ضبط نسبة الهواء إلى البنزين فى الكربراتير ... ؟؟؟

[وليد القاضى]

اهلا وسهلا بحضراتكم كم يسعدنى التواصل معكم
ان شاء الله هعمل فيديو مفسر عن فك الكربراتير من السيارة ثم عمل صيانة له بالمنزل واحده واحدهوكمان بالنسبه للرسم على السيارة انا بحاول اشتغل فيه دلوقتى بس اليومين دول الوقت عندى محدود واول ما اخلص هصورها واحطها على الصفحه
اما بالنسبه لأول سؤال بصراحه انا معنديش جواب بس علشان خاطر عيونك هسأل واحد فنى فى الموضوع ده واعرف منه بالتفصيل الممل واعرفك
هو فى حاجه مهمه احب انكم تعرفوها انى روحت للصنايعيه كتير جدا والى خلانى اتعلم اصلاح بعض الحاجات هو كتر تكرار الصنيعى فى اصلاح العيب يعنى معندوش ضمير من الأخر دا غير بقى تروح لأى صنيعى يقعدك اربع خمس ساعات اذا ماكنش اليوم كامل على شغلانه بتاخد يدوب ساعه فقررت بقى احل انا محله يعنى بقيت اشتغل معاهم بليه لحد ما قدرت اعرف قدر كبير جدا عن صيانة السيارة الخاصه بى

[zing0]

و مازلنا فى انتظار الأستاذ وليد القاضى, ربنا يرجعهولنا بالسلامه...

بفضل الله ربنا كرمنا و أخدت لفه كمان فى المنتديات الأجنبية (علشان الخواجات معندهمش الفتى بتاعنا) و وصلت لحاجات جديده أحب أشارك بيها.
---------------------------------------------
- كنا عرضنا طريقة ضبط الكربراتير قبل كده
و لكن التجربه العملية كانت أصعب ما فى الموضوع
لذلك عملنا حوار خيالى مع الخواجه إللى اخترع الكربراتير علشان يفهمنا السر فى البتاع اللى واجع دماغنا و مش لاقينله صنايعيه بيفهموا, قال:
مشاكل الكربراتير معظمها بيظهر فى استهلاك بنزين عالى و ريحة عادم و تهبب بوجيهات (طبعاً ده بعيد عن مشاكل أنسداد البيكات و النظافه)
- و دى أسبابها إيه يا باشمهندس؟
أولاً فى ملحقات للكربراتير معظم الأخوه الصنايعية الجهابزة بيلغوا عملها رغم أنها بتعمل فرق كبير (فعلاً يا عم الخواجه, عندى فى اللادا مثلاً أشتريت العربيه و فيها الأدفانس و الفاكيووم ملغيين و الخلاط بايظ)- طبعاً المفروض تشغل و تصلح الحاجات دى و تضبطها.
- بس كده و لا فى أسباب تانى؟
فى سبب كمان, عند المصريين إعتقاد شائع من الجهابزة الفتايين برضه, بيقول لما تلاقى استهلاك عالى تقلل مقاس البيكات, و الغريب برضه أن الناس من طيبة قلبها بتتوهم (او بتحاول تقنع نفسها) ان الاستهلاك قلّ, رغم أن السحب بقى أقل من الأول)...
- طيب نعمل ايه يا عم الخواجه مش عاوزين فتى تانى؟
الكتالوج اللى مسلمنهولك بيقول فى معدل معين لمسمار الهوا و البنزين فى الضبط

مسمار الهواء يكون مفتوح بمقدار نصف لفه من نقطة بداية الضبط (يعنى 1 و نص : 2 و نص لفه) مسمار البنزين يكون أقل من ( لا يصل إلى) 2 لفه كامله

لو مسامير الكربراتير محتاجه تتفتح أكتر , يبقى البيكات إللى راكبه ضيقه و المفروض تركب بيك واسع شويه, و العكس صحيح
هأقول تانى, بتفتح مسمار الهوا مثلاً 3 لفات يبقى البيك عندك ضيق و عاوز بيك مقاس أكبر.
- طيب معلش يا خواجه إستحملنا,برضه الجهابزة بيقولوا لنا أصل مجارى الكربراتير الداخلية و مساراته بتوسع مع الوقت و عاوزة بيك أصغر.
الخواجه بعد نظرة توحى بالغباء قال: مواسير و مجارى !!! عالعموم إللى يوسع يوسع براحته المهم البيك هو إللى بيتحكم فى كمية الهوا و البنزين اللى داخل ( و بصراحه الراجل ريقه نشف من كتر مبيقولنا خليك فى المقاسات الأصلية و احنا كلنا من بنها - أجدع ناس يعنى)
- طيب معلش ياعم الخواجه عاوزين نفهم إزاى بيك كبير (الفابريكا) يوفر بنزين عن بيك مقاسه صغير عن الأصلى؟
قال و بكل هدوء, يا خبيبى (خبيبى مش حبيبى علشان خواجه) أنت بتعوض ضيق البيك الجديد بفتح المسامير أثناء الضبط عدد لفات أكتر, يعنى إللى بتوفرة من هنا بتزوده من هنا, و علشان أأكد لك هتلاقى أعراض البيك الضيق برضه نفس أعراض البيك الواسع (ريحة عادم و استهلاك عالى) و زود عليهم (مفيش سحب)
- و الحل يا عم الخواجه علشان الناس متتوهش؟
التزم ببكات الفابريكا, من الكتالوج أو من طقم الإصلاح للكربراتير أو أسأل فى التوكيل, و برضه مش عاوز أفكرك تتلتزم بمقاسات خلوص التاكيهات علشان دى مرتبطه بشكل مباشر بالضبط.
- فى سرى (خلوص تاكيهات!!! دى عاوزة موضوع لواحده دى الفتى فيها عالآخر), عالعموم متشكرين يا هندسه و منجيلكش فى عربيه عطلانه.

أخابيبى أخاواجه

[zing0]

خلاصة ما توصلت له فى موضوع ضبط الكربراتير
مفيش ميكانيكى بيفهم فى ضبطه, و لو أتضبط يبقى محض صدفه

إدّى العيش لخبازه, و كل متحب تضبطه هتحتاج مشوار للبشمهندس معتز بتاع الكربراتير و الأمر لله
الكسل خسارة

=================
المكنه كانت مبرجله اليومين اللى فاتو, حاولت أضبط و أنضف الكربراتير بالإسبراى, برجلت أكتر, رحت لـ 2 ميكانيكية, بيعملوا نفس اللى أنا بأعمله (بيلعبوا و خلاص) و يلقط الـ 10 ج و المكنه صوتها عالى و سحبها زفت و أول ما تآخد حرارتها الطبيعية تبرجل و تقطع
أضطريت أروح لمعتز , كشف و ضبط و أخد الـ 10 ج بس شغل عن شغل يفرق طبعاً, التخصص حلو يا ولاد, حلال عليه و ربنا يبارك له و يزيده علم و عمل

نقل التجربه للإفادة
و كل عام و انتم بخير