت الفيبر الداخلى وديته عشان يترش بصراحة الراجل اتفاجأ وكان عنده حق لان الكمية كبيرة جدا وهتاخد بويه طتير فقالى دول لوحدهم 150 بس بعد ما كان ابتدى يشتغل فيهم (لانى وديتله شوية هههههههه فافتكر ان هم دول بس زى اى عربية وبعدين لقانى عمال احول له كل شوية فعشان كده زاد السعر الاجمالى عن 800 ليصل الى 950 وبصراحة انا برضه قدرت وما اختلفتش معاه خصوصا بعد المعاملة الممتازة والشغل النضيف اللى شوفتة من اسامة ابنه كان اخر اهتمام وحرص

مش عايزين نخش فى تفاصيل المراحل والاسعار دلوقتى خلييها مع بعضها عشان تبقى يوميات متتالية انا بس بحكى المواقف اللى حضرت فى ذهنى

واكيد فى حاجات كتير ناسيها ممكن افتكرها مع المناقشات فيما بعد ام شاء الله

المهم ماطولش عليكو اكتر من كده انا عارف انكم زهقتوا من الرغى واللى مش عايز يقرأ يتفرج

استنوا اخر الصور ان شاء الله بالاسعار والتكالف والاحداث

[aymangalal]

السلام عليكم

طبعا بعد الفترة اللى فاتت والتعب اللى شوفته واللى انتوا برضوا شوفتوه معايا لقيت الذاكرة بخخخخ اختفت

يعنى مش قادر احدد ايه حصل امتى بالظبط لكن الاساسى كله حصل فى حدود 14 فقط عشان كده الذاكره اختفت

انا حقول التفاصيل بقدر المستطاع بالترتيب على حسب ما افتكر بقى ماشى؟؟؟؟

يوم الجمعة 22/ 4 اول حاجه عملتها نزلت التوفيقية عشان اجيب الكماليات واستغل فرصة ان العربية معايا لان من غيرها مش هعرف اروح فى حته وكمان عشان لو احتجت اجيب حاجه ولازم اشوفها او اخد مقاسها من العربية تكون معايا المهم نزلت بعد الصلاه كده واشتريت الاتى:

مخدع بين الكرسيين 40

عدد 4 عواكس باب 20

فانوس شبورة عن الكتكوت 20

عدد سبوت خلفى 30 واللى طلعوا بعد كده بيزمروا لما ارجع مرشدير

فلاش برق 30

مشط نور 5 بتاعتين كده بينورو ليد ازرق اللى حطيتهم تحت الكراسى

غماز 5 جبته عشان احطة فى الصالون ينور على الكنبة

شماعة بتتعلق على مخدع الراس 25

صداد للاكصدام 35

جراب للتارة وحزام الامان 15

دواسة ارضية 65

علامة ستروين بتنور متقطع مع النور الصغير وثابت مع الفرامل 20

انذار وولف 2 ريموت مطوة 140

عراقات 50

طاسات نيكل 90

شرايط ليد مختلفة 50

نور استوب خلفى 25

وفى حاجتين 15+ 20 مش واضحين من خط البياع

طبعا انا مش عارف حسبتهم كده كام بالظبط لكن افتكر انى صرفت حوالى 700ج تقريبا

وانا راجع وقبلها بيومين كده حاسس ان فى صوت عالى جاى من الشكمان او السحب مش مظبوط عديت على بتاع الشكمانات وانا راجع من التوفبيقية شاف وقالى العلبة اللى فى النص تعبانة وعايزة تتغير والماسورة كلها لحامات(انا كنت لسه مغير العلبة دى من كام شهر بـ 60 ج) قالى الشغل المصرى كله تعبان وبيشخشخ (بيبوظ) على طول قولت بكلم الشكمان كله (بالمره بقى) قال 250 من هنا لهنا 220 قولت ركب ياعم وبعدها بيومبن رجعت له عشان يظبط الجوان اللى بين اول الماسورة والفرن وغيرناه وربطناه تمام ومن ساعتها 100 100

فوتكم فى الكلام مش فاكر امتى بالظبط بس قبل ما انزل التوفيقية يمكن يوم الخميس 21/4 عديت على الكهربائى ااكد عليه الشغل اللى هنعمله واعرف احتاجاته ايه ومصنعيتة هالى هات كذا وكذا(سلك وشريط لحام ومفتاح واحد شده شرايط ليد فانوس شبورة والحاجات دى يعنى ودخلنا فى موضوع ازاز الكهرباء الخلفى بعتنى لوحد اسمة ياسر زلط (الباشا ياسر زلط لانه تنك شويه) روحت له عايزك يا عم تركبلى ازاز كهرباء وراء وسنتر للشنطة قالى الازاز نالوش لازمة لانه بينزل نص عندك وبعدين مش هينفع عشان الباب ضيق وقعد حوالى 5 دقايق يبص للباب وسابنى وجاب ماكينة من جوه قال يعنى بيجرب 10 دقايق ولاقيته خلص وخلى الصنايعى اللى عنده يركب لى الماكينة التانية وركب وخلص ونفع واخد 200 ج طب والسنتر قالى ما ينفعش عشان مالوش مكان بعد ماقولتله مش عايز الطرمبة تبقى عالية عشان الغطاء بتاع المساحة فقال مش هينفع قولت له طب ماتقفلش الفرش بتاع الباب وانا هبقى اعملة (مانا كده كده هفك بكره اللى هوه السبت) وروحت طلعت طلعت باقى الفرش وقولت الصباح رباح

