رابطه ( قول معاك كام و انا اقولك تجيب ايه بفلوسك )

[YahiaAshraf]

المشاركة الأصلية كتبت بواسطة elnopy2005 السلام عليكم انا معايا من 40 الى 45 كنت بفكر فى اسبرانزا 516 بس مش عارف ايه موديل ايه وهل هيا عربية تستاهل ولا ايه ولا جولف 3 احسن ومش عارف اعمل ايه كان معايا لانوس 1 ومعروض عليا جوليت 99 على 40 الف انهى احسن ممكن ترشحلى

السعر ده يجي موديل 2007 من الاسبيرانزا a516
هى عربيه حلوه بس فى المستعمل منها بالذات لازم تنقى حاجه استعمال ممتاز

بنفس التمن عندك الاتى :-
هيونداى فيرنا 2004 - 2005 تقفيل كورى
رينو كليو 2004 - 2005
فيات سينا 2004
فيات باليو 2006
فيات بيترا 2004
تحياتى

[YahiaAshraf]

المشاركة الأصلية كتبت بواسطة nooragha22 مبلغ 25000 الموتور من 1300:1500

ستروين ax موديل 98 موتور 1400 سى سى

ده بس اللى متوفره باقى الموديلات معظمها 800 سى سى او 1000 او 1100

تحياتى

[shosho alaa]

المشاركة الأصلية كتبت بواسطة yahiaashraf بص حضرتك العربيه دى سعرها مش اقل من 35 الف سعرها كده غريب و مقلق ممكن يكون عارضها كده لسبب ممكن تكون كانت عامله حادثه او مقلوبه وعلشان كده رشت كلها و طلها رش العربيه كلها بيقلل جامد من سعر العربيه فاول لما حضرتك تتصلى بيه اول سؤال :- هى العربيه رشه من جوه ام لا * ليه سعرها رخيص كده ( ايوه لازم نوجه السؤال ده ) علشان نفهمه غير كده عند الكشف على السياره يبقى مع حضرتك ميكانيكى تثقى فيه يكشف بالكامل عن السياره وهو اللى هيحدد العربيه كويسه ام لا تحياتى

الف شكر بس هتعب حضرتك معايا لو هى مقلوبة ورشة دواخل فعلن مش هى احسن من عربية فى نفس السعر ال20000 موديل قديم لكن هى 2001
واية مشاكل العربية الا رشة دواخل غير ان سعرها بينزل
اسفة على الازعاج

[YahiaAshraf]

المشاركة الأصلية كتبت بواسطة shosho alaa الف شكر بس هتعب حضرتك معايا لو هى مقلوبة ورشة دواخل فعلن مش هى احسن من عربية فى نفس السعر ال20000 موديل قديم لكن هى 2001 واية مشاكل العربية الا رشة دواخل غير ان سعرها بينزل اسفة على الازعاج

ده كلام منقول من المنتدى هنا هيفيد حضرتك
************************
العربية راشة دواخل يعني كانت عاملة حاجة من الحاجات دي.
1 - العربية كانت عاملة حادثة جامدة من قدام وكان الحوض معجون في بعضة وطبعاً مهما كان مهارة السمكري الي اشتغل فيها عمرة ما هيقدر يرجعها لمقاساتها العادية وهتفضل تاكل منك عفشة وتاكل منك كوتش والزوايا عمرها ما هتظبط معاك وتلاقيها بتحدف لانها مش مظبوطة.
2 - العربية كانت مقلوبة قبل كدا وبردو نفس العيوب الي فاتت.
3 - ان يكون كان فيها بارومة ودا معناة ان الصاج بيكون ضعيف جداً ودا بردو خطر جداً.
مع العلم ممكن يكون الصنايعي الي اشتغل فيها ممتاز ويطلعها اقرب حاجة للفبريكة ودا طبعاً نادر جداً.
انا كان معايا 128 وعملت حادثة جامدة واستعدلت الحوض ورشيتو وبعد كدا العربية كانت زبالة لدرجت اني في مرة كنت بجري بيها ومرة واحدة لقيت العربية مش بتسحب لحد لما وقفت وبجيب الغيار وادوس بنزين ومفيش اي حاجة ( انا طبعاً قولت اسطوانة ) وشديتها لحد الورشة ولما روحت الورشة الميكانيكي قالي الشاسية اتفتح.
************************* ********
العربيه اللي راشه دواخل في نظري عربيه مالهاش امان
عمرها ما حتبقي مظبوطه
بالعقل كده مش حنجيب عربيه بتقفيل بلادها و المصنع لعربيه مخبوطه معجونه و متصلحه في التوكيل او في المصنع نفسه!!!!
وداعلشان جسم العربيه مش بيبقي فيه لحامات في الحوض و بيبقي حته واحده و لما تتخبط و تتلحم دا بيقلل من متانتها كتير
ممكن الواحد يركب عربيه مغيره شنب او وش لكن الصدر كله ملعوب فيه او الشنطه او القوايم لاء

