سؤال هام بخصوص السيراتو 2010

[meedo takka]

المشاركة الأصلية كتبت بواسطة joophy الأخوة الأفاضل أعضاء المنتدى عندي سؤال هام بخوص السيراتو 2010 الجديدة بصراحة ان كنت ناوي اشتريها وفى ناس قالو لى ان العربية دى كانت عاملة اعلى مبيعات فى 2009 فى مصر بس لاحظت على موقع كونتاكت كارز ان فى ناس كتير جدا عارضين العربية للبيع برغم انها عاملة كيلو مترات قليل قوى يعنى من 1500 الى 3000 كم فهل يا ترى العربية دى ظهر فيها عيب واحنا منعرفش ولا ايه الموضوع؟ ارجو الافادة من الاخوة الافاضل الخبراء لان الموضوع مقلق بالنسبة لى

بصراحة يا الفاضل انا معايا كيا بيكانتو ومعايا اصدقائى فى العمل معاهم كيا ريو وسيراتو. المهم انا بخبرتى المتواضعة فى قيادة السيارات ان الكيا فيها مشاكل كتير بتظهر واهمها ان الكيا (غير صالحة للسير فى الطرق المصرية) وذلك بسبب خشونة العفشة والتعليق لان الكيا وبدون مجاملة تمتلك اخشن عفشة عرفتها الطرق المصرية فمثلا فى المطبات تسمع صوت دوشة ودربكة بس دة مش معنى كدا ان فى عيب فى العفشة لا العيب فى نظام التعليق للسيارات الكيا عموما من اصغرها لاكبرها واكيد لو حد فى المنتدى معاه كيا هيلاحظ كده وبصراحة انا العربية اللى معايا حصل فيها مشاكل كتير مع ان العربية بقالها معايا سنة واحدة ومنها ترتيلة بالمحرك والمساعد الامامى يمين اتغير وواير الدبرياج اتغير وماكينة الزجاج الامامى اتغيرت والفرامل فيها صوت طقة ومن اهم عيوب الكيا عموما ان الفتيس بتعها فى صوت(ونة) وبذات فى السرعات البطيئة وعلى فكرة ده مش كلامى دة كلام المهندس المسئول عن التوكيل بأبو رواش لانى انا دوخت بعربيتى رايح جاى على التوكيل كذا مرة بسبب الترتيلة اللى بالموتورومحدش عرف يوصل لحل فى التوكيل وفى الاخر قالولى ان البنزين هو السبب اللى عامل كدة بالموتور مع انى مبحطش غير بنزين 92 وطبعا علشان العربية تتظبط قالولى حط بنزين 95 ودة زى ما انتوا عارفين انوا خراب بيوت . المهم علشان مطولشى عليك الخلاصة انا جايب عربية زيرو المفروض طالما بعمل الصيانة فى مواعيدها وبحافظ عليها ميحصلشى الكلام دة كلة صح ولا غلط؟ وطبعا نقول اللى لينا واللى علينا ان توكيل كيا من احسن التوكيلات فى مصر من حيث المعاملة والاهتمام بس ينقصهم الخبرة والمهارة وتشخيص الاعطال نرجع لموضوعنا الاصلى معلش طولت عليك ان الهيونداى محدش اشتكى منها وتعتبر الالنترا فى نظرى افضل من السيراتو من حيث السياره انما التوكيل كيا افضل بمراحل من الهيونداى بس طبعا لا يفيد انى التوكيل افضل من السيارة لانى هامتلك السيارة مش التوكيل . ولو فى اى استفسار عن الكيا تانى انا تحت امرك .واعذرنى على الاطالة اخوك ميدو.

[joophy]

الأخوة الأفاضل
اأولا احب اتوجه بالشكر للدكتور وللاخ ميدو
ثانيا انا بصراحة مكنتش بافكر فى الكيا خالص لانى ليا معاها تجربة أليمة فى الخليج علشان كده انا كنت بأفكر انى اجيب سيات او فولكس (حاجة المانى يعنى) خصوصا ان الاتجاه هنا فى الخليج كله يابانى وانا بصراحة كرهت اليابانى والكورى عربيات ضعيفة وعمرها قصير بس لمل لقيت فى هجوم مصرى على السيراتو فكرت فيها بس دلوقتى واضح ان انا هرجع افكر فى الالمانى تانى . بالمناسبة انا عايش فى الخليج وناوى ارجع مصر نهائى ان شاء الله السنة دى ومعايا لانسر EX الشارك الجديدة بقالى سنتين لو حد عنده اى سؤال بخصوصها انا جاهز للرد.
طبعا يا دكتورنا العزيز مش هوصيك لو عند حضرتك اى تجربة مع السيات او الفولكس يا ريت تتدينى فكرة.