يوم السبت 23/4 على ما اذكر بتدى الجد نزلت لساعة 2 الظهر كده قولت اتسلى شوية (ولا باين كان يوم حد عشان ناس كتير كانت قافلة وانا استغليت اليوم ده كأجازة للصنايعية عشان افك العربية من جوه واجهزها للسمكرة والدوكو والكهرباء بيتهيألى يوم حد)

المهم نزلت وطلعت العد (طلعتها من الشنطة مش طلعتها فوق هههههه) وفنجان قوه وراديو للتسالى وهاتك يا فك

ابتديت من ورا (لانه اسهل لقدام) رف السماعات والفيبر بتاع القوايم والكنب والكراسى اللى غلبتنى جدا عشان صدأ المسامير وبرضه مسامير حزام الامان اللى جربت معاها كل المفاتيح ومانفعش غير مفتاح العجل لان محور ارتكازة اقوى وفيه عزم كويس وفضلت افك افك افك زى ما شوفتوا فى الصور لغاية ما جردتها تمام من كشىء داخلى واخيرا الاكصدام والفوانيس والغمازتين والشبكة وكده جاهزة على السمكرة

فى النص كده (لما كنت بعمل الشكمان صاحب الورشة هوه هوه صاحب ورشة السروجى) كنت روحت له قبل كده اسأله على تكلفة الفرش بالكامل ارضية كراسى شنطة ابواب تابلوه(على اسا انى كنت هافكه) قالى كله 1400 ولما تيجى هريحك قولت هيريحنى فى 100 ولا 200 يعنى تخش لها فى 1200 كتير على الميزانية المقررة المهم ما استعجلتش وقولت ادور تانى واللى خلانى اروح له انى كنت بشوف عنده فرش شكله حلو ومشدود كويس

المهم سألت واحد تانى قالى 1000 ومش عايز ينزل جنيه على الرغم انه جار ومعرفة فى امبابة بصراحة لقيته ارخص من التانى لكن لما ورانى العينات اللى عنده حسيت ( وتسرب الشك الى نفسى انه ماعندوش استيعاب لطلبى) فا ترددت على الرغم انه ارخص من الاولانى وفى نفس الوقت حاطت ميزانية اقصاها 750 او اشوف ايه اللى يتعمل بالمبلغ ده والباقى اعمله انا فاسيبت الموضع لوقتها واثناء السيبان ده فكرت بعمق شوية وحاولت ابسط الامور وافكر اللى ينفع اعمله كان فى موضوع لاخ فاضل هنا فى المنتدى مصور كان عامل فرش الارضية بنفسه فى البيت وكمان مزود العزل الحرارى شوفت الموضوع وعجبنى وقول انفذه والابواب دققت فيها لقيت جلد ملزوق بغراء ومشدود باقى الكراسى اللى عايزة تتفصل ودى مش هتتكلف خصوصا لو انا اشتريت الجلد

فا لما كنت بعمل الشكمان الراجل فتح معايا الموضوع وكنت قاعد مستنى الشكمان يتعمل وفى ايدى كوباية القهوه والسيجارة وتجاذبنا اطراف الحديث فاهو اللى فتح الكلام وبيولى عملت ايه طبعا العملية خربت منى بعد موضوع الكوبلن اليمين والمساعد الشمال والجلب بتاع شغل العفشة فى الاسبوع اللى قبله فا قولت له الدنيا بايظة وعايزك تعمل الكراسى بس شوف هتاخد كام واجيب جلد قدايه قالى عشان خاطرك 250 وهات انت الخامات (دمور وسفنج وخيط وغراء) فى حدود 100 غير الجلد اللى انت عايزه قوات اتفقنا وحسيت انها هينه وكمان هجيب جلد مش غالى قوى يعنى هتتلم ان شاء الله فقولت له هات انت الخامات وانا اجيب الجلد قالى هات 100 ج اديتله (ومش عارف ليه حسيت انى اتدبست-مجرد احساس والله – يمكن كان المفروض اسأل تانى او استنى شوية؟؟) وقولت له هجيبلك الكراسى يوم الثالاثاء يكون الجلد جالى(على اعتبار انه هيجيلى هديه-كده وكده يعنى) قالى ماشى والشغل بالكتير يومين

وتوكلت على الله (الكلام ده كله كان مع شغل الشكمان اللى فات فى نفس القاعدة)

والسبت نزلت جبت الجلد على حسب ماقالى 8 متر لو عايز لونين هات 6 من اللون الكتير و2 من القليل 6 بيج و2 رمادى روحت لبتاع الجلد فى امبابة اسمة الاسيوطى فى شارع الوحدة فى امبابة وقولت اتأكد الاول سألت العربية دى تاخد كام متر ياعم قالى بالكتير 7ونص قولت مافرقتش كتير خليهم 8 طب والابواب قالى 2 متر قولت كويس وعملت حسابى على زياة عشان رف السماعات والتبلوه واى حاجه للاحتياط المتر بـ 20 جبت حوالى 8 للكراسى و2 للابواب و2 للتبلوه والرف الخلفى يعنى 12 بـ 240 طيب الارضية تاخد كام قال 2ونص والمتر بكام بـ 45 يعنى 110 تقربا 2 متر للارضية ونص للشنطة كده الاجمالى 360 جلد العربية كله وبزيادة

