مقبل على شراء سيارة جديدة وعندي بعض استفسارات بخصوص الBYD F3R و التقفيل الصيني.

[eng_amahaay]

السلام عليكم.

ان شاء الله انا مقبل على شراء سيارة جديدة و عندي شوية استفسارات لو سمحتم. الموضوع دة هيبقى في منتديين عشان احاول احصل على اكثر ردود ممكنة.

انا شفت ال BYD F3R الهاتشباك الجديدة و اعرف ان الموتور بتاعها بتاع اللانسر شارك 1500CC. هل في حد جابها ولا لسه؟. و هل حد يعرف اذا كان قطع غيار الموتور ده منتشرة زي اللانسر بومة 4G18 1600cc ولا لأ وايه اسعارها؟

بالنسبة للي معاه BYD F3 تقفيل صيني هل عنده مشكلة الونة و العضة بتاعت الفتيس اللي في التقفيل المصري لاني بفكر في الهاتشباك عشان التقفيل الصيني بس.

و لو جبت ال BYD F3 اتوماتيك التقفيل المصري..... هل صوت الماتور عالي زي المانيوال مع مراعاة ان صوت اللانسر البومة و اللانسر عموما صوتها اعلى من عربيات تانية كتير و ده عن تجربة لان الحاج معاة لانسر بومة. و لا الصوت اعلى من اللانسر بصورة ملحوظة.

نقطة تانية و هي الضمان. هل هو 60000كم زي الbrochure بتاعها اللي في المعارض ولا بقى 100000كم لاني ساستخدم العربية ان شاء الله في الشغل و السفر يعني من 4000 الى 5000كم شهرياً.

انا بفكر بصراحة في حاجة من اثنين...... رينو لوجان او BYD بس محتار جداً
كل واحدة فيها حاجات كدة تخلي الحلو مايكملش.

اللوجان عربية حلوة و التقفيل و المكونات من غير زعل واضح و عن رؤية شخصية افضل و التوكيل سمعتة كويسة بالنسبة للامل بس فيه برضه غلاء اسعار قطع الغيار ودة بالنسبة للقطع الجامدة زي المقصات و الكبالن و علبة الدركسيون اكيد مقارنة بالـ BYD و احتمالية ان يكون فيها عيوب بتظهر بسرعة زي جلب المقصات و اللي بتتطلب تغير المقص كله في التوكيل.

على الوجه الآخر الـBYD المكونات و التقفيل مش زي اللوجان بس فية اوبشن اعلى زي اير باج زيادة و ال ABS+EBD, التيل الاصلي مش بيستحمل 10000كم استعمال ولو غيرته بتيل كورولا هخرج بره الضمان. وده نقطة نقاش اخرى و هي رخص قطع الغيار بس ممكن تتغير اكثر من الفرنساوي و ده على الاقل لغاية لما اخرج من الضمان و اركب حاجات متسوبيشي و كورولا.
توكيل الامل واضح انه سيء ماعدا توكيل الاسكندرية و اللي واضح ان كل فروع التوكيلات في الاسكندرية بيبقى احسن فرع زي الرينو برضه بس باقي الفروع حلوة برضة بس الاسكندرية احسنهم.

صوت الموتور في الاثنين عالي عن باقي العربيات زي ماملاك العربيتين بيقولوا بس مين اعلى من مين و هل الفرق واضح. مش عارف!

اللوجان مفيش عضة في الفتيس و لا صوت ونة و الـBYD تتفوق في القوة.

اللوجان اوسع و سقفها اعلى من الداخل عن ال BYD عن تجربة بس اللوجان الكنبة الخلفية ظهرها واقف عن الBYD و من هنا جت المساحة الواسعة على ما اعتقد فالكنبة الخلفية اعتقد مش حتبقى مريحة في المسافات الطويلة بس تاخد 3 كبار مستريحين زيادة عن الBYD.

الاثنين تقريباً الصيانة الدورية ليهم بعد 60000كم يعني سنة بالنسبالي هتبقى تقريباً واحدة من 4000 الى 5000جم.

اللوجان فيها ايموبليزر ودة مهم جداً اليومين دول . الBYD فيها نظام حماية بس مش شفرة في المفتاح و دة اسهل في التغلب علية و خصوصا اذا دخل على المنتدى و عرف ازاي يوقف عمله زي ما قيل في احد مشاكل ادارة محرك الBYD.

اللوجان كله فية مواسير مياة سخنة مكشوفة جنب دواسة البنزين و انا شفتها و التوكيل بيحط عازل ليها بس برده ساعات ناس بتحس بالحرارة و ال BYD سمعت منكم ان فية بعضها بيخشها هوا من قدام بيقلل كفاءة التكييف.

