فيرنا اوتوماتيك 2011

[suzan233]

شكرا على الرد و ربنا يباركلك فيها بس اية اخبار السحب و استهلاك البنزين كمان انا اتصلت بغبور و عرفت ان انا لازم ادفع المبلغ كامل 75750 دلوقتى و استلم اخر الشهر قلتلة ما ينفعش ادفع على طول اخر الشهر قال لى لا و اللى فهمتوا ان هما بيعملوا العربية بالطلب يعنى كل فرع يبعت يقول عايزين كذا عربية اوتوماتيك و المصنع يبعتلهم و دا قلقنى زيادة لان عددها كده قليل خالص يعنى الفتيس لو جراله حاجة مش هلاقيه بسهولة

[ebaaa3i]

فعلاً الكلام ده صحيح العربيات هتنزل آخر الشهر والكلام ده من رئيس قسم المبيعات بغبور العبور ولازم تدفعى المبلغ كله وهيديلك إيصال أصفر بالمبلغ اللى انتى دفعتيه وتحددى لونين ، أنا كنت عايز فضى فقاللى آخر الشهر ، مقدرتش أستنى بصراحة وجيبت الفيرانى علشان كانت موجودة جاهزة عند مركز بيع هيونداى الهرم . بالنسبة للسحب جميل بس البنزين مقدرش أحكم علية فالأول كده ،هاتبعك وأقوللك وربنا يباركلك . صحيح فيه ناس فى مدينة نصر كانوا مغليين فى ثمن العربية علشان مش موجودة الفترة اللى فاتت خدى بالك يعنى العربية كانت عاملة 76500 وده كثير الاستغلال ده . بالنسبة لو هتستلمى من العبور معلش أنا آسف خليكى زنانة معاهم شوية

[suzan233]

شكرا على الرد و عقبال البى ام ان شاء الله

[basmala]

مبروك على العربيه و ربنا يباركلك فيها معلش انا عايزه اشترى فيرنا اوتماتيك بس خايفه من الفتيس فى ناس قالوا الفتيس وحش و لازم الصيانه فى التوكيل و ما ادراك ما التوكيل معلش ممكن الافاده لانى بصراحه اول مره اشترى عربيه و معنديش خبره فى العربيات و جزاكم الله خيرا

[ebaaa3i]

والله أنا أعرف ناس زمايلى معاهم فيرنا أوتوماتيك 2004 ولسه معاهم لحد دلوقت، وأنا كان معايا كيا برايد سيدان أوتوماتيك 2002 وكان معايا الحمد لله شغال تمام ، وفى نفس الوقت واحدة زميلتى فى الشغل جابت كيا بيكانتو 2008 أوتوماتيك و طلع الفتيس فيه مشاكل وقعدت شوية فى التوكيل فأنا مش عارف أديلك قرار صارم ، أنا اتعودت على الاتوماتيك لأن مشاويرى كتير فى وسط البلد لكن أنا عايزك تفكرى لو مشاويرك كلها قريبة يبقى المانيوال أما لو طريقك كله زحمة واشارات فالاوتوماتيك و توكلى على الله .