سحبوا مني سيارتي الزيرو بعد نصف ساعة من استلامها

[usasoso]

انا مهندس معماري من بنها – مصر قررت اشتري سيارة زيرو و استقريت علي النيسان صني سوبر صالون 2011 و دفعت مقدم 20 الف جنيه مقدم و قسطت الباقي 80 الف علي خمس سنوات مع البنك الاهلي
و اشتريت السيارة من معرض نيسان اوتو ايجيبت في المهندسين - مصر
دفعت المقدم يوم 10/يناير2011 و استلمت السيارة يوم 11 الساعه 8 صباحا و كان معايا مندوب المعرض علشان هنروح نرخص العربية في بنها
لما ادوني ورق العربيه سالت الناس في المعرض انا هروح ارخص العربية في بنها قليوبية حوالي 60 كلم من المعرض هل في مشكلة اني امشي من غير نمر . قاللولي مفيش مشكله خالص معاك ورق العربية و محضر الاستلام و مندوب المعرض و لو فيه اي مشكله او حد وقفك او كلمك وريله الورق هيسيبك علي طول و مفيش مانع تحليله بقه و صدقتهم و اخدت العربية و مشيت ...
خرجت بالعربية من المهندسين و طلعت كوبري اكتوبر و معرفتش انزل كورنيش فنزلت نزلت شارع رمسيس فعلقني السيد مساعد وزير الادخلية مدير امن القاهرة اللواء اسماعيل الشاعر و امر الرجاله بتوعه يجيبو الواد ابو عربية من غير نمر ده ...
طبعا تحاول تكلم مين او تفهم مين انا طبعا احتسبت و توكلت علي الله و قولت مطرح مترسي هدقلها بس اللي حصل انهم عملولي محضر سير بدون لوحات و اخدو العربية مني و حطوها في وحدة مرور معروف و اخدوني علي قسم الازبكية و لما الظابط عرف ظروفي امر الامين انه يخلص المحضر و يوديني نيابه صباحية بدل ما ادخل الحجز . و تم ترحيلي علي نيابه مرور العتبة مقيدا بالكلبشات و لم تفك من يدي الا امام وكيل النيابه الذي امر بغرامه 600جنيه و هي الحد الادني و قالي لازم مكنتش تخرج من المعرض الا مرخص العربية او مركب نمر تجاريه او مؤقته ولما قلتله اني سالت وقولتله اللي قاللولي عليه قالي الكلام ده غلط و عدم علمي بالقانون لا يعفيني من العقوبة . وامر بالافراج عني بعد دفع الغرامه بس رجعو لبسوني الكلبشات مرة تانيه لحد ما ادفع الغرامة و يصدر قرار الافراج عني رسميا و ده حصل بعد حوالي 3 ساعات و طلع ان قرار النيابه لازم يتنفز من القسم فرجعت لقسم الازبيكية و كانو هيلففوني كعب داير برضه لولا الظابط افتكرني و قالهم كفايه كده افرجو عنه و ادوله جواب للعربيه علشان يفرجو عنها في مرور معروف.
كان الساعة بقت حوالي 2:30 تقريبا و جريت علي مرور معروف بسرعه بس دخول الحمام مش زي خروجه . قالولي لابد من اتباع اجرائات الافراج اولا نعمل فحص للسيارة و نبعته يعتمد من نيابه العتبة ثم نرسله لمرور الدراسه و عملت كده و لما وصلت مرو ر الدراسه كانت الساعة بقت 3:45 و الباشوات هناك كانو مشيو و قالولي فوت علينا بكرة و انا طبعا لسا ماسك اعصابي مش عارف ازاي و رجعت مرور معروف اطمن علي العربية و امن حراستها و اظبط الناس هناك لان الناس خوفتني ان العربية لو باتت هناك ممكن تتقلب بس مدير وحدة الحجز كان ظابط محترم و طمني و قالي متخفشي خلص اجرائاتك و تعالي استلمها .
تاني يوم روحت مرور الدراسه من الصبح معايا الفحص و ورق العربية و المستندات كلها اول حاجه طلعو عنيا علي ما قدرو ضريبة العربية و فهموني انها هتضيع عليا لانها مش في المرور اللي هرخص فيه و دي حوالي 340 جنيه و بعد التخفيض لما عرفو ظروفي و صلوها 200 جنيه بس لاني هدفع ضريبه في مرور بنها تاني لما اجي ارخص العربيه . و بعد ما دفعت بعتو الورق كله للمباحث يتاكدو لتكون العربية مسروقه او ان يكون عليا انا شخصيا احكام و خلافه و بعد كده ادوني شهاده افراج اسلمها للناس في مرور معروف و ده كان حوالي الساعه 12:30 وصلت مرور معروف و قابلني مندوب المعرض و معاه نمر تجاريه لانهم قالولنا هناك العربية مش ممكن تخرج من هنا من غير نمر و شهاده افراج . الحمد لله خلصت و خرجت من عندهم الساعة 1:45 و مندوب المعرض كان عازني ارجع العربية المعرض و نروح نرخصها تاني يوم الصبح فرفضت و قولتله يقابلني في بنها تاني يوم علشان انا هروح بيها بنها دلوقتي .
اليوم التالت بدء الحمد لله كويس و رخصت العربية و خلصت الساعه حوالي 12:30 بعد ماطلع عيني و فعلا دفعت الضريبة تاني في بنها .و مندوب المعرض اخدد ورق البنك و صورة الرخصة و النمر التجارية بعد ما ركبت النمر الجديدة .
لما فقت و ارتحت و كلمت المعرض و حاولت افهمهم ان دي غلطتهم حلقولي و قالولي معلشي اصل حظك انت اللي وحش و دي قرف لمؤخذه و كلام فارغ من ده و احنا بقالنا ستمئاة قرن بنبيع عربيات عمر ده محصل مع حد من زبائنهم و علشان متزعلتش و تبقي مبسوط ادوني غطي عربيه و دوسات وسينسور باك عرفت بعدين انهم بيدوهم هديه للعربيات اللي بتتباع كاش ....
كلمت جمعية حماية المستهلك ...ايدك منهم و الارض ملهومشي ايتها لازمة معملوش حاجه مرة رجعو الشكوي لعدم الاختصاص و مرة لاني انا اللي غلطان و المفروض معملشي كده تاني...
كلمت نيسان الشركة و المصنع اعتذرولي اعتذار رقيق و قالولي ان ده متعارف عليه و كلام مفهمتوش تقريبا لاني مكنتش مهيا اسمع غير انهم غلطانين ...
الخلاصه :
1- السير بون لوحات جريمة يعاقب عليها القانون حتي في هذه الحاله ولابد من تركيب لوحات تجارية او مؤقته و لايوجد استثنائات و عرفت ان فيه معارض كتيرة مبتخرجشي العربيات من غير لوحات لحد ماتترخص او يرخصولك هما العربية نظير رسوم و بالمرة لابد من نزع الاستيكر الابيض من علي العربية قبل الخروج من المعرض لان السير بها تغيير ملامح السيارة و ده طبعا في حاله الحوادث و خلافه.
2- لابد من تشريع يحمي المستهلك او يعرفه بالقانون قبل استلامه السيارة لان مش كل الناس بتشتري سيارة زيرو كل يوم ..
3- من يعوضني عن كمية المصاريف و الوقت حوالي 2500ج و ثلاثة ايام عمل
4- و من يعوضني عن الاضرار المعنوية فقد لبست الكلبشات لاول مرة في حياتي لاني اشتريت سيارةجديدة زيرو
5- لو كان ده عرف تسليم السيارات من المسئول عن التعسف معي في استخدام القانون بدون استعمال روح القانون
6- مازلت عند رايي ان المعرض و خصوصا انه موزع رئيسي حيث لا يوجد وكيل في مصر لو اعلمني بانه علي استاجار لوحات او طالبوني بمبلغ نظير استخدام لوحاتهم لفعلت او كنت اخذت السيارة علي مسئوليتي لكن هم لم يفعلو بل ضللوني سواء عن جهل او عن علم و تلك مسئولياتهم تجاة العميل التي انكروووووها تماما و انا غير متقبل اعتذارهم او انكارهم للجريمة في حقي كعميل...
... اسف للاطاله بس لو مكنتش حكيت كنت هطق ...برجاء الافادة و التعليق و اتخاذ مايلزم