معلش انا دقيق الى درجة وحشة و ده يمكن لان ده هتبقى اول عربية ليا ان شاء الله.
انا من اسكندرية و شغال في القاهرة فمشكلة الصيانة في الاسكندرية مش مشكلة ليا.

و في الآخر احب اشكر كل اللي ساهموا في مواضيع سواء اللوجان او الBYD لان الفضل يرجع لهم بعد الله في اني افكر في العربيتين دول.

سلام عليكم.

[drpepo]

مساء الخير استاذى الفاضل

بالنسبة للي معاه BYD F3 تقفيل صيني هل عنده مشكلة الونة و العضة بتاعت الفتيس اللي في التقفيل المصري لاني بفكر في الهاتشباك عشان التقفيل الصيني بس.

استاذى الفاضل احنا لسنا في البيت مشتريين ال BYD f3 2012
مانيوال فول اوبشن
اولا لايوجد عضة في الفتيس لكن والدى واخوياكاناو بيقولوا انهم بيسمعوا صوت اثناء النقلات ( اللى الناس بتسميها خشونة ) بس انا حاسس انها عادية وعلشان لسه العربية في التليين طبعا ومفيش اى مشكلة ولا اى عضة في الفتيس باستثناء هذه الملاحظة

و لو جبت ال BYD F3 اتوماتيك التقفيل المصري..... هل صوت الماتور عالي زي المانيوال

اولا استاذى الفاضل معروف ان في التليين صوت الموتور بيبقى عالى شوية وبعد الصيانة بيقل
لكن بامانة وربنا يحاسبنى على كلامى
انا فوجئت ان الموتور ليس له اى صوت نهائيا في السلانسيه او في السير وفعلا لولا انى بشوف ان المؤشر بتاع الزيت اختفى من التبلوه بعرف ان العربة دارت

نقطة تانية و هي الضمان. هل هو 60000كم زي الbrochure بتاعها اللي في المعارض ولا بقى 100000كم لاني ساستخدم العربية ان شاء الله في الشغل و السفر يعني من 4000 الى 5000كم شهرياً.

60 الف يااباشا او 3 سنين
بس سواء 60 او 100 الف انت المفروض بعد الضمان برضوا كل 5 تعمل صيانة في التوكيل علشان تحافظ على اداء السيارة كما هو

انا بفكر بصراحة في حاجة من اثنين...... رينو لوجان او BYD بس محتار جداً كل واحدة فيها حاجات كدة تخلي الحلو مايكملش.

بص يااستاذى الفاضل انا بامانه كنت محتار بين البى واى دى اف ثرى واللوجان والفيرنا ونظرا لضيق صالون الفيرنا ولانها ليست عالية عن الارض كمان حكاية ان الثبات غير مستقر ففي السرعات العالية خلتنا كاسرة مكونة من 5 افراد نكنسل الحكاية دى
اما من حيث اللوجان فهى سيارة محترمة لكن انا اللى قلقنى منها ان في كتيرة اشتكوا ان ليها مشاكل بتيجى من المصنع اساسا دا غير ان فيها اساسا عضة الفتيس لكن من حيث العلو فهى اكثر من رائعة
اما من حيث البى واى دى فعلوها عن الارض رائع جدا ووسعها من الداخل والشنطة جيد جدا جدا دا بالنسبة لنا وانا كسائق بقعد مرتاج جدا جدا يعنى مش بلاقى ايدى خبطت في الباب لا الدنيا مريحة خالص واللى ورا مرتاحين جدا
كما ان اللوجان كقطع غيار غالية بينما في البى واى دى اسعار مقبولة
موضوع تيل البى واى دى انا لسه بصراحة مشفتوش ومش عارف عنه اى تقارير فمقدرش اتكلم فييه

اللوجان مفيش عضة في الفتيس و لا صوت ونة و الـBYD تتفوق في القوة.

قسم اللوجان الناس بتشتكى من عضة في الفتيس وخاصة اثناء الرجوع للخلف
والبى واى دى صوت الموتور ليس عاليا اساسا وانا لسه في التليين

اللوجان اوسع و سقفها اعلى من الداخل عن ال BYD عن تجربة بس اللوجان الكنبة الخلفية ظهرها واقف عن الBYD و من هنا جت المساحة الواسعة على ما اعتقد فالكنبة الخلفية اعتقد مش حتبقى مريحة في المسافات الطويلة بس تاخد 3 كبار مستريحين زيادة عن الBYD.

