|
#1
10-10-2010, 02:40 AM
|
||||
|
||||
الرفاق حائرون..يتهامسون..يفكرون. .،، الأوفر درايف ما يكون..!!؟؟
في الفترة الأخير اتسأل السؤال ده مليون مرة في أماكن كتيرة جدا وأقسام أكتر بس اكترها كان في قسم النيسان وخاصة النيسان صني لأن الموضوع أصبح متعلق بيها أكتر من أي سيارة أخرى بالرغم من وجود الأوفر درايف في عربيات كتيرة جدا منها النيو أكسنت (وشوفتوا بعيني لأني سوقتها)،والنيسان صني (برده شوفته بعيني) ، والهوندا (بس مش كل الأنواع) ..... إلخ من العربيات اللي فيها النظام ده طيب السؤال بقى اللي هو مربط الفرس واللي هيرجعنا لبداية الموضوع ايه هو الأوفر درايف (Over Drive) لو جينا نترجم الجملة هنلاقيها Over Drive = أكثر من محرك أقراص [حسب ترجمة جوجل] اللي هو ببساطة يعني لو جينا نربطها بالعربية بقى هنلاقي طبعا وبما إن الموضوع متعلق بالجير بوكس او بالقير زي ما بيقول الأخوة العرب أو بالفتيس يعني (وتحيا مصر
 ) معناها السرعات بتاعة الجير بوكس اللي هي الأول ، والثاني والثالث والرابع.... إلخ حسب عدد النقلات اللي موجودة في كل عربية، لحد كده أعتقد الموضوع بسيط ومفيهوش تعقيد ، طيب ياعم الفيلسوف أوك قولنا بقى الخلاصة المفيد يعني!!؟؟ ماشي الموضوع محتاج شوية تأني وعلى رأي عادل إمام (تريثييييييي ولا تتسرعي )الأول احنا محتاجين نبص على النقلات اللي موجودة عندنا في الجير بوكس الأتوماتيك (الفتيس الأتوماتيك) هنلاقي في حاجات كتير في منها حاجات ناس ما تعرفلهاش استخدام ولا تعرف معناها ايه أصلا . طيب ممكن تبطل تنطيط علينا وتلخص وتبطل رغي وتقول المفيد !!؟؟  ماشي اوك بس والله أنا كنت زيكم كده وكنت محتار لحد ما قولت لنفسي وما نيل المطالب بالتمني **** ولكن تأخذ الدنيا غلابا وأنا هفضل أقول ياريت أعرف ياريت حد يشرح ياريت حد يفهمني طب وليه ما أبدأش بنفسي وأروح أدور الموضوع ده أصله ايه وفصله ايه روحت قولت ياواد عليك وعلى ال wiki هناك هتلاقي كل الإجابات مشفية ولا تحتاج سؤال ولا المعلومة تفضل مستخبية ، المهم روحت بسرعة ياواد ياحسين فتحت منها tab واتنين ودورت على أصل الموضوع لقيت إن الجير بوكس بيبقى شكلة حاجة زي كده طبعا الكل عارف إن الـ D بتاع القيادة الـ P بتاع الركن (وده كل ما أشوفه أفتكر محمد هنيدي Parking parking )الـ R بتاع الرجوع للخلف الـ N الوضع المحايد أو الموور طيب الـ 2 والـ L بتوع ايه !!؟؟ أقولكم الـ 2 بتاع التاني يعني يخلي العربية تمشي على التاني بس في بعض عربيات وفي عربيات تانية يخلي العربية ما تجيبش أكتر من التاني بس يفضل ينقل بين الأول والتاني حسب سرعة العربية عادي خالص كأنك عمال تجيب الأول والتاني في الجير المانيوال طيب والـ L ده وظيفته طبعا من غير علام كده إنه يخلي العربية على الأول بس وما تعلاش عن كده مهما دوست بنزين طيب وده لازمته ايه يا ناصح!!؟؟ ده لازمته عندنا مش مهمة قوي هو استخدامه أكتر في أوروبا والدول المتقدمة عشان عندهم تلج حضرتك انما هنا لأ بس طبعا ممكن احتاج استخدمة في مرة من المرات لو أنا قاطر عربية (بجر عربية تانيه) مثلا عشان ساعتها هحتاج عزم كبير وده طبعا موجود في الأول أكتر من أي نقلة تانية، ماشي كمل يا مصدعنا مع إنك ابتديت تبطل لك وتدخل في صلب الموضوع فين بقى الأوفر درايف ؟ ماشي هكمل اهه شايفين معايا الزرار الصغير اللي موجود تحت في عصا الجير بوكس (الفتيس)؟ أيوة الله ينور عليكم اللي على اليمين تحت الزرار الكبير هو ده اللي مسئول عن الأوفر درايف وده الوضع الطبيعي ليه إنه يكون مخلي اللمبة اللي اسمها ( o/d off) مطفية في شاشة العدادات سواء بقى كان بره أو جوه المهم إن اللمبة تكون مطفية وكل عربية حسب نوعها  طبعا في الصورة هنا منورة بس أنا بوريكم مكانها مش أكتر، طيب واحد يقولي اللمبة ديه مش عندي يا نجم ده معناه إني مش عندي Over Drive في عربيتي ؟ هقوله لأ بص معايا الصورة ديه كده خلي بالكم معايا عشان الصورة ديه مهم جدا جدا جدا ومنها هيتضح حاجات كتير  شايفين معايا التقسيم هنا عامل ازاي ؟ في 3 وفي D.4 وفي L.2 دلوقتي بقى نقدر نتكلم ببساطة شديدة الـ D.4 = D بمعنى إن الـ D بيخلي العربية تجيب السرعات الأربعة بتوع جير بوكس وطبعا ده بيتم بالتدريج حسب سرعتك الجير بوكس بينقل نقلته وطبعا الـ L.2 = L + 2 بمعنى إن العربية ديه من نوع العربيات اللي الأول والتاني فيها في مكان واحد بس بينقل بينهم يمين وشمال مش في مكانين وبينقل بينهم فوق وتحت في الجير بوكس اللي في الصورة الأولى طيب يتبقى نقلة واحدة اللي هي الـ 3 = ؟؟؟؟ طبعا أنا شايف هنا ناس شطار جدا فهموا اللعبة وعرفوا 3 = ايه ؟ صح ياولاد برافو عليكم (3 = Over Drive) ولو أخدنا بالنا يا شطار إن لما اللمبة بتنور بيبقى مكتوب ايه (O/D Off) يعني (Over Drive Off) وببساطة كده زي ما النقلة اللي اسمها 3 في الجير بوكس رقم 2 بتخلي العربية على التالت دايما كمان الـ (O/D Off) في الجير بوكس رقم واحد بتخلي العربية على 3 علطول برده وبكده ينتهي درس النهاردة يا شطار ويارب أكون قدرت أوصل المعلومة بطريقة مبسطة ومن غير تعقيد
__________________
  اللهم إنك عفو كريم تحب العفو فاعف عنّا التعديل الأخير تم بواسطة samehsaeed ; 10-10-2010 الساعة 03:02 AM 
|
|
#2
10-10-2010, 02:59 AM
|
||||
|
||||
|
رد: الرفاق حائرون..يتهامسون..يفكرون. .،، الأوفر درايف ما يكون..!!؟؟
شرح ميه ميه يا باشا والله اسلوبك لذيذ زى العسل ..
تشكر يا كبير على الموضوع الخطير ...
__________________
رحـــمـــــــــــة الله عـــلــــــيـــــــك يا حــبـيـبـنــــــــا  ـــــــــــــــــــــــــ ـــــــــــــــــــــــــ ـــــــــــــــــــــــــ ـــــــــــــــــــــــــ ـــــــــــــــــــــــــ ـــــــــــــــــــــــــ ـــــــــــــــــــــــــ ـــــــــــــــــ 
|
|
#3
10-10-2010, 03:01 AM
|
|||
|
|||
|
رد: الرفاق حائرون..يتهامسون..يفكرون. .،، الأوفر درايف ما يكون..!!؟؟
يا جدع دا احنا عبرنا اسهل من كدة
|
|
#4
10-10-2010, 03:04 AM
|
||||
|
||||
رد: الرفاق حائرون..يتهامسون..يفكرون. .،، الأوفر درايف ما يكون..!!؟؟
__________________
اللهم إنك عفو كريم تحب العفو فاعف عنّا
|
|
#5
10-10-2010, 03:08 AM
|
||||
|
||||
رد: الرفاق حائرون..يتهامسون..يفكرون. .،، الأوفر درايف ما يكون..!!؟؟
مع إني مش فاهم قصدك بالظبط بس لو تقصد إن في ناس شرحت أبسط من كده فالحمد لله إنك قدرت تفهم منهم وأنا بحاول أنقل المعلومة اللي عندي وآسف لو كنت ماعرفتش أوصلك المعلومة أما لو تقصد إننا عبرنا القنال يعني في 73 أسهل من شرحي فبرده نفس الرد وتحياتي ليك
__________________
اللهم إنك عفو كريم تحب العفو فاعف عنّا
|
 |
|
|