م اسامة عبدالفتاح حسن عفيفي
0020123311963
بنها قليوبيه مصر

[memo1100]

الف مبروك انك استلمت العربية وربنا يحرصلك ويكيفك شرها
تانى حاجة هو فى مصر قانون اصلا للمرور انا عارف ان كلها كوسة

ومساعد وزير الداخلية انت لية مروحتش تتكلم معاة وتفهموة الوضع بالظبط
والله ساعات بقول حلال فيهم البلطجية الى بيطلعوا عليهم ويقتلوهم

[usasoso]

http://www.masrmotors.com/vb/showthread.php?t=68109

سحبوا مني سيارتي الزيرو بعد نصف ساعة من استلامها , و كانت نيسان صني من نيسان اوتو ايجيبت
http://www.masrmotors.com/vb/showthread.php?t=68109

[waelfarid]

كدة مصر هي مصر قبل زي بعد
دور الفهلوة من المعرض انه يلبسك في الحيطة قام بواجبه وتسبب ذلك في بهدلة لك تحلف بيها طول العمر
المهم حمدا لله علي سلامتك واحتسب عند ربنا اللي حصلك
بس حاجة كويسة ان الشرطة قامت بواجبها بس معلش جات فيك

ازاي يعني تصريح المشي بدون نمر لمدة 24 ساعة ميخلهمش يسبوك هو احنا اللي بنعمل التصاريح ديه ولا المعارض

انا لو منك اروح ارفع قضية تعويض علي المعرض ده واطلع عين اهلهم