سيات ابيزا موديل 2006

[mohamed ibiza]

المشاركة الأصلية كتبت بواسطة ice_wolf انا ركبت الجولف من زمان مش فاكر كمالياتها خصوصا اني مش بهتم بموضوع الكماليات و كده انا اغلب اهتمامي بيبقي في الصوت و الموتور و هكذا صوت الموتور بتاع الابيزا لية زنة كدة فى الجرى وبيجرى العربية حلو ولا اية النظام وياريت اسم الموتور بتاع الابيزا وكمان انا بشوف الموديل قليل مش موجود لية بتاع الابيزا وكمان العربية تحس انها عادية كدة وهى ماشية ملهاش صوت كدة فحبيت اعرف منك طبعا على سرعات مش عالية انا سمعت ان بتنزل بموتور جولف جولف اية مش عارف فياريت تفيدنى شكرا على تعبك الابيزا فئة و الجولف فئة الابيزا ادائها اعلي و شكلها مختلف و موديل احدث و الجولف اوسع من الابيزا من جوه شوية و هابطه علي الارض اكتر من الابيزا توكيل الابيزا احسن من الجولف.......

مشكور والله على مشاركتك وايفادتى بالمعلومات ووانا خلاص رسيت على الابيزا
لان انا اهم حاجة عندى العلو عن الارض وبلنسبة لكماليات الابيزا موديل 2006 بتيجى باية ويالريت اعرف سعرها كام جديدة واية نظام التقسيط مع التوكيل او البنك بدفع مقدمة كام ولو مستعملة استعمال نضيف تعمل كام و2007 بردة [/QUOTE]


موتورها حلو و جراي موتور الابيزا ال 1400 هو موتور البولو مش موتور الجولف هو نفس مواصفات موتور الجولف لكن هو موتور البولو الدفعات اللي نزلت منها اساسا قليلة مش كتيره

مفيش حاجة اسمها ملهاش صوت و هي ماشيه اركبها و سوقها عشان تتعرف علي موتورها الاول

مش كل الابيزات بمواتير جولف في حاجة نازله بموتور الجولف و حاجات بموتور البولو ال2006 1400 ده بولو ال 1600 الزيرو ده موتور الجيتا و الجولف

عشان متقولش اني قلتلك حاجة غلط الابيزا مش عالية عن الارض الابيزا عربية سبور و مما يدعم ثباتها انها واطيه انا بقول الجولف اوطي منها مش بقول الابيزا عالية و الجولف واطيه

مش متابع اسعار السوق دلوقتي فا مش هديك اسعار و تطلع غلط

نظام التقسيط انزل لحد معرض جامعة الدول او رمسيس هيدوك التفاصيل كاملة لان اكيد فيه كذا نظام لمختلف الوظائف

مشكور يا محمد على المعلومات وانا كونت فكرة عنها بس كان ليا سؤال لو انا بقارن بين الابيزا موديل 2007 والميجان 2007 اية الافضل فى القطع الغيار المعمرة فى اداء العربية فى الكماليات فى الامان فى قوة تحمل للشوارع فى مصر وهل الابيزا اغلى فى قطع الغيار واقل حاجة بتحتاج اروح للتوكيل لانى خلاص احترت من النوضوع دة وشكرا حضرتك تنصحنى باية

وكل سنة وانت طيب وشكرا على الافادة

[mohamed ibiza]

المشاركة الأصلية كتبت بواسطة ice_wolf مشكور يا محمد على المعلومات وانا كونت فكرة عنها بس كان ليا سؤال لو انا بقارن بين الابيزا موديل 2007 والميجان 2007 اية الافضل فى القطع الغيار المعمرة فى اداء العربية فى الكماليات فى الامان فى قوة تحمل للشوارع فى مصر وهل الابيزا اغلى فى قطع الغيار واقل حاجة بتحتاج اروح للتوكيل لانى خلاص احترت من الموضوع دة وشكرا حضرتك تنصحنى باية وكل سنة وانت طيب وشكرا على الافادة