نرجع تانى للترتيب بقى الاثنين روحت للسمكرى هوه كان شاف قبل كده بس بالليل وقدر المبلغ 200 ج بس قالى اغسل قبل ماتيجى تشتغل عشان نشوف الشاسية وبالنهار ولو فى حاجه يبقى المبلغ هايزيد (السمكرى انا روحت له عن طريق البوهيجى بس انا ارتاحت للبوهيجى غير ان العربية مافيهاش شغل سمكرة جامد لان فى ناس بتنصح بعدم التعامل مع بوهيجى وسمكرى يعرفوا بعض لكن انا روحت للسمكرى عشان وثقت فى البوهيجى والحمد لله ثقتى طلعت فى محلها المهم غسلت الشاسية ب 10ج وروحت للسمكرى بص قال فى بارومة تحت الردياتير وعوجه فى عروة الشاسية قدام لكن بدون اضار جسيمة والكلام مشروح فى الصور طيب يا عم هتاخد كام قال 100 على الـ 200 خليناهم 50 يعنى الاجمالى 250 قالى لازم نفك البطارية والرادياتير عشان نوسع لنفسنا

قولت فى نفسى (يعنى افك البطارية والرادياتير عند حد والعربية اجيبهالو ازاى) وفى لحظة لاقيتنى بقولة هفكلك حالا ومفتاحين من عنده فكيت البطارية ودخلت ع الرادياتير طلعوا فى 5 دقايق بقيت مش مصدق نفسى اول مره افك الرادياتير وفكيته (المهم بقى تركيبه) الراجل ابتدى شغل 3 العصر تقريبا خلص 9 بالليل بعد ماخلص الجزء اللى تحت الرادياتير جمعت فى دماغى ازاى فكيته عشان اعرف اركبة وسميت الله وبدأت وركبت اعرف منين انه كده مظبوط طبعا نبتدى نملاه بالميه (جبت ازازة مياه خضراء صغيرة وخليتها لغاية ما اروقله وحطيت مؤقتا مياه عادية) مليت الرادياتير ودورت الميه تنقص(عشان بتخل الموتور) وازود وازود لغاية ما ثبتت فتحت البلف اللى ع الشمال عشان اسحب الهواء وازود برضه بس طول ما العربية دايرة مش هاتعرف تحكم على البلف ده اذا كان الهواء خرج ولا لأ بطلت العربية وزودت لغاية ما الميه خرجت من البلف ووقفلته وزودت تانى لغاية ما الرادياتير اتملى ودورت لغاية ما الموتور سحب الميه تانى وزودت لغاية ما ثبتت تانى والحمد لله الدورة مافيهاش هواء او تسريب بعد احكام ربط الخراطيم وتثبيت المروحة

باقى اعرف هلى المروحة متركبة صح والترموستات مظبوط ولا لا سيبتها لغاية ما سخنت والمروحة اشتغلت (الحمد لله تجربة ناجحة فى فك وتركيب وتغيير مياه الرادياتير على الرغم من انها اول مره ) الف حمد وشكر ليك يا رب

السمكرى كمل شغله بنط الرفارف والابواب وظبطهم ولحم الصامولة بتاعة مجرى الكرسى اللى كانت مكسورة والصنايعى اللى عنده اشتغل فى لزق الكبوت بالسيليكون والحتتين المفتوحين اللى جنب تانك البنزين وباينين فى الصور على ذكر الكبوت(الكهربائى قالى كده مش حلو المفروض تفكة وتملى كل الفراغ اللى تحت العضم وتقلبة تخلى وش الكبوت تحت والعضم فوق وتحط حجارة تقيلة على العضم وتسيبه للصبح عشان يطبع على الصاج ويمسك فى بعضه كده بيبقى امتن )لاقيت الكلام بالعق منطقى بس ساعة ما قالى كده كنت رشيت خلاص واخاف الكبوت يتجرح فقالى حط تحتية(الوش المدهون الخارجى) غطاء العربية -- برضه كلام معقول بس مافيش وقت لده كله فقولت اخليها بعدين (انا بس ذكرت النقطة دى للافادة)

ومشيت من عند السمكرى بالليل عشان اروح لبتاع الدوكو الصبح ان شاء الله

الثلاثاء 26/4/2011

صحيت وتوكلت على الله(يوميا كنت بنام مش قبل 3 او 4 الفجر واصحى 9 الصبح)نزلت لاسامة وقولت اودى الكراسى بالمره عشان تتعمل حسب معادى مع السروجى وديت الكراسى ورجعت لاسامة وابتدى يصنفر بالصاروخ نزل طل المعجون القديم وصنفر مكان بنط اللمبة بتاعة اللحام وجهز للفيلر

فى الاثناء دى انا كنت فى البيت بقى بظبط العدادات بعد مافكيتها عشان اغير الالوان الداخلية للورق على سبيل التغيير الشكلى يعنى وكمان بركب وش الفوانيس الخلفية واعدلهم عشان نور المرشدير يكون ابيض فى الناحيتين وخدوا منى وقت كبير برضه والصور موجوده فيها كل حاجه

بس اشتريت وشين ابيض بتاع 125 تقريبا عشان اقص منهم واحطهم بدل الاحمر بتاع الستروين وكانت برضه تجربة ناجحة خصوصا بعد تعديل اضاءة نور الشبورة الخلفى ليصبح نور مرشدير فى الناحية الشمال الوشين بتوع 125 كانو ب 6 جنية ومتر دوبل فيس1 جنية وجبت زرار كلاكس عادى ب 3 جنية تقريبا عشان كلاكس التردد الزيادة اللى هعمله

وجبت قلمين ازرق واحمر فلوماستر وابيض كوريكتور وخيط وابر بـ 12 ج كلهم من المكتبة(بقولكم على ادق تفاصيل الاسعار اهوه هههههههه)

خلص الفيلر وروحت لبتاع المفاتيح اللى عملت عنده مكن ازاز الكهرباء الخلفى عشان يشغل لى مفتاح الكونتاكت على كالون الباب وخلص المهمة وروحت للكهربائى بقى عشان يشوف شغلة كالاتى :