************************* ***

حتى لو معمولة في التوكيل عمره ما هيطلعها زي المصنع.
وحتى لو العربية جديدة لو رشت دواخل بيبقى عيب قاتل فيها وبيخسف بسعرها الأرض ولو حبيت تبيعها صعب تلاقي حد يشتريها غير لو تاجر وبيقعد يتنك عليك.
انا حصلت معايا كان معايا بيجو 505 موديل 80 الي هيا الكاملة فتحت سقف وزجاج كهرباء وبور وتكييف وكل الكماليات و 2000 سي سي وعربية ممتازة بس كانت رشة دواخل حوض وشنطة و الي حالة نضيفة منها كان بيعمل من 40.000 جنية ل 45.000 جنية على حسب الحالة قعدت انزل بيها السوق اكتر من 3 شهور وفي الأخر مخدهاش غير تاجر ومرضيش يدفع اكتر متن 30.000.

************************* ******

طبعا العربية اللى رشة دواخل مش مفضلة لاى حد ... خاصة لو كانت قديمة او جديدة و اتصلحت بره توكيلها .....بس بالنسبة للعربية الحديثة لما بتتعمل ف التوكيل بترجع و عن تجربة ......انا ليا واحد قريبى والده معاه اوكتافيا A5 كاملة موديل 2005 و معاه من الزيرو و لحد دلوقتى معملتش ال80الف كيلو لانها واقفة ف الجراج اغلب الوقت ...بس ف مرة اخدها قريبى من والده و راح بيها مشوار ناحية طريق مصر اسكندرية الصحراوى و للاسف و هو بيجرى ملحقش يلم نفسه و دخلها ف عمود نور و مبقتش بتدور و جالها عربية انقاذ من توكيل اسكودا و سحبها و اتظبطت و رجعت زى الاول بالظبط و مش ممكن تقول ان العربية دى خيشت بوشها
مع العلم ان الحادث مكنش رهيب كان شنب و مقص شمال و تظبيط لوحدات الفريون لانه هرب شحن و شبكة امامية و اكصدام امامى و زجاج امامى مشروخ بسيط ....كلفته 22 الف جنية .....بس فعلا العربية لسه زى الجديدة بالظبط بس اللى يركز اوى يلاقى ان اللوحة بتاعت الارقام الامامية كانت معووجة و اتعدلت و مدهونة .....بسسسسسسسسسسسسس ....

************************* ***************
موضوع الاقدام على سياره رشه دواخل ليه اساسيات واصول
ياعنى احنا فى 2010 ماينفعش اشترى عربيه 2008 مثلا رشه دواخل ولا حتى موديل 90
وماينفعش اشترى عربيه فوق ال40000ج حتى لو عدى عليها 30 سنه ورشه دواخل

يبقا كده عندنا حاجتين بناءا عليهم نقرر نشترى عربيه رشه دواخل ولا لا
1- موديل العربيه
2- نوع العربيه

ياعنى لو عربيه تحت العشرين الف ولتكن فيات 128 موديل 1980 مش هدقق اوى لو رشه دواخل ولو مش رشه يبقا كتر خيرها

ولو عربيه مثلا مرسيدس او بى ام موديل 80 استحاله اقرب منها لو رشه دواخل لان العربيه دى جوده صناعتها تفوق زمانها بمراحل وده باين من سعرها
ياعنى مافيش لا مرسيدس ولا بى ام تمانينات هاتقل 30000ج
فى حين ان فى نفس السنه ممكن تلاقى 128 او 127 او ريتمو او حاجات كتير لا تتعدى 15000ج

ايه بقا هى الدواخل (حوض السياره - شنطه السياره - قوائم السياره)
انا عن نفسى ممكن مايفرقش معايا لا حوض ولا شنطه اد ما تفرق معايا سلامه القوائم

************************* ******************

تحياتى

[capohosen]

معايا 10000ج وعايز عربية ياتر ايه بس تكون كويسة