الابيزا فئة مختلفة عن الميجان الميجان سيدان عائلية او الهاتش منها تنتمي لفئة الجولف و الليون و الابيزا عشان تقارنها بالميجان يبقي لازم نتكلم عن الابيزا ال 1600 لان لو قارنت الابيزا 1400 بالميجان المقارنة هتبقي ظالمة جدا للابيزا لان موتور الميجان اقوي منها بكتير ال1400 85 حصان و الميجان 1600 115 حصان

لو هنتكلم عن ابيزا 1600 و الميجان الهاتش

الابيزا 1600 105 حصان

الميجان 1600 115 حصان

الميجان لا خلاف علي ادائها و قوتها و رشاقتها علي الطريق لانها بتتمتع بأيروديناميك جبار مع الوضع في الحسبان وزنها التقيل 1350 كيلو تقريبا للسيدان الهاتش اقل حاجة بسيطة

الابيزا فيها موتور قوي علي حجمها و وزنها (1130 كيلو) يعني اخف من الميجان بكتير لكن الحق يقال رغم تمتع الابيزا بقدر عالي من الايروديناميك الا ان الميجان تتفوق عليها في الجزئية دي

و طبعا بالنسبة للكماليات الميجان كمالياتها كتير جدا الابيزا ال1600 (فتحة سقف كهربا-مرايات كهربا-راديو كاسيت cd mp3 4 الازاز كله كهربا و فيه وان تاتش 6 سماعات 2 ايرباجز ناقل حركة تيبترونيك و abs و هكذا

الثبات حدث ولا حرج الابيزا ثباتها ممتاز و الميجان ثباتها ممتاز

قطع الغيار و عمرها بصراحة و مش تحيز مني في ميجانات ماشيه كيلو مش كتير يعني اقل من 100 الف و غيرت حاجات الابيزا مغيرتهاش و عموما الالماني اعتمادية عالية و الفرنساوي كذلك بس الالماني متفوق في الاعتمادية عن الفرنسي

الابيزا مش اغلي في قطع الغيار

و مش لازم تعملها صيانة في التوكيل اصلا ممكن تمشي مع محمد سمير في صيانتها او اي مركز خدمه كويس و خلاص انما مش معقدة زي الميجان لان الميجان فيها الكترونيات كتير جدا و كمبيوتر غريب شوية و محدش بيعرف يتعامل معاها غير التوكيل

مشكور يامحمد على المعلومات بس انت لو مكانى ترشحلى اية خصوصا ان انا بشوف الميجان اكتر من الابيزا سواء 2006 او 2007 فهل دة لية علاقة طبعا مش الكفاءة انا بقصد سهولة وجود قطع غيارها وتوفرها وياريت لو اعرف سعر الصيانة فى التوكيل وهل تنصحنى بالابيزا ولا الميجان

[mohamed ibiza]

المشاركة الأصلية كتبت بواسطة ice_wolf مشكور يامحمد على المعلومات بس انت لو مكانى ترشحلى اية خصوصا ان انا بشوف الميجان اكتر من الابيزا سواء 2006 او 2007 فهل دة لية علاقة طبعا مش الكفاءة انا بقصد سهولة وجود قطع غيارها وتوفرها وياريت لو اعرف سعر الصيانة فى التوكيل وهل تنصحنى بالابيزا ولا الميجان

الميجان حاجتها موجودة بس غالية و الابيزا حاجتها موجودة برضه و اقل من الميجان في الاسعار

سعر الصيانة يتعرف من ملاكها اللي عملوا صيانتها في التوكيل انا معرفوش بصراحة

عشان اجاوبك علي السؤال ده يبقي هفترض انك هتجيب ابيزا 1600 زيرو عشان منظلمش الابيزا في المقارنة و الاختيار صعب بس انا عن نفسي افضل الابيزا لاني فاهم فيها و عارف نظامها و هتديني اللي انا عايزه اينعم الميجان كمالياتها اكتر بكتير بس الابيزا هتديني الاوبشنز اللي انا عايزها مش محتاج اكتر من كده

اما لو ابيزا 1400 فا الميجان تتفوق في الاداء طبعا بس الابيزا تتفوق في استهلاك البنزين الاقل و الضريبة الاقل للترخيص