اولا احمد الكهربائى ليه معايا انطباع كويس من اول تعامل روحت له عشان نور الصالون كان فصل منى والانتظار وحاجه تانى مش فاكرها لقيته ابتدى يشتغل وهوه عارف مكان الحاجه دى فين فا حسيت انه فاهم وكمان شغل لى صوت تنبية بيصفر لما تسيب النور الصغير شغال والعربية مبطله بيشتغل لما الباب يفتح عشان ماتنساش النور شغال وتقفل العربية

فالانطباع ده خلانى ماروحش لحد غيرة غير انه فك لى المارش وظبطة برضه وهوه عارف مكانه بعد ماروحت لكهربائى تانى اضطرارا (لانه كان قافل) فقالى فكه وهاته اشوفه (طبعا لانه مايعرفش فين مارش الستروين)

المهم ان احمد الكهربائى حافظ الستروين كويس وخصوصا بعد ما ركبت الازاز الخلفى وعمل له التوصيلا اللازمة وعمل كل اللى طلبته منه وهو

مفتاح سنتر للشنطة جنب مفتاح اضاءة التابلوه--- فانوس شبورة مفتاح منفصل له مكان فى الكونسول—فلاش برق بمفتاح منفصل--- نور دواسات (تحت التبلوه والكراسى) بمفتاح منفصل--- نور شنطة بمفتاح منفصل--- نور تحت الابوب بيشتغل مع فتح الباب ويمكن التحكم فيه من زارا نور الصالون (فانوس الصالون الرئيسى) كلاكس اضافى بمفتاح منفصل---- وشغل لى نور النمر ----والمساحة الخلفية--- وعمل نور المرشدير يمين وشمال بعد ما كان يمين بس---- وعمل نور الشبوة الخلفى منفصل بعد ما كان شغال فى الفانوس الشمال الخلفى---- شغل لى لمبة المرشدير--- وركب لى جهاز تنبية الرجع للخلف (الى هوه الاسبوط اللى اشتريته على اساس انه شبورة خلفى) بعد ما ركبته رجعتله عشان يعد لى التوصيلة

لانه كان دايما بيشتغل فى العربية من السلعة 2 او 3 الظهر لغاية 2 او 3 بالليل وكان يجيله زباين مايرضاش يسيبنى ويشتغل لهم وشهادة لله الراجل برضه تعب معايا كتير لان لو اى حاجه علقت منى برجعلة يراجعلى عليها مرة حاولت اركب كاوتشة زرار نور الباب اللى فى القايم(بتشتغل مف فتح الباب) وانا بشد الزرار قطعت السلك روحت له بصراحة تعب لغاية ما شغله واحسن حاجه فيه انه مابيقولش ماينفعش لأ يفكر معاك لغاية ماتعمل اللى انت عايزة وبطريقة مظبوطة ونسيت كمان اقول انه وصل لى نور الاستوب الخلفى بيشتغل مع الفرامل وعلامة ستروين اللى بتنور من النور الصغير متقطع والفرامل مستمر

بالاضافة الى ان لو فى حاجه مش عارف اجيبها من قطع الغيار بيجيبهالى هوه لما ينزل بور سعيد او الوكاله

واحب اشكره جدا على المجهود اللى عمله معايا وكفايه انه كان بيتأخر بالليل عشان ينجزلى فى الشغل لانه عارف ان وقتى ضيق ومن كتر مابقعد معاه بقينا عشرة هههههه

فى الاول قولتله على كل اللى انا عايزة فقالى هياخد 300 ومش هتفرق فاعملت حسابى على 250 لكن بعد الشغل والتعب اللى شوفته بصراحة ما استخسرتش فيه اللى طلبه ويستاهل اكتر من كده

على فكرة جابلى كلاكس تركى استيراد وسمعنى صوته وعجبنى ب 40ج اهو احسن من الصينى ابو 40 برضه وجابلى جرايد سقف(زى حماله للشبكة بتاعة سبيرانزا) 120ج وكلاكس تردد 30 ج المهمم بقى ان فى وسط ده كله صرفت لى مبلغ محترم فى السلك وشرايط اللحام والزراير والحبشتكنات دى قول فى حدود 100ج كل شوية 5 متر فى 10 متر فى كذا فى كذا لغاية ماعملوا مبلغ طبعا ماكانش فى الحسبان

للعلم الكهربائى ده موظف فى الصيانة الكهربية بجريدة الاهرام وبيشتغل فى الورشة بعد الظهر وايام الاجازة وبيجيب قطع غيار لكل الماركات حسب الطلب ووسيط بيع وشراء عربيات واكتر من مره يجيله زبون مشترى او بايع وبياخد اللى فيه النصيب الغرض انه مجتهد ومابيقولش للشغل لأ ربنا يوسع عليه ويجازية كل خير

نروح بقى للسروجى الله يسامحة(اشرف الصنايعى على الرغم من انه راجل كبير اربعينيات تقربا-)يعنى المفروض يكون خبره الا ان تفكيرة صفر وادائة صفرين مجرد بينفذ وخلاص بدون حسابات (ونرجع له تانى) قولت على ما الكراسى والدوكو يخلصوا اخلص انا فرش الباب والزقة بعد ما خليته على العضم وفى تجربة (فاشله فاشله فاشله) انى اكبر المخدع بتاع الباب واحط واعمل مكان للزراير الزيادة لقيت ان السفنج اللى جبته (على انه فوم ) مش نافع خالص لانه طرى جدا ومش بثبت خالص والغرض انى كنت عايز اكبر المسند اللى فى الباب عشان يبقى اريح واعمل مكان للزراير الاضافية لكن المحاولة باءت بالفشل بعد ما جربت فى شلته سفنج ب 60 ج المهم احبطت وقولت اقفل فرش الباب قابلتنى ه

