انا من شباب التحرير

[EgyZizo]

حمد الله على السلامة .. وألف شكر على اللى عملتوه كلكم ..
سؤالى : هو حضرتك من الإخوان؟
فيه حد قال لى أن غالبية اللى كانوا بيباتوا فى الميدان هم الإخوان فقط.
لكن أثناء النهار بتبقى الاغلبية الشعب العادى.

[@واحد من الناس@]

المشاركة الأصلية كتبت بواسطة EgyZizo حمد الله على السلامة .. وألف شكر على اللى عملتوه كلكم .. سؤالى : هو حضرتك من الإخوان؟ فيه حد قال لى أن غالبية اللى كانوا بيباتوا فى الميدان هم الإخوان فقط. لكن أثناء النهار بتبقى الاغلبية الشعب العادى.

ههههههه هو حضرتك لسه فى حد بيطلق الإشاعات دى أنا بنفسى روحت الميدان ومكنش حد بيقول إن دول الإخوان فمن الصعب إن تشوف واحدة متبرجة جدا وبتشرب سجائر وتقول إنها من الإخوان أو واحد تانى الصليب فى إيدة وتقولى إخوان يعنى هو لية الناس مصرة تلبس الليلة للإخوان بس إذا كان الإخوان مصريين إنهم مش هينزلوا حد لإنتخابات الرئاسة ومصريين برضه إن الثورة دى ثورة شباب وبرضه مصريين إن شباب الإخوان مثلهم كأى شباب شاركوا فى الثورة كأى شاب ليبرالى أو إشتراكى أو حتى قبطى ولعلمك الإخوان ليسوا هم أصحاب الذقون الطويلة فقط بل فى منهم ايضا شباب عادى جدا وهذا أيضا ما إكتشفته بعد أن رأيت أحد الشباب المتوفى و أحد أفراد أسرته يؤكد أنه من الإخوان الشهيد ده كان روش جدا ووكان قمة فى الذوق وكان بتعامل مع المتبرجات زى المحجبات بالظبط بص سيبك من اللى يقولك الكلام ده والأجندات والكشكيل والحورات دى إحنا بس اللى فاهمين الإخوان غلط وفى ناس عايز تثبت إن الإخوان هم أصحاب الثورة عشان يقولك إن بقية الشعب بيحب مبارك وعايزة تانى وإن الشعب غرر بيه ولكن الشعب المصرى شعب الرجال شعب عارف مصلحته فين شعب بجد موش هزار

دى ثورة شعب غلبان بمختلف طوائفة والكل شارك فى جميع فعليتها

[MIDO-SPICY]

طبعا يا ابو سهيله
احنا حتى لو كنا اختلفنا فى الاراء فكلنا متفقين على احترام وتقدير واجلال شهدائنا واللى اصيبوا وكل واحد حاول بجد انه يرجع مصرنا اللى كانت غايبه عننا من بعيد
حمد لله على سلامتك
ومنور مصر موتورز

[ابوسهيلة]

السلام عليكم ورحمة الله وبركاته

اولا احب اشكر كل حبايبي في مصر موتورز

وان شاء الله هنقلكم تجربتي في الميدان وكل الاحداث اللي الواحد شارك فيها

بس معلش اعذروني علي التأخير
أنا منمتش كويس بقالي اكتر من اسبوعين
ومرحتش شغلي ومقعدتش مع ولادي
بس ان شاء الله ابدأ معاكم رحلة دولة ميدان التحرير

[احمد الشناوى1981]

الحمد لله على سلامتك و ان شاء الله مصر هتكون شكل تانى حتى الناس انا حاسس انهم اتغيرو و بقا عندهم حماس و طاقه و تفائل بمستقبل احسن كفايه نوم لحد كده 30 سنه و احنا واقفين مكانه و اخيرا الناس اتحركت بفضل رجاله التحرير و غيرهم فى كل محافظات مصر
لكم اعظم التقدير و الاحترام