انا من شباب التحرير

[ahmed1981]

متابع بشدة ربنا يباركلك يا أبو سهيلة

[mesho70]

الحمد لله على سلامتك يا بطل
ومتابع بإهتمام
وان اسكن على بعد امتار من احد اقسام الشرطة وعشت ايام وساعات صعبة جدا ً تحت وابل من القنابل المسيلة للدموع واحتفظ ببعض منها وكنت داخل شقة مقفلة مع تشغيل المراوح والشفاطات واحيانا ً التكيفات وكنت اظن انى عانيت !!!!
ياااااااة دا انت حسستنا اننا كنا معاك وربنا يجازيك خير
ويرحم شهدائنا

[ابوسهيلة]

السلام عليكم ورحمة الله وبركاته

معلش انا اتأخرت شوية
المهم انا عايز ادخل معاكوا في احداث الاربعاء الدامي
بس هذكر حدثين مهمين قبل احداث الاربعاء
وانا فاكر تاريخهم بالشبه بصراحه

الاول هو احداث وزارة الداخلية
والثاني هو الطائرات الحربية

المهم ان انا بدأت الاعتصام من ظهر يوم السبت 29 يناير
وكنت في نشوة الانتصار عندما رأيت قوات الجيش وهي مسيطرة علي مجلس الشعب والشوري ومجلس الوزراء ومش بس كده
دول سمحوا للشباب انهم يتمشوا في شارع مجلس الشعب بحرية كاملة
وانا للاسف في هذه النشوة اتصورتي لصورتين مع الدبابات واتصورت صورة نادرة في شارع مجلس الشعب وانا لواحدي تماما في الشارع مش مهم الكلام ده
وعلي الرغم من ان الاجواء كانت لازالت ملبده بدخان القنابل المسيلة والارض عليها الاثار
لدرجة اني وانا كنت بصلي العصر وسجدت علي الاسفلت فضلت جبهتي بتحرقني اكتر من ساعة متخيليين الوضع كان عامل ازاي
ومش عارف انا كنت حاسس في يوم الجمعة انها مش قنابل مسيلة بس ولكن قنابل اعصاب لان ساعات مكنتش بقدر اقف علي رجلي من القنابل دي وبقصد يوم الجمعة مش السبت

المهم اني كنت بسمع ضرب نار متصل عند وزارة الداخلية ولكني كنت شايف انه ملوش لازمة ان احنا نحتل وزارة الداخلية علشان كده مهتمتش ان اروح هناك ولكن مع وصول اخبار بزيادة القتلي قررت مساءا اني اروح اشوف الوضع لقيت تقريبا عدد قليل جدا لايتجاوز 200 شاب
وسبحان الله اول مارحت لقيت عملية غريبة جدا من مجموعة من الشباب للانتقام من الوزارة
العملية مجموعة جابت عربية شرطة ووضعتها قدام عربية ملاكي وساقو الملاكي علشان تزق عربية الشرطة علشان يأخذوها ساتر وليقتحموا الوزارة وفعلا وصلت العربية لباب الوزارة وولعوا فيها لكن النتجة للاسف ثلاثة قتلي من الشباب وكانوا دول اخر شهداء من الشباب قدام الوزارة حيث وصل العدد اللي استشهد قدام الوزارة 13 شهيد في يوم واحد اجتمعوا كلهم بالاضافة للمصابين في مسجد او بالاحري ساحة للصلاة بجوار شارع باب اللوق وبالقرب من الميدان والجميل ان الجامع ده اتحول لمستشفي ميداني كامل داخل الميدان بعد كده
فيه كل التخصصات والادوية وده من اجمل الحاجات اللي حصلت في الثورة انشاء مستشفي ميداني سريع والتطوع السريع للاطباء والمسعفين والصيادلة والمتطوعين المختلفين

تاني اليوم الصبح يوم الاحد يعني الجيش طلب مننا ان محدش يروح ناحية الوزارة لانه هيحتلها وفعلا حصل كده وبعد كده سمح بدخول الناس شوية وبعد كده عمل منع كامل

وفي نفس اليوم ده البرلمان الشعبي كان عامل اجتماع وعمل اذاعة وكلمات وغيره ولكن في ظل الكلمات دي لقينا طيارت حربية تحلق علي ارتفاع منخفض جدا طيارات حربية مش هليكوبتر عمري ماشوفتها الا في التلفزيون وصوتها مرعب جدا ولكن علي مين الشباب اتحدوهم بطريقة جميلة قالوا كلوا يقعد كلوا يقعد في نوع من التحدي الجميل
لكن الطايرات قعدت تلف وتيجي فوقينا لمدة عشر دقائق تقريبا وبارتفاع منخفض جدا جدا جدا

الامر اللي خلي بعض الشباب يقلق ويطلع في الاذاعة يهدد القوات اللي موجودة داخل الميدان
مما جعل الظابط المسئول عن القوة داخل الميدان يطلع يقول بيان من القوات المسلحة داخل الميدان ويؤكد ان الطايرات دي لو ضربت والقوات داخل الميدان يبقي قولوا علي مصر السلام وامريكا هتدخل البلد بعد نص ساعة من الضرب من وجهة نظره وانه لو حصل كده هوا اول واحد هيضرب معانا وان ممكن نسمع صوت تكسير وانفجارات للزجاج نتيجة احتمالية كسر الطايرات حاجز الصوت فمحدش يخاف وبعد البيان ده الطايرات بدأت تختفي من الاجواء ورجعنا لبيانات المؤيدين للثورة في الاذاعة

انتظروا الاربعاء الدامي اطول واصعب ايام الثورة

[ابوشروق]

حمدلله على سلامتك متابع بشده لمعرفة الحقائق الى الاعلام المصرى كان مخبيها علينا ومبروك النصر

[حسام البورسعيدى]

متابع بشغف شديد جدا واتمنى لو فى عند حضرتك صور للاحداث ترفقها مع الموضوع ...

بصراحه مش عارف اقول ايه فعلا انا كنت بتمنى انى اكون فى التحرير وكنت مصاب بحسره شديدة انى قاعد فى بيتى قدام التليفيزيون (قناة الجزيرة طبعا مش التليفيزيون المصرى اللى كان بيخدر الناس) ...

ولكن حاجتين منعونى من السفر للتحرير ... اولهم انى معرفش حد فى القاهرة نهائيا ومليش اى اقارب هناك اقدر ابات عندهم او الجأ ليهم فى اى ظرف ..

ثانيا اشفاقا باهلى اللى كانوا هيموتو من الرعب لما حسو انى بفكر اسافر التحرير ...

فاكتفيت آسفا انى افضل قاعد 24 ساعة قدام التليفزيون حتى وانا نايم كنت بسيبه مفتوح جنبى ..