عقبة ان الفايبر الاصلى معضعض ومنقر يعنى الجلد مش هيبقى مرتاح عليه وهيبان من تحته النقر الكتير ما كانش قدامى غير انى ارجع للسروجى (اضطرارا) يشوف لى حل قال مافيش غير الجلد ابو ظهر سفنج النتر فى حدود 25 او 27 ج هاته ونلزقة وهات جالون 2 كج غراء سألت فى امبابة مالاقيتش غير اللون الرمادى وانا عايز بيج قالى انزل المناصرة قولت له ده انا لو هسيبه كده مش رايح فى حته انا اتدغدغت اليومين دول من المشاوير وخصوصا انى نزلت الوكاله مرتين(وهقولكم ليه) قالى استنى لغاية ما انزل انا واجيبهولك قولت له لا ماعنديش وقت اعمله اى حاجه وخلاص قالى حرام تبوظ شكل الباب عشان مترين جلد وسكت شوية وقالى تعلالى الصبح الساعة ننزل نجيبة ونرجع مافيش ساعة زمن قولت موافق وروحت له الميعاد لكن هوه جالى الساعة 10 تقريبا واتأخر لظروف خدنا بعضنا ونزلنا المناصرة عند حد معين ملاقيناش برضه وبعدين روحنا لواحد تانى لقينا بس المتر 35ج بصراحة هوه استغلاه وحاول يفاصل لكن مانفعش فاشترينا 3 متر الا ربع (2 متر بيج ومتر الا ربع رمادى وجالون كوللا غراء ايطالى ) الاجمالى 155ج تكلفة اضافية على سعر الجلد الاولانى قبلها قولت له هتاخد كام على شغل الابواب(لانه ماكانش فى الاتفاق الاولانى) قالى 100 وانا مضطر والراجل نزل معايا مخصوص يعنى تعب نفسه عشانى (وبرضه مصلحته فى انه يعمل الشغل وياخد اجر) فاوافقت وخلصت من هم الباب بعدها لقيت ان جلد الارضيه سميك ومش هاعرف اتحكم فيه على ماكينة الخياطة بتاعة البيت رجعت له تانى وتاخد كام يا عم قال 100 ولومافيش ماتدفعش وطبعا الراجل كان ذوق جدا فى تعامله معايا وبعدين حسبتها لاقيتها دخلت فى 450 مصنعية بس للعربية كلها ارضية وكراسى وشنطة وابواب قولت معقول

نيجى بقى للاسطى اشرف السروجى(اللى هوه الصنايعى اللى شغال الظاهر ان صحب الورشة مخنوق منه وبيضيق عليه وبالتالى هوه خنوق من صاحب الورشة وبيشتغل من غير نفس وانا اللى ضايع فى النص او هوه اصلا صنايعى على قده ) قولت له على المطلوب على اعتبار ان هوه اللى هينفذ يا عم اشرف خد بالك من :

رسمة الخياطة بتاعة الظهر والقاعدة تبقى ماشية مع بعض على خط واحد مش عايز ترحيل

عايز جيبين فى ظرهر كل كرسى

وجيب صغير زى السحرى كده عشان الرخص

والاهم بقى تلم الكراسى (امال انا عامل تفصيل ليه) من القاعدة والظهر حاجه كده شبه كراسى الريكارو (طبعا ماقولتلوش ريكارو) لكن الغرض ان الشلته والظهر يتلموا عشان قفلة الباب ويا عم عنيا ليك واللى تأمر بيه(فى تلميح باكرامية كويسة لو الشغل عجبنى)

خد عندك الرد قالى: ده انا هظبطك هههههههههه قولتله ظبط

وهاعملك شوية شغل انما ايه قولتله اعمل

الغريب ان الراجل ده من المنصورة وبتوع المنصورة مشهورين باحترافيتهم فى شغل السروجى بالذات لكن......

اول انتاج شوفته الظهرين اللى ورا وبعدين القاعدة(المرتبة على حد تعبيرهم) التقدير عادى مش خرافة يعنى هما هما باختلاف اللون اللى مخلى شكلهم حلو رميت نظرة خفية كده ع التقفيل والخياطة ونبهته على استحياء ان المفروض يكون احسن من كده قالى اتفرج على الكراسى بقى

فى المرحلة دى انا كنت زهقت من الاحباطات اللى اتعرضت لها بخصوص فرش الباب سواء من عدم قدرتى على انجازهم او عدم وصولى للنتيجة المرجوه او زيادة التكلفة عن المحسوب له فا كنت عايز اخلص بأى شكل غير انى تعبت جدا من كتر المجهود وقله النوم وسرعة مرور الوقت

جه ميعاد الكراسى الشكل العام عادى برضه زيهيم زي الكنب بس برضه اللون والفرش الجديد مديهم شكل حلو ولا عمل جيب كبير ولا صغير ولا لم الكراسى زى ما قولت والتشطيب مش ولا بد وحاجه كده مالهاش اى لازمة والشىء الوحيد الكويس انهم خلصوا بعد ايه ؟؟ بعد ماقالى يومين وديتهم الثلاثاء على اسا استلم الجمعة بالكتير لا خلص لى يوم الاثنين (بس انا كده كده ماكنتش مستعجل عليهم

