باركولي انا جبت رينو ساندير ستيب واي

[elmahdy29]

المشاركة الأصلية كتبت بواسطة Ashgan السلام عليكم أنا كمان الحمد لله جبتها وكملت 1000 كم خلاص واللون النبيتى برضه هى تحفة جدا جدا لكن النهاردة بالصدفة وأنا جوه العربية نسيت انى قافلة اللوك وفتحت الباب قبل ما افتح اللوك لقيته فتح معايا كررت الموضوع لقيته بيفتح عادى جدا من جوه وكمان الباب اللى الناحية التانية برضه نفس القصة بيتفتح عادى واللوك مقفول انما البابين اللى ورا لا الحمد لله مش بيفتحوا ولما بعت لأدمن صفحة رينو على الفيس ده كان رده :- (أستاذه أشجـــان // السياره رينــــو سانديرو Step Way يوجد بها وحدة تحكم مركزى للتحكم فى غلق الأبواب الخاصه بالسياره ومُجهزه بمفتاح ريمـــوت كنترول ، وعند دخول السياره تقومين بعمل غلق مركزى للأبواب عن طريق الضغط على الزر المتواجد بواجهة الكونسول والذى يوجد عليه علامة (قفل) وسيقوم بعمل غلق للأبواب حتى لا تكون السياره أو قائدها عُرضه للهجوم عليه من خارج السياره ومحاولة فتح للأبواب من الخارج ، وإذا قمتي بفتح باب السائق على سبيل المثال من الداخل سيقوم بفتح قفل الباب ، وبقية الأبواب تظل مُغلقه من الخارج ، و السياره لا يوجد فى تجهيزاتها مانع فتح الأبواب الخلفيه أو الزجاج كالتى تتوفر فى السياره رينــــو سانديرو العاديه بفئة جميع الكماليات أو اللوجان بفئة جميع الكماليات فهي نفس فئة النصف كماليات بالنسبه للسياره رينــــو سانديرو العاديه ولكن بتجهيزات إضافيه مثل العجلات الرياضيه وأنظمة المكابح ABS ... وشكراً للمشاركه "A.S.") ولما سألته سعنى ده مش عيب فيها ده عادى ده كان رده :- (أستاذه أشجـــــان // بالفعل ، سواء كنتى تملُكين فئة النصف كماليات أو فئة جميع الكماليات عند الضغط على الزر السابق شرحه ، سيقوم بعمل غلق مركزى للأبواب حتى لا تكوني عُرضه لمحاولة فتح الأبواب من الخارج ، وعند قيامك بفتح أى باب من الداخل بالنسبه للسياره ستتمكنين من فتحه فقط وبقية الأبواب تظل مغلقه ، فهى ليست مسأله فنيه تحتاج لزيارة مركز الخدمه فمسئول المبيعات الذى قام بعملية البيع كان يتوجب عليه شرح كيفية عمل وحدة التحكم المركزى للسياره وما المميزات التى تعود على قائد السياره من ذلك التجهيز ,,, وشكراً جزيلاً .. "A.S.") بس انا الحقيقة مستغربة الموضوع شوية ممكن حضرتك تجرب الموضوع ده عندك وتقولى فعلا موجود ولا ايه عشان لو كده اروح التوكيل تانى حاجة هل حضرتك بتقفل المرايات لما بتركن العربية عادى ولا ايه علشان برضه الادمن قالى انها غير مخصصة للطى مع انى لما كلمت التوكيل قالى هى تطوى عادى لكن يستحسن مش كتير لانها مش هاتفرق غير 4 سم فى العرض بس لكن انا بضظر اطويها عشان لو ركنت فى الشارع فى حتة زحمة او حاجة برضه عاوزة اعرف رأى حضرتك شكرا جدا ليك وأسفة على الأطالة ربنا يرزقك خيرها وخير ما جعلت له ويكفيك شرها وشر ما جعلت له

مدام اشجان... اهلا بيكي... هو اي عربية في الدنيا السنتر مقفول لما تفتحيها من البابين الاماميين بتفتح... المرايات بتتقفل عادي جدا بس هي ليها نظام... هي مش على محور... فلما تيجي تطويها هاتحسي انها اتخلعت من مكانها وبقيت مقفوله جامد على الجمب... ولما تيجي ترديها هاتلاقي السوسته جامدة وراحت فرداها بقوة... فمتقلقيش... وعموما المرايات مااشاء الله شديدة وبتتحمل اللطش والبهدلة...بالنسب للادمن والناس اللي في التوكيل... كلهم موظفين اداريين معلوماتهم محدودة جدا... مش عايز اقولك اللي اتكلمت معاهم في السيلز واللي باعلي فيهم العربية معلومانه بالسيارات زي معلومات اي مواطن بسيط بالسياسه... كلمتين من الاخبار ومش فاهم دول ايه.. وبس.
ان شاء الله تكون عربية مرضية لينا كلنا
تحياتي

[mrking8]

شكرا يا مايسترو وخليك معانا وافينا بتجربتك مع السانديرو دايما ربنا يكفيك شرها ويباركلك فيها

[epnmasr]

مليون مبروك عليك ربنا يرزقك خيرها ويكفيك شرها

[Ashgan]

متشكرة جدا على ردك وربنا يحفظهم جميعا

[elmahdy29]

المشاركة الأصلية كتبت بواسطة Ashgan متشكرة جدا على ردك وربنا يحفظهم جميعا

يا افندم اي سؤال من اي عضو هنا بيفيدني انا قبل اي حد والله
ةالشكر للمنتدى الرائع اللي اتاح الفرصه ديه لينا جزاهم الله خير