أوبل أسترا سيدان 2013 !!! ؟؟؟

[hdlhkhgikn]

السلام عليكم ..

أنا قررت أخيراً والحمد لله بعد تفكير لمدة 3 سنين انى اغير عربيتى اللى هى اصلا لانسر بوما 2004 ... وبصراحة كنت خلاص مقبل على شراء التويوتا 2013 بس لما قريت شوية هنا حسيت انى بفكر لسة جوة الصندوق ونفس التفكير المصرى اللى هو ( يبنى هات توتيوتا عشان لما تيجى تبيعها متخسرش) كلنا بنفكر كدة بصراحة بس انا قررت أغير تفكيرى المرة دى وأركب "عربية" بجد مش مجرد عربية اعرف ابيعها .. للعلم انا مليش خبرة كبيرة فى العربيات .. بالعكس انا اصلا فكرتى عن العربيات زفت بسبب ان عربيتى اللانسر جايبها مستعملة من 2006 وطلعت عين اللى خلفونى وصرفت عليها كتير اوى وللعلم بردة مبجربش عربيات كتير لان العربيات مش من هواياتى .. عموما انا مبحبش ابيع ولا اشترى كتير فى العربيات والعربية بتفضل عايشة معايا فترة من الزمن مش اقل من 6 سنين .. انا حبيت العربية الاوبل الاسترا دى لما قريت كلامكم عنها ونزلت اتفرجت عليها النهاردة هى وال 408 الجديدة والاوكتافيا والتويوتا وعجبتنى جدا جدا بس اللى مستغربلة انى ملقتش ال cosmo اللى انا عايز اجيبها بس مش مشكلة مدام انتوا قولتوا كويسة هتوكل على الله وأسمع كلامكم .. انا قررت انى اشترى الأسترا cosmo وأخاطر بكل ما املك فيها .. انا مش من مستخدمين الاوبل خالص واول مرة اركب عربية ملهاش بيع فى مصر اوى وبصراحة خايف يبقى اختيارى خاطىء بسبب تقييمات سمعتها هنا .. انا مش خايف انا مرعوب بصراحة .. يا حضرات لو سمحتوا ممكن حد يطمنى شوية عن العربية دى ويقولى انى مش هرمى فلوسى فى الارض وانا بأمانة هاخد كلامة ثقة طالما هو بيفهم فى الاوبل او فى العربيات عموما .. اسف على الكلام الكتير وأتمنى حد يفيدنى .. شكراً

[عمرو الامير]

خالى هيجيب واحدة عربية فوق الوهم

واى حاجة جديدة اكيد هتخسر لو فيرنا

االاستمتاع بالعربية حاجة تانية

[fadymedhat]

الاسترا عربية ممتازة....و انت ماشى بيها تحس انك راكب عربية محترمة....و لما تبيع هتعرف تبيعها لان كل عربية ليها زبونها....

[د/محمود عبدالمقصود]

خد بال حضرتك انا رحت لموزع اوبل هنا في الاسكندريه ((الكموني)) و قالوا لي ان الاسترا سيدان انجوي تسليم فوري و سعرها 155الف لكن الاسترا كوسموا تدفع حجز 20الف و عند الاستلام بعد شهرين تقريبا السعر حيزيد من 167الف الى 180 الف و غصبا عنك حتدفع الزياده

[Marlborooo]

بص انا مش متفق معاك في رأيك واختلاف الرأي لا يفسد للود قضية
العربية عبارة عن استثمار فلوس كده كده العربية هتخسر لما تيجي تبيع بس يكون في حد ادني للخسارة دي نقطة
النقطة التانية لما احب ابيع العربية مقعدش ادلل ليها علي زبون ، لما افكر ابيع الاقي الف زبون بسعر مناسب

حاجة كمان العربية اللي مش منتشرة تجبرك انك تعمل الصيانة في التوكيل ، ولو لا قدر الله احتاجت قطع غيار فانوس او مرايا هتشتري من التوكيل السعر اللي يقولك عليه ( ان كان عاجبك ) والتوكيلات في مصر سيادتك فاهم انهم مش مستغلين وجهاز حماية المستهلك صحيلهم هههههه

توكيل اوبل بوجه عاام يعتبر غالي كقطع غيار بشكل زايد شوية

رأيي المتواضع لو سيادتك عجباك العربية تشوف قطع الغيار والصيانات اسعارها ايه في التوكيل ومناسبة ليك ولا لا
الحاجة التانية تأمن عليها تأمين شامل

او ممكن تفكر في بدايل تانية

بخصوص اعتمادية العربية وكويسة ولا لا بصراحة مقدرش افيدك من قال لا اعرف فقد افتي