ماسبب اشتعال الاحداث فى التحرير ومصر كلها فى رأيك؟

[hazem_khidr]

المشاركة الأصلية كتبت بواسطة sam ram عمل كل المطالب !!!! ممكن تقولي ايه المطالب اللي عملها ... طيب انا حقولك على مطلب واحد معملوش البرلمان مزور و غير شرعي و كلنا عارفين وده احد اسباب الثوره لم يقم بحل البرلمان وانما كلفه بالتصحيح ... عارف التصحيح ده حياخد اد ايه ... 75 يوم من بوق فتحي سرور سمعت فتحي سرور النهارده قال ايه في العربيه انهم حيدرسوا التعديلات الدستوريه ... ولما اتسأل عن الطعون في شرعيه البرلمان و التزوير ... قال انها بتاخد وقت طويل يعني سيادتك اللي حيقر التعديلات الدستوريه هما نفس شله البرلمان اللي هما نفس الشله اللي بعتت الناس الهتيفه تضرب في ميدان التحرير ... طيب لما هو عارف ان البرلمان مزور ... سايبه ليه ؟؟؟!!!!!! في حاجه وصلت ولا نقول كمان ... انا ممكن ارد على كل كلمه بس مش حنخلص بس عايزك تقولي هل من وجهه نظرك من الصح انه يحل البرلمان المزور .. و لا يسيبه لضميره يصحح نفسه

ماشي انا معاك في كل دا و مش معترض
لكن هل الحل انه يمشي دلوقتي؟؟؟؟
يعني علشان نموت القبطان نقوم نغرق السفينه كلها؟؟!!!

[Explorer]

المشاركة الأصلية كتبت بواسطة احمد الشناوى1981 السبب الرئيسى فى اشتعال الاحداث هو غباء النظام فى التعامل مع حجم الأحداث كعاده النظام فى البدايه استخدم كل الطرق العنيفه لترويع الناس علشان يخلص منهم مع التعتيم التام على الموضوع فى وسائل الإعلام المصريه طبعا النتيجه كانت عكسيه لأن الناس كانت حاسه بحجم المشكله الى هما داخلين عليها فى حاله استمرار فيلم التوريث و السرقه الى بقت ماليه البلد و كل واحد من الحراميه واخد وزاره و بيشتغل لحسابه فالناس قالو خلاص مفيش مفر و لازم نغير ده بالقوه و طبعا الاعداد الى طلعت يوم الجمعه ارعبتهم وعرفو ان لا الشرطه نفعت و لا حتا لو ضربوهم نووى الحل كان فى خطاب يقول فيه الريس ان الدنيا خلاص شكلها هيتغير وطبعا الكلام كان حنين قوى يخليك تعيط و الراجل يصعب عليك فى نفس الوقت الحزب الوطنى يخرج الناس بتوعه يهتفو للريس مع الاعلان عن المسيره المؤيده للريس فى ميدان مصطفى محمود يقوم الناس الى عيطو لما سمعو الخطاب يروحو يهتفو مع الجماعه بتوع الحزب الوطنى فى نفس الوقت النواب بتوع الوطنى ال98% كل واحد فيهم دافع دم قلبه علشان يدخ المجلس الموقر و لسه ملمش الفلوس الى خادها و لا عمل الكام مصلحه الى كان ناوى عليهم فقالو خلاص مش شويه العيال الى فى التحرير دول هما الى هيطلعونا من المجلس طيب نجيب بقا الراجاله بتوعنا ونرحلهم نربيهم و طبعا البلطجيه بتوع الحزب الوطنى كلكم شوفتوهم فى انتخابات مجلس الشعب فراحو وحصل الى الناس كلها شافتو فى نفس الوقت الاعلام المصرى بيفهم الناس وعمال راكب على دماغهم ان الناس الى فى التحرير دول عملا و ان اسرائيل و قطر ومش عارف مين هما الى مخططين للفيلم ده يقوم يخلى الناس الى عيطو من خطاب الريس مع بتوع الحزب الوطنى يروحو يحدفو الناس الى فى ميدان التحرير بالطوب و البلطجيه شغاله بالملوتوف و السنج و السيوف و الحصنه والحمير من ناحيه تانيه انا متهيئلى اليهود الى فى اسرائيل مقدروش يعملو الفيلم ده و لا يخلو المصريين يضربو فى بعض بالشكل ده حسبى الله و نعم الوكيل

[sam ram]

المشاركة الأصلية كتبت بواسطة hazem_khidr ماشي انا معاك في كل دا و مش معترض لكن هل الحل انه يمشي دلوقتي؟؟؟؟ يعني علشان نموت القبطان نقوم نغرق السفينه كلها؟؟!!!