[hazem_khidr]

حتكلم عن نقطه بسيطه من كلام الاخوه الاعضاء
و الجميع اجمع ان الكيا سيراتو عفشتها خشنه
دي نقطع بالذات ما نقدرش نحكم عليها دلوقتي لان العربيه جديده و المعظم لسه في التليين
و اي عربيه جديده بتلاقي عفشتها خشنه و بتبدأ تنعم بعد ال 10 الاف كيلو الاولي
علشان كده بقول ان راحه العفشه مش حينفع نحكم عليها عن الموديل دا ما كملش سنه
و عربيات ملاكي مش شغاله اجره علشان تعمل كيلوات كتير
انا بصراحه لا مع العربيه و لا ضدها و مش متعود اسمع كلام من اي حد و اردده و خلاص
الا لو كانت عن تجربه
و بصراحه لما جربتها مكنتش متوقع منها اكتر من اللي شوفته
يعني علي قد فلوسها برضه يعني محدش يشتريها و يقارنها بالجيتا مثلا!!!

[m_o_sakr]

المشاركة الأصلية كتبت بواسطة joophy الأخوة الأفاضل أعضاء المنتدى عندي سؤال هام بخوص السيراتو 2010 الجديدة بصراحة ان كنت ناوي اشتريها وفى ناس قالو لى ان العربية دى كانت عاملة اعلى مبيعات فى 2009 فى مصر بس لاحظت على موقع كونتاكت كارز ان فى ناس كتير جدا عارضين العربية للبيع برغم انها عاملة كيلو مترات قليل قوى يعنى من 1500 الى 3000 كم فهل يا ترى العربية دى ظهر فيها عيب واحنا منعرفش ولا ايه الموضوع؟ ارجو الافادة من الاخوة الافاضل الخبراء لان الموضوع مقلق بالنسبة لى

بالإضافه الى كل الردود احب اضيف حاجه لاحظتها: فى ناس كتير بتبيع العربيه علشان مش مريحه (ناشفه) و فى ناس كتيييير بتبيع العربيه علشان تكسب!! ايوه يعنى تشترى العربيه و تركبها كام الف كم و تبيعها اغلى مشتريتها علشان تسليم فورى (بالنسبه للوكيل) و فى ناس يتقول انا اجيب العربيه خليجى اجربها و اركبها كام شهر و لو عجبتنى احجز من الوكيل و ادينى راكب دى و لما استلم ابيع الخليجى و مش حخسر فيها علشان عربيه مطلوبه

[aalim]

يا جماعه العربيه زى الفل و تقفيل 10/10 و رأيى الشخصى ان العربيه تحفه و احسن ما فى السوق بالنسبه للسعر (Cost - benefit) لأنك بتحس ان كل مليم دفعته أخدت بيه حقك فعلا و انا ماكنتش بافكر انى ممكن اركب كيا فى يوم من الأيام لكن الدراسه المستفيضه للسوق وصلتنى للسيراتو و فى رايى انها هاتحل محل اللانسر البومه فى السنين القادمه.
استهلاك البنزين اقل من عربيات مانيوال 1600 و سحبها طيارة و تكييفها تلاجه و قطع غيارها معقوله جدا و اسعار الصيانات معقولة جدا و اقل كلمه اقولها عن العربيه: الرضا التــــــــــــام.

و نشوفيه العفشه مش مشكله. طب ما اى حد بيركب عربيات SUV بتبقى عفشتها انشف من السيراتو 10 مرات و مبسوط وبيدفع فى عربيات نص مليون كمان. مميزات التعليق ده ان العربيه لو فيها خمسه و مالى الشنطه كمان لا يمكن بطنها تلمس الأرض و ثباتها عالى.و تجربتى فى الالف الاولى بتقول ان العفشه يتلين نسبيا مع المشى و لو انت بتسوق على الهادى مش هاتعانى خالص و انا بامشى بيها فى طرق مدقدقة كتير و بانزل من غير ما أحس انى مكسر (لأنى تعبان و الله فى فلوسها).

اما عن مشاكل السيارات فتعالى شوف الأوروبى : انا معايا بيجو 206 و حمايا معاه 406 و العربيتين كل شويه فى التوكيل و اسعار قطع غيار نار (تخيلوا طقم بيضات الدركسيون الخارجيه الاصليه ب1200جنيه و طلمبة البنزين ب2000 جنيه و غيرتها 3 مرات فى 3 سنين و طقم العدادات ب5000 جنيه و كل ده موديل 2001). و الجيتا اعرف تلاته اصحاب مضايقين منها و تقيله و واطيه على الأرض و كلهم بيخسروا فى بيعهم خسائر فادحة. حتى اليابانى بدأ يخرف و شوفوا فشل اللانسر الشارك (بسبب الموتور 1500) و الكورولا الجنوب افريقى (بسبب مشكله الاوتوماتيك).

المشكله مش فى العربيات يا اخوانى المشكله فى شوارعنا و قبل كده طريقه سواقتنا. اللى بيقوللك المقص اتكسر على سرعه 180 لما نزلت فى حفرة طيب ما هو لازم يتكسر و تستاهل كمان لأنك انت اللى بتعرض حياتك للخطر. و اللى بيدب و بينزل فى حفر و مش تعبان فى فلوسها ما يشتكيش.

و ببساطه لن تتفق الاذواق: و دايما هنلاقى الرأيين دول جنبا الى جنب:
1. اللى عاجباه العربيه يجيبها و هوه مغمض لأنها تحفه فنيه و افضل ما فى السوق المصرى فى حدود السعر.
2. اما اللى مش عاجباة يبقى ما يجيبهاش لأنها اسوأ ما فى السوق المصرى و اللى بيركبها بيروح النار.

بس خلاص