تعالى بقى ياعم نركب الارضيه (مانا مستنى يركب الارضيه عشان اقفل وراه بالفيبر الصراحة القص والخياطة تمام والدواسة اتفرشت عملت منظر ووسعت بلونها البيج الجميل وتقفيل الارضيه حلو(ملحوظة :كل ده بدون وضع الكراسى لسه تانى يوم) لانه اشتغل كمان يوم الاحد والراجل صاحب الورشة قاله ماتقفلش غير لما تخلص له كل حاجته كتر خير الراجل صاحب الورشة برضه (بس والله اعلم يمكن لسبب الخنقة اللى سالف ذكرها بين الصنايعى وصاحب الورشة حصل الاتى) الصنايعى جه على الساعة 11 كده ولاقيته بيرمى كعوب ( كفاية كده النهارده ) تصدق شغل النهار احسن من الليل حتى الواحد يشوف كويس ويشتغل فى النور ومايكونش مستعجل ,,و.....و....و .... الخ مع انى عمال اسقيه فى شايات وسجاير عشان يصحصح ويشتغل بمزاج فى النهاية قالى بس ماتقولش للحاج ان انا اللى قولتلك (مش عشان خايف منه لأ..... ده كلامه) عشان مايقولش ان انا اللى مشيتك

بصراحة صعب عليا برضه وقولت ماجاتش من سواد الليل لم ياعم العدة واجيلك بكره ان شاء الله والمفروض على حسب كلام صاحب الورشة ان الصنايعى يخلص لى الشغل وياخد باقى حسابه 150 فا اديتله 100 واتبقى 50 لتانى يوم على امل انه يشتغل بالنهار اوضح زى مابيقول

جينا نقفل الكراسى عشان نركبها وهوه بيركب فبرة فى الجنب قرص على مسمار كسرة(كنت عايز اكسر عضمة بس عايز اخلص برضه) قولت مش مشكلة وروحت خرطت واحد زيه لانه مش بيتباع

قفلنا الكراسى وجينا نركب حط الكرسى على المجرى وبيزق لقدام وورا راح مجرح الدواسة بالحديد اللى فى الكرسى لا جلد الدواسة عالى ومجرى الكرسى غاطسة فى الجلد ومصمم يزق انفعلت عليه فى هدوء برضه وقولت له كده ماينفعش انا مش حاطط دواسة بدل القديمة عشان تتبهدل بالشكل ده قالى طيب هنعلى من تحت المجرى بصامولة لكن الكرسى هيبى قالب (مايل) لبره قيمة ارتفاع الصامولة عشان المجرى ماتحكش فى الجلد رضيت وامرى لله

طبعا كان عك ع الاخر ومعالجه خطأ بخطأ بس انا كنت زهقت وجبت اخرى وعايز اخلص وكمان الكرسى يا اما بيصدر مابيتحركش ياما يروح وييجى ومايثبتش قولت لما افك فى شغل السروجى هوه هيظبطه وقولتله عليه قبل مايركب ماعرفش عمل ايه (قال يعنى ظبطة) ولما اتركب ولا كأنه عمل حاجه وخصوصا لما يكون علية حمل حد قاعد وماينفعش يكون المقياس وهوه مخلوع لان المجرى طبعا حره هتروح وتيجى بسهوله

المهم ماصدقت اخلص منه عشان اخلص تركيب باقى الحاجات وقولت اركب انا فرش الابوب بعد ما شوفت العك اللى حصل

جيت اركب فرش الباب اكتشفت المفاجئة اللى ماكانتش فى الحسبان

الجلد الجميل ابو ظهر سفنج..... طبعا واخد مساحة فى الحروف اكتر من الجلد العادى وبالتالى مش دخل فى المجرى بتاعة الجيب الفايبر غير ان المسميبر اللى ماسكة الفايبر من الظهر كل ماتدخل فى الجلد تبرم مع السفنج وتجلى الجلد كله يلف حوالين المسمار زى الدوامة كده وكمان خلى فرش الباب اعلى من الطبيعى من ناحية صوابع المسوجر عشان كده الصوابع بقت غاطسه جوه وعلقت مع فتح وقفل السنتر لدرجة انى شكيت فى شغل الكهربائى والتركيب قرفنى اخر قرف وقعدت فيه من 8 بالليل لغاية 7 الصبح دون جدوى واللى زاد وغطى ان الفتحات اللى عملتها للزراير طلت مش مظبوطة ورحلت منى فابقت الزراير مشدوده جدا ومش قاعدة فى مكانها وزراير الازاز علقت والبطاريه فضيت لانى كنت مشغل الراديو طول الليل ومش عارف انه هينيم البطارية كده وطلع النهار وانا مش طايق نفسى من الزهق والتعب ولا منى عارف اقفل كويس ولا منى عارف اقفل الازاز حتى واطلع انام عشان مافيش كهرباء فى العربية لغاية ماربنا بعتلى واحد يزق وندور ونقوم البطارية واقفل الازاز والطلع اشوف النوم لمده 3 او 4 ساعات بس لانى اغمى عليا من التعب

والملحوظة اللى كانت على الجلد ابو ظهر سفنج تنطبق برضه على الرف الخلفى بتاع السماعة لان الباشا السروجى كساه من غير ما يفتح للمسامير فاتكررت نفس المشكلة وانا باربط السماعات بمساميرها وكمان شد الجلد كان سيىء جدا لدرجه انى شلته تانى وركبت جلد خفيف بنفسى والحمد لله طلع احسن 100 مره ومظبوط اكتر

المهم فى خلال شغلى مع الكهربائى روحت ركبت وحده رفع للازاز الامامى ب 75 بالتركيب عند الراجل اللى قالى ماينفعش تركب ماكينة السنتر فى الشنطة

واللى خلانى اروح له انى كنت رايح للكهربائى فا عديت عليه فى سكتى وقولت اسأله بكام وحدة الرفع فاركبتها بالمره وبصراحة شغالة تمام وكمان بالمره برضه اشتريت سماعتين للباب الامامى لان ماكنش فيه وباقى بس انهم يتوصلوا على الكاسيت السماعت ب 50 ج ماركة عادية اسمها كينج وود Kingwood

