ارحموا السيراتو شوية؟

[MANDO09]

المشاركة الأصلية كتبت بواسطة sam ram بصراحه يا استاذ بدر انا مكنتش ناوي اتكلم خالص في موضوع السيراتو ده .. لأني شايف انه موضوع ملوش اي لازمه الكلام فيه .. واحسن حل التجاهل التااام اللي عجباه العربيه يفرح بيها و ربنا يبارك له فيها .. و اللي مش عاجباه وماله ... عنها ما عجبته ... براحته خالص الغريبه ان السيراتو هي اللي بتتقلب ومقصاتها بتتكسر و الكارينز اللي تعتبر مين فان واتقل منها مسمعناش عنها حاجه !!! ما علينا انا اساسا كنت داخل عايز اقولك مبروك على الالنترا وتستلمها على خير ان شاء الله وبما اننا شاركنا فعلى رأي شيرين في المتزوجون "طب ما الفول من الطعميه و الطعميه من الفول " يعني السيراتو و الالنترا زي الفول و الطعميه ... الفرق كله في السلطه والعربيتين زي الفل يا باشا و خيار موفق ان شاء الله الف مبروك مره تانيه .. وربنا يديك خيرها و يكفيك شرها

اتفق فى كل كلمة قالها أ/سام رام بالذات فى مباركته للاستاذ بدر

[Devill Blood]

بص مع فائق أحترامى أنا هاقولك عن عيوب العربية بصراحة

1-صاجها ضعيف جدا ومحدش يقولى ما كل العربيات كده لا ياجماعة دى صاجها ضعيف جدا
2-سعرها عالى أوى على تمنها يعنى حرام أدفع 120 ألف جنية تمنها دى تمن لانسر 1600
ناقصها كماليات كتير واحد قريبى معاه العربية مفهاش سنتر لوك ولا جنوط مع إنى معايا لانسر 1300 جى أل وفيها سنتر لوك
3-العربية يعنى مش ذى اليابانى لكن عربية محترمة
4-الخامات جيدة إلى حد ما ولكن لا ترقى لسيارات أخرى
5-التصميم أصلا يا أستاذى مسروق من هوندا
لكن بصراحة المجمل عربية خطيرة شكلا ومضمونا وعشان كده نجحت وأنا شايف الهجوم الحد ده من الأعضاء اللى مش معاهم زيها وأنا فكرت أبيع اللانسر وأجيبها ولكن رجعت فى رأى عشان خوفى من الكورى

[احمد شوغى]

احسن من الانسر الف مره بلا مقارنه وعن تجربه والعربيه اللى بـ120 الف كماليات رهيبه مش ناقصه شىء واللى بـــــ 98 الف فيها كماليات اكتر من اللانسر

[مهند سالم]

طبعا أنا أتفق معك تماما إن الكلام على السيراتو كثير فعلا، وده راجع إنها عربية ناجحة ومنتشرة، لكن للأسف السبب الرئيسي في انتشارها كان شكلها الجديد والجذاب والهجومي، وكمالياتها إلا هي فعلا كثيرة. وده خلى كثير من الناس إلا بتهتم أكثر بالجودة والمتانة تتساءل لماذا انتشرت هذه السيارة كل هذا الانتشار، طبعا التساؤل ده بناء على إنهم شايفين إنها عربية عفشتها غير جيدة، وصاجها ضعيف، وخامتها قليلة الجودة، وبالتالي فسعرها مبالغ فيه. هو ده سبب الخلاف.
لكن في النهاية هي عربية كوري بعيوب ومميزات الكوري، وأنا أتفق مع الأخ إلا قال، هي والالنترا زي الفول والطعمية، في النهاية المحصلة واحدة، زي الخلاف القديم المشهور بين الفيرنا واللانوس، برده الفول من الطعمية والطعمية من الفول.
لكن أنا لا أتفق مع حضرتك -طبعا مع حبي واحترامي الشديد لرأيك- إننا نقفل أي كلام في أي عربية؛ لأن الكلام زي ما فيه المبالغ فيه فيه حاجات وتجارب كثير مفيدة، فخلي الأعضاء يتكلموا ويقولوا رأيهم وحضرتك كراجل ليك خبرتك بتقدر تقدر الكلام العاقل الموزون المبني على تجربة حقيقية من الكلام المبالغ فيه المبني على العواطف والآراء الغير مبنية على تجربة قوية.
وفي النهاية أشكرك جدا

[elmohamedy]

احسن عربية من كيا سول