تيمبرا ولا شاهين

[armia2006]

كلامك صح صدقني ، بس ممكن تقولي رأيك في السيينا كمان لو بحالة كويسة عشان الناس حيرتني بين التلاتة دول
شاهين - تيمبرا - سيينا

[yaso12]

السيينا عربية محترمة ايضا بس التمبرا تكسب من ناحية المساحة الداخلية لانها اكبر حجما واقوى موتور 1.6 والسيينا 1.4 وحجم العربية التمبرا يديها ثبات اكتر وشنطة اكبر وقطع غيار ارخص من السيينا وتكييف التمبرا اثنين ثلاجة يعنى فى مخرج على الكنبة الخلفية فهيكون افضل وحجات تانية فى الكماليات يعنى اعتقد ان السيينا 2 زجاج كهربا التمبرا اربعة .

[samirsaid1]

تمبرا طبعا وانت مغمض بس ياريت تكون 1600 سى سىعشان فيه 1400

[armia2006]

طيب ايه رأيك في السعر
تيمبر موديل 2000 بسعر 35 ألف صاحبها جايبها من الزيرو فابريكة برة وجوة

[yaso12]

والله حكاية فابريقة بره وجوه دى تخليها لقطة .
بس اهم حاجة تكشف عليها كويس وخصوصا من تحت وتتأكد من ان كل كماليات العربية شغالة قدامك ومفيش حاجة اسمها اصل التكييف عايز يتشحن ولا شايل السير فى الشتاء والكلام الاهبل ده . لان لو فى غلطة ذى دى اقل حاجة تصرف 3000 جم ثمن كمبروسر وشحن وخلافه .
ثانيا حالة الموتور كام فى المية وفى ترشيح زيت على الموتور ولا سليم وحالة العفشة والمساعدين والكبالن .
انا بقولك كل ده ليه عشان متقعش وتلاقى نفسك عمال تصرف وثمن العربية وصل فوق الاربعين الف وتقول يا ريتنى ما سمعت كلام حد وجبت وجع الدماغ لنفسى وخصوصا ان وقفتك جنب الصنايعية شبه الحبس الانفرادى وتقتل فرحتك بالعربية.

وربنا يسترها علينا وعليك.