بعد ما صحيت مش فاكر بقى كان يوم ايه لانى فقدت الاحساس بالوقت روحت لسامح بتاع المفاتيح والابواب اللى على اول الشارع (وفى اليوم ده برضه ما اشتغلش غير فى عربيتى من بعد الظهر لغاية 2 بالليل) بس كان خلص كل حاجه كالاتى:

ركب طرمبتين سنتر واحدة لباب والتانية للشنطة(الكهربائى كان مجهز وصلة سنتر الشنطة وباقى الطرمبة والمفتاح)

ضبط كالون غطاء تانك البنزين على مفتاح الكونتاكت (اللى الكهربائى ركبه) وركب زرار سنتر الشنطة وظبط لى الابواب تمام التمام

واخد 200 ج تقريبا او 250 مش فاكر بالظبط وبصراحة مااستخسرتش فيه خصوصا انه تعب معايا جدا وفضلت برضه كل ما حاجه تعلق معايا اروحله ويعمله لى بدون مقابل يعنى شغل بالضمان على الرغم من ان التعليق مالوش سبب معين

فى الاثناء دى كنت استلمت العربية مشوشة وتمام بس خليت رش الاكصدام فى الاخر عشان ما يتبهدلش وكمان لانى ماكنتش بره امبابة ومش محتاج اعلق النمر وكمان كان الفيبر كله اترش بنظافة واللون المطلوب بالظبط وقولت تفاصيل الرش فى المشاركة اللى فاتت تقريبا

بعد ما خلصت الاساسيات كلها واطمن ان الابواب تمام وسامح ركب لى فرش الباب بعد معانة رشيت الاكصدام وركبت النمر وقولت اخلى الباقى للاسبوع اللى جاى المهم اروح بقى ارتاح يومين قبل ما انزل الشغل يوم الاحد 8/5/2011

وبقيت انأ نأ فى كل حاجه شوية غيرت كاوتش الباب والشنطة وجبت حتة كده للكبوت بتركب من جوه وصلت كل شرايط الليدات بعد ما الكهربائى عمل لى سلك لكل حاجه جيت اركب كاوتش البريبريز الامامى حلف ماهو راكب اركب 10 سم مثلا وييجى عند الدوران وينطر روحت لواحد قالى لازم الازاز يتفك وبعدين فى شرخ فى الازاز(كنت عالجت نقر فى الازاز الامامى وبعد فترة ظهر الشرخ ده خارج من التقر المتعالج) فا ممكن الشرخ يزيد لو الازاز اتفك على كده غير انه هايتكلف 80 ج طبعا اتصدمت من السعر وقولت مش مهم دلوقتى وانا كده كده مش هغرقها ميه لانى خايف الميه دخل من الازاز على الرغم انه قفلة الازاز دى هى بتاعة الفابرقة ده كلام بتاع الازاز خدت بعضى وروحت للكربائى عشان موضوع الزرار اللى سقط جوه قايم الباب ده ويركب لى فوانيس الشبورة ويظبط لى الحاجات اللى ناقصة والحمد لله عمل كا حاجه

وركبت الكارتيرات اللى فوق العجل لاحظت ان الفرده اللى ناحية اليمين مش بتاعتها مالهاش اى عدله خالص ولا بتبات فى مكان ومش فاكر كانت متركبة ازاى قبل م افكها فاركبت كده والسلام عشان اركب الدلايات اللى بتحوش الطينة اللى خارج من العجل( ايوه افتكرت دى الحاجة ام 25ج اللى كانت فى الكمالياات والبياع خطة مش واضح فيها) المهم الكارتيرات ماكانتش مرتاحة وداخلة جوه السوست ومطب فى التانى ببص مالاقيتهاش هى اصلا كانت نص كارتيرة ودلوقتى بقت ربع هههههههههه يعنى انا ماشى على كارتيرة وربع هههههههه

وفى حاجات مأخر تركيبها على حاجات تانية مثلا العراقات مش عايز افرشهم غير بعد غسيل الكراسى اللى اتبهدلت من قعاد الصنايعية اكتر ماهى متبهدلة الانذار مش عارف اركبه لان مافيش فلوس (فلست والحمد لله) مش عارف اغسل العربية واشمعها عشان الميه ماتدخلش من الازاز وبدور على وش لزراير ازاز الكهرباء اللى خارجه من الفرش ومخليا شكله عار العار ده غير الزراير اللى بتسقط قوه الباب نفسة ومش لاقى الوش ده فا هفكر له فى حاجه كده وتقضى ان شاء الله

كده باقى عندى الكلاكس التردد والغسيل والتشميع والاستيكرات وجرايد السقف وكاوتش الازاز المامى ورشاش ميه المساحة كلها حاجات بسيطة بس عايزة فضا عشان تخلص وان شاء الله تخلص

بمناسبة الجرايد فى باكتات بتركب فى السقف على المجرتين اللى فى الاجناب بتوع الميه( المزاريب) دول طبعا مش لاقيهم خالص والنقطة

دى موجودة فى الصور ومشروحة وكلفتنى 30 ج على ذكر التكاليف يعنى

وكل ما افتكر حاجه بقولها

اه لما نزلت الوكالة مرتين مره عشان اجيب حاجات ومره عشان ارجعها

جبت مره عوامة البنزين اللى كنت دايخ عليها والكونسولة اللى فى التابلوه اللى فيها مفاتيح التكييف ومفتاح الشبورة وكان فى شبهة ان المروحة بايظة فاجبت المقومة بتاعتها بالاسعار التالية