على فكرة انا طويل وسشقف البى واى دى واسع جدا والعربية من جوا مريحة للغاية اما اللوجان فلو اجربها صراحة بس اعرف انها واسعة من جوا بس البى واى دى تيجى بعدها بفرق مش كبير عنها

لBYD فيها نظام حماية بس مش شفرة في المفتاح و دة اسهل في التغلب علية و خصوصا اذا دخل على المنتدى و عرف ازاي يوقف عمله زي ما قيل في احد مشاكل ادارة محرك الBYD.

نظام الحماية في البى واى دى اقل من اللوجان ونظام الحماية له عدة مستويات وتقدر تضبط المستو ىبتاعه وتخليه عالى براحتك وتقدر تجيب قفل دريكسيون محترم والدنيا تبقى متأمنة

و ال BYD سمعت منكم ان فية بعضها بيخشها هوا من قدام بيقلل كفاءة التكييف.

اعتقد كل هذه المشاكل ليست موجودة في 2012
عزل البى واى دى ممتاز
انا جربت التكييف دقيقتان وكان ممتاز
عند غلق الزجاج وانا ساير على الطريق السريع صباحا لم اشعر ان هناك اى هواء يدخل السيارة ابدا

كاتوتشات البى واى دى اعرض مما يجعلها متماسكة بشكل افضل عن اللوجان من وجهة نظرى
كما انها موفرة للبنزين جدا
انا مشيت بيها 580 كيلو ولم تستهلك سوى 35 لتر فقط منهم ساعة في مصر في حتت زحمة ووقفة كل شوية
وسائل الامان لك ( في حالة الحوادث لاقدر الله ) اكبر من اللوجان ففمعك abs - ebd - airbage


واخيرا اتمنى حضرتك تشرفنى في تقريرى عن البى واى دى 2012
في اول 700 كيلو
http://masrmotors.com/vb/showthread.php?t=73640

[drpepo]

على فكرة صدقنى انما كنت بسوق الادا والفيات وهذه اول مرة اسوق سيارة حديثة واول مرة نجيب عربية زيرو
وعارف الموضوع بيبقى صعب
صيانة القطامية بيقولوا عليها كويسة جدا
ومؤخرا لم اسمع احد اشتكى من الصيانة
ثانيا لاتلتفت الى ما يقول لك اصلها صينى واصلها وفصلها وكل عربية ليها مميزات وليها عيوب وكون اننا في مصر مش بنجيب غير الصينى التعبان دا ملوش علاقة بالعربيات لان توكيل الامل لايعمل شئ سوى انه بيجمع السيارة فقط ودا وفق لمعاير وضوابط مش شغل اى كلام

[eng_amahaay]

سعر اعادة البيع لللوجان هيبقى اعلى بحكم الانتشار الاعلى الحالي ليها في السوق و مع الانتشار اللي ابتدا يبان ليها هتبدتي تعمل زي اللانوس لان الناس ابتدت تزهق من اللانوس و عايزة تجرب حاجة جديدة و انا واحد من دول و عشان كدة اللانوس مبقتش بتبيع زي الاول و توكيلها بيحاول يلحق نفسه بالعروض اللي بيعملها اليومين دول.

اما الـBYD مع انها موجودة من فترة اطول بكتير من اللوجان الا ان توكيل الامل السبب الرئيسي في عدم انتشار العربية مع اني شايفها حلوة اوي من رأي و ده عامل كبير من رأي المتواضع في قرار شراء العربية. انا فوجئت لما عرفت من توكيل الـBYD ان ال F3R الهاتشباك نزلت مصر من سنتين و ما حدش سمع عنها حاجة خالص و مع ان اللوجان حديثة عن ال BYD الا انها بقت موجودة في كل مكان تقريبا ملاكي و ال BYD متشوفهاش كتير الا في القاهرة عشان التاكسي.

[eng_amahaay]

المشاركة الأصلية كتبت بواسطة drpepo على فكرة صدقنى انما كنت بسوق الادا والفيات وهذه اول مرة اسوق سيارة حديثة واول مرة نجيب عربية زيرو وعارف الموضوع بيبقى صعب

هي اول مرة اشتري عربية بس انا سوقت عربيات كتير في الشغل او في البيت و اكترهم كانت الـ128 و اللانوس و الفرنا و اللانسر بومة و الكورولا2007 ومن واقع هذه الخبرة احب اقولك ان صوت موتور الاثنين اللوجان و الـBYD عالي عنهم.

سؤال بقى. انا لو حبييت ابيع عربيتي كمان سنة او سنتين و بناء على و ضع اليومين دول, انهي عريبة هتتباع اسرع و باعلى سعر عن الثانية؟