طيب يعني لو لو وافته المنيه في اي لحظه ... البلد حتغرق ...
دا عنده 82 سنه يا حازم
يا رب اشوفك كده عندك 80 سنه و بكامل لياقتك و صحتك

هو مش كان تعب و راح عمل عمليه بره واخد عيلته معاه ووزير الصحه و قعد فيها اد كده بره البلد...
غرقت ساعتها و لا خربت ولا حتقولي كان بيتابع البلد و يدي القرارات المصيريه من غرفه النقاهه


يا عم حازم دي بلد ... مش مركب ... و لا سوبر ماركت

عموما انا مبقولش انه لازم يمشي ... لكن على الاقل يعمل اصلاح حقيقي و قرارات سريعه ..
مش خطبه عاطفيه تهفهف القلوب و تبكي الاعين ....

[MIDO-SPICY]

[QUOTE=koashraf;350434]

المشاركة الأصلية كتبت بواسطة nktis انا بعدي علي 3 كماين الاهالي عملنها ... بقلهم والله احنا اجدع من الحكومه ..بقي الشرطه كانت بتحمينا كده ... مع احترامى للكماين دى وهى وسيله اهليه فعاله حالياً....بس الوضع ده لابد ان ينتهى ان عاجلاً أواجلا ...لان الامن المفروض انه مش مسؤليه الاهالى. بالاضافه الى ان الناس اللى فى الكماين مش حايسيبوا شغلهم ويتفرغوا للكماين ,,, لابد ان يعود الامن الطبيعى مع تصحيح الاخطــــــاء...

انا عايز اقولك يا اشرف ان الكماين اللى احنا عمالين نشيد بيها على مستوى مصر كلها بدا ان يتحول بعضها الى اعمال شغب وعنف
كل واحد فاضى بقى ومعاه سكينه ولا شومه صدق انه لوا وواقفين يبهدلوا فى الناس ومن امثله دا ودا حصل معايا انا شخصيا
انا امبارح ماشى بالليل فى المنطقه بجيب دوا لبنتى
لجنه شعبيه وقفتنى
اللجنه : رخصك
انا : طيب قول يا عم اى حاجه مساء الخير سلام عليكوا
اللجنه : رخصك
انا : طيب ............ ورحت مطلع الرخصه
اللجنه : افتحلنا الشنطه
انا : حاضر ............. نزلت وفتحت الشنطه
واثناء ما واحد راح يفتشها جالى اللى معاه الرخص وقالى بس الرخصه دى منتهيه
انا : يعجبنى ذكائك على فكره ممكن ادفع الغرامه فورى مش لازم تسحبها وماتنساش تحت فى المخالفه كمان ان العربية فيها فاميه ( كنت بتكلم معاهم بنوع من التريقه والاتفزاز ليهم )
اللجنه : اتفضل يا بشمهندس
انا : سلام عليكوا

[hazem_khidr]

بالضبط احنا متفقين دلوقتي علي المبدأ
و دا حيحصل حيحصل صدقني
وزير الداخليه الجديد معندوش ياما ارحميني و راجل شديد جدا
و لازم حيلم البلطجيه دول كلهم علي الاقل يملأ السجون
و يرجع الامن تاني للبلد
انا دلوقتي اخاف اسافر علي الطريق بالليل ولا امشي لوحدي في الشارع زي زمان
و بعد كده حنبدأ نهدي و نشوف
انما البلد دلوقتي لو الريس مشي حتولع و مش حنعرف نطفيها
و واحد زي البرادعي حيدخل و اللي عاوزين يمسكوا الحكم كتير
و حتلاقي كل شويه ناس طالعه تقول مش عاوزين فلان و هاتوا علان
و حاجات من دي كتير و حنعيش في حرب اهليه مش حتنتهي