كيا كارينز ولا دايهاتسو تيريوس

[@واحد من الناس@]

يا جماعة يا ريت يكون الكلام عن تجربة الله يكرمكم متوهوش الراجل معانا
بص يا سيدي الكارنز أوسع من الداخل أقوى فى الموتور توكيل أقوى راحة وفخامة فى القيادة

التريوس أعلى من على الأرض أقوى فى العزم والتسارع نسبيا

بص شوف بقى إحتياجاتك أنا جربت الإتنين مدة طويلة كان إرتياحى أكثر للكارنز رغم عدم إرتفاعها من على الأرض بس صدقنى عربية فخمة مقارنتا بالتريوس

بس هى فى الأخر أذواق وإحتياجات ولولا إختلاف الاذواق لبارت السلع

[mahmoud capello]

شكرا لكل عضو رد دة اولا
ثانيا انا مبعرفش اسوق ولسة هتعلم وكمان انا مبحبش السرعه يعنى ميهمنيش التسارع اوى
ووالدى سواقتة هادية مش بيحب يجرى ولا يقرص علشان كدة مش هيفرق معانا التسارع احنا عايزين عربية عائلية تكون فخمة وواسعه وقليلة الاعطال
بالنسبة للداستر والدى كان بيفكر فيها ( الدفع الرباعى ) بس استبعدناها لسببين اولا انها مانول بس واحنا عايزين حاجة اتوماتيك ثانيا اعادة بيعها فى الارض وقطع غيارها غالية

انا لحد كبير اقتنعت بالكارينز وخصوصا ان والدى ميال ليها اكتر بس انا عاجبنى شكل التيريوس وكمان يابانى علشان كدة حاولت اقنع والدى بييها هى والسول

بالمناسبة عايز اتعلم السواقة اروح اتعلمها فين فى المرور ولا فى مدرسة سواقة عايز اتعلم بسرعه ومش هينفع على العربية لانها جديد وكبيرة واتوماتيك

[sherifabden]

بقولك ايه متفكر في الهيونداي i30 بجد عربية ممتازة وهيا هاتشباك وحجمها اقل من الكارينز والتريوس وكمان افضل منهم ؟؟

[nourelatrosh]

يا شريف باشا هي ال i30 افضل في ايه ده انا ماشوفتش منها الا اتنين بس و شوف الكارينز منتشره ازاي
و بعدين الكارينز اكبر

[sherifabden]

المشاركة الأصلية كتبت بواسطة nourelatrosh يا شريف باشا هي ال i30 افضل في ايه ده انا ماشوفتش منها الا اتنين بس و شوف الكارينز منتشره ازاي و بعدين الكارينز اكبر

الـi30 موتورها اقوى واوفر في البنزين وكمان حجمها اصغر من الكارينز لكن واسعة جدا من جوه ووزنها خفيف ودا هياثر في استهلاك البنزين والاداء بشكل ايجابي وكمان شكلها احلى (مسالة اذواق)
والكارينز لا تتفوق الا في انتشار قطع الغيار واعادة البيع بس