المقاومة 100

الكونسول 100

العوامة 150

جه الكهربائى يركب لقى العوامة مش بتاعة ستروين (الله يسامح بياع الوكاله ادهالى ازاى دى) والكونسوله انا شاريها عشان زرار مفتاح الشبورة اللى فى النص بس ومش خسارة برضه زرارين التكييف وكان فى كمان زرار كبير كده مش عارف بتاع ايه وزرار تحويل من بنزين لغاز المهم مفتاح الشبورة طلع على وايرات سلك يشد فوانيس الشبورة عشان يعلى ويوطى الفوانيس نفسها زى الريجلاش كده واللى انا محتاجه مفتاح كهرباء فتح وقفل

الكهربائى ادانى العوامة اللى فى عربيتى وقالى رجع اللى معاك وهات زى دى ورجع الزراير دى كمان وهات مفتاح المروحة العادى ابو درجات

روحت اديلة الحاجات وقفت اكتر من ساعة ونص لغاية ماجه اللى اشتريت منه(مانكرش ان معاملته كويسة جدا وشعاره –ماتحملش هم ههههه)

قولت له ع اللى فيها راح جابلى عوامة زى اللى معايا بالظبط

وفك لى مفتاح المروحة من تابلوه برضه طبعا كده فى فرق سعر بين الكونسول كله والمفتاح الفردانى واكيد مش هاخد فلوس قولت اخد ببقيه الفلوس حاجات تانى واكتر من اللى ليا واحاسبة على فرق السعر

عجبنى زراير الشبورة الخلفى وسخان الازاز وطفاية جديد وممتازة وعلامة ستروين الاصلية خلعهالى من كبوت

قولت كده هيبقى له حوالى 50 جنية ولا حاجه كان عايز يحاسبنى على فرق الكونسولة بالحاجات اللى خدها بدالها على 200ج خلصت معاه على 100

انا عارف انى كده مغلوب جامد ولولا الوقت وان الكهربائى مستنينى اجيب له الحاجه اللى هيركبها انا كنت قعدت معاه للصبح عشان 10 ج بس انا اشتريت وقتى وراحتى ومشيت روحت للكهربائى فرحان بالعوامة والزراير والعلامة الاصليه

اتصدم بإن العوامة التانية مافيهاش راجع لان الاصلية اللى راكبة فيها ماسورتين واحده تاخد بنزين والتانية ترجع البنزين الزيادة من الكربراتير غير ان مافيهاش لمبه بيان اللى هى بتنور لما التنك يفضى على 5لتر اتصلت بالراجل تانى والكهربائى كلمة برضه يوضح له (لانى لاقيتهم شبه بعض فاخدتها ومشيت) قال تعال لى يوم التلات وانا كنت مروح ع المرج ومنا ساعتها العوامة معايا ومارجعتلوش بس هوه عارفنى وان شاء الله هروح له تانى ارجعه له

معلش بقى الامور دخلت فى بعضها والاحداق اتلخبطت بس كويس انى جمعت احداث الفترة دى ويمكن فى اسعار تانى مش فاكرها دلوقتى

وبرضه خليكوا متابعين لغاية ما اقول عملت كسوة التابلوه ازاى

[mzmr]

رائع يا بوب قمة في الاداء والشرح المفصل بس كنا عازين شوية شرح من جوة الكابوت وبعدين انا امارح مكنة الزجاج علقت مني وبتعمل صوت بزرجنة معرفتش افكها لو عندك صورة وضحة لكيفة فكها اكون ممنون عازين نظبت الصفحة لتكون رابطة الستروينax وشاكر افضالك ومجهودك

[aymangalal]

متأسف يا جماعة انتى اتأخرت عليكم (النهارده الجمعة بالليل او صباح السبت) عنت برضه بخلص حاجات فى العربية وخصوصا الفينيش لكن مش معايا كاميرا دلوقتى اصور بيها وتليفونى قديم نوكيا 1100 ابو من غير كاميرا هههههههه
اول ما الاقى كاميرا ان شاء الله هصور اللى تم اجازه وهرفعه على طول فى الموضوع
وان شاء الله الشغل يعجبكم

بالنسبة لشرح جوه الكبوت انا ولله الحمد ماتعرضتش لمشاكل كتير جوه الحوض(الموتور يعنى) وبالتالى معلوماتى قليلة شوية فى المنطقة دى لكن برضه هحاول اشرح كل اللى عرفته وبالصور ان شاء الله
لو قصدك على المكنة بتاعة زجاج الكهرباء نفسها (مش الزراير او الكهرباء) ممكن ترجع لأول صور فى الموضوع هالاقى الباب من غير فرش وباين منه الصواميل اللى ماسكة المكنة سواء يمين او شمال المهم انك تفك فرش الباب وتشوف ايه الاخبار وتحاول بشوية زيت او تنظيف المجر يمكن فى حاجه حايشة يعنى وتستكشف السبب ولو ماعرفتش يبقى تروح لواحد بتاع الابواب والمفاتيح يبصلك عليه ويقولك السبب ويستحسن ماتفكش المكنة لو مش عارف لان تركيبها محتاج تظبيط من المختص وعموما شغل مكن الازاز كله عندى كان عند المختص
وان شاء الله هنعمل موضوع ونطلب من الادارة تثبته يكون خاص بمالكى AX على وجه الخصوص وتبقى رابطة او جروب او اى مسى يجمعنا على حاجه مشتركة
وللعلم انا راسلت الادارة قبل كده عشان تعمل اقسام فرعية من قسم الستروين على حسب الموديل أسوة بالاقسام الاخرى فكان الرد ان عدد المواضيع فى قسم الستروين عموما قليل مما يحول دون عمل الاقسام الفرعية
لكن زى ما قولت لحضرتك نعمل موضوع خاص بكل شيىء عن الـ ax

[mzmr]

شاكر افضالك ومجهودك