ايه حقيقة ان بنزين 92 بيطير اكتر من بنزين 90 ؟

[بدر بسيونى]

المشاركة الأصلية كتبت بواسطة حازم شاهين أنا مكنتش أعرف إن موتور الإكسل بيستخدم بنزين 92 حسب الكتالوج طيب علشان نوصل لموضوع الكهرباء ده هقولك بس الأول الفرق الرئيسى بين 80 و 90 و 92 إيه أى نوع وقود ليه نقطة إشتعال لو إتعرض لظروف معينة بمعنى إنه ممكن يولع لوحدة من غير شعلة أو شرارة، و الظروف دى بتكون مرتبطة بدرجة الحرارة و الضغط إللى بيتعرض ليه الوقود و مثال ذلك محركات الديزل و المازوت بمجرد تدفئة الوقود قليلا و ضغطة بدرجة معينة بيشتعل بدن شرارة خالص نفس الحكاية ممكن تحصل للبنزين العادى بتاعنا لو ضغطناه بدرجة كبيرة هيشتعل من نفسه بدون أى شرارة لكن فى الحالة دى مش هنحصل منه على أحسن إستفادة ممكنة علشان نحصل على أحسن أداء للمحرك و أحسن طاقة ممكن ناخدها من الوقود لازم نزود الضغط إللى بيتعرض له الوقود بدرجة كبيرة فبالتالى لما يشتعل تحت الضغط الرهيب ده هيولد طاقة كبيرة جدا تفيد المحرك و تحسن الأداء طيب إإزاى المحرك بيضغط الوقود محرك السيارة بتاعتنا كلنا مكون من اسطوانات بيتحرك جواها مكابس و مراحل عملة قايمة على أربع مراحل فقط لا غير و هى مرحلة السحب و فيها المكبس بينزل لتحت فيشفط هوا و بنزين جوه الإسطوانة مرحلة الضغط أو الكبس و فيها بيطلع المكبس لفوق لأخر مشواره فيكبس مخلوط الهوا و البنزين و يضغطة جامد جدا مرحلة الإنفجار و فيها البوجية بيعمل شرارة فيقوم خليط الهوا و البنزين ينفجر و يدفع المكبس تانى لتحت بكل قوة مرحلة تفريغ العادم و فيها يطلع المكبس لفوق فيطرد مخلفات الإحتراق برة الإسطوانة فى المحركات القديمة كان الضغط إللى بيحصل فى المرحلة التانية قليل نسبيا فكان البنزين الـ 80 ما بشتعلش إلا لما البوجيه أو الشمعة تولد الشرارة فى الوقت المحدد لها. لكن فى المواتير الحديثة أصبحت قدرتها على ضغط الوقود أكتر بكتير فلما نستخدملها بنزين 80 مثلا البنزين يشتعل قبل ما البوجيه يولد الشرارة بتاعته و يبقى المحرك بيضرب أخماس فى أسداس و الحل يكمن فى إستخدام بنزين برقم أوكتان أعلى فيتحمل ضغط أكتر لغاية ما المكبس يوصل لآخر المشوا بتاعة و البوجية يولد الشرارة فينفجر و فيه حل تانى علشان إحنا غلابة و بنحب التوفير و يتمثل فى تقديم التوقيت اللى بيولد فيه البوجيه الشرارة بتاعته علشان يلحق أو يسبق البنزين قبل ما يشتعل ذاتيا طيب إزاى نقدر نزود الضغط بدون ما يشتعل الوقود (البنزين) الحل يتمثل فى إضافة بعض ال مركبات للبنزين لزيادة الرقم الأوكتانى و كل ما يزيد الرقم الأوكتانى كل ما زادت قدرة البنزين على تحمل الضغط الشديد بدون إشتعال و الرقم الأوكتانى لا يعنى كمية الطاقة الموجودة فى البنزين لكن الرقم الأوكتانى ما هو إلا مؤشر على درجة تحمل البنزين للضغط و الحرارة فقط و كذلك الرقم الأوكتانى لا يعنى جودة البنزين أو كثافته أو لزوجته و لا يعكس أى صفة فزيائية للبنزين غير قدرته على تحمل الضغط و الحرارة أسف على الإطالة

والله مافيش حاجة تتقال تانية وشكرا ليك

[atgps]

طبعا الأخ حازم كلامه 100 100 بس أنا لى تعليق صغير - الأخ حازم قال (مرحلة الضغط أو الكبس و فيها بيطلع المكبس لفوق لأخر مشواره فيكبس مخلوط الهوا و البنزين و يضغطة جامد جدا
مرحلة الإنفجار و فيها البوجية بيعمل شرارة فيقوم خليط الهوا و البنزين ينفجر و يدفع المكبس تانى لتحت بكل قوة
مرحلة تفريغ العادم و فيها يطلع المكبس لفوق فيطرد مخلفات الإحتراق برة الإسطوانة)
فهى ليست مرحلة الإنفجار ولكن مرحلة الإشتعال أو الحريق - فإذا حدث إنفجار فذلك هو سبب التصقيف اللى بنسمعه مع استعمال بنزين أوكتين واطى مع محرك ضغط عالى لان فى هذه الحالة ينفجر البنزين تحت حالة الضغط العالى قبل وصوله الى نقطة عمل الشرارة اللازمة للإحتراق.

[Good09]

يا جماعة انا كده عشان أحول من 80 ل 92 أعلى الكهربا و لا اوطيها .؟؟
وهل هيكون معدل الكيلو ميترات فى الصفيحة زى ماهو و لا هيتحسن و لا هيقل ؟؟
هما دول اللى بأسأل عليهم
و شكرا للجميع

[atgps]

المشاركة الأصلية كتبت بواسطة Good09 يا جماعة انا كده عشان أحول من 80 ل 92 أعلى الكهربا و لا اوطيها .؟؟ وهل هيكون معدل الكيلو ميترات فى الصفيحة زى ماهو و لا هيتحسن و لا هيقل ؟؟ هما دول اللى بأسأل عليهم و شكرا للجميع

الأخ العزيز، علشان تحول من بنزين 80 الى 92 يمكنك تقديم الكهرباء حوالى درجتين وده يعتمد على مواصفات السيارة وسوف تلاحظ تحسن طفيف فى الاستهلاك

[Good09]

المشاركة الأصلية كتبت بواسطة atgps الأخ العزيز، علشان تحول من بنزين 80 الى 92 يمكنك تقديم الكهرباء حوالى درجتين وده يعتمد على مواصفات السيارة وسوف تلاحظ تحسن طفيف فى الاستهلاك

شكرا لك الميكانيكى ممكن يعمل الكلام ده و لا الكهربائى لأنى بصراحة معنديش خبرة أد كده