رابطة ملاك ومحبى السفينه فيات 132

[michohat]

هقول ليكم عاوز اعمل ايه ف العربية وعاوز مساعدتكم احط ترتيب للتنفيذ امشي عليه واخلص فيه كل حاجه من دول
- اعمل العربية سمكره ودوكو
سمكرة بعض الخبطات والبارومه
الدوكو جوده الدوكو الموجود ع العربية مش عجباني لانها ناتجه عن رش سابق وكان عيب ف الصنايعي و العربية طالعه مشققه من تحت اللون يعني في انعكاس النور تحس انك بتبص لجلد فضي الدوكو مش مشقق او طاقق بس تحس ان في تكتلات لمعجون تحت اللون ف حتت وحتت لا ودي مدياها منظر تشعير الجلد


الخطوه دي متردد ف عملها دلوقت مع توفر السمكري اللي اعرف انه كويس وكنت جربته من زمان قبل كده
- عاوز الحم قواعد كراسي العربية من قدام لان القواعد فكت فهناك خطوره ان مع اي فرمله مفاجئة ممكن الكراسي تفصل من العربية و اللي قاعد عليها يروح ف اي حته
وغالباً ان الموضوع ده هيكون سبب اني افتح شغل ف العربية لاني لو فكيت الفرش علشان اعملهم ولقيت شغل بارومه فأكيد هعمله و هسرح ع باقي العربية
علشان كده جبت المنتجات بتاعت حماية التأكل دي والتبطين علشان لو الموضوع على قد لحام الكراسي يبقى ارشهم واقفل الصالون ولو فتح يبقى معايا الحاجه اللي ارش بيهاواعزل

- عاوز اركب شكمان كامل من اول المشترك لحد الديل ولحد دلوقت مستقر علي شكمان ابو اليزيد وكنت عاوز انزل التوفيقة لاني سمعت ان هشام لهيطه عنده شكمانات مستورده فكنت عاوز اشوف متوسط سعرها لو في حدود المعقول بالمقارنه مع ابواليزيد يبقي اركبه
وعاوز اشتري كوريك تمساح من سمعت ان التوفيقية اسعارها كويسة والبضاعه كويسة

- عاوز اعزل الصالون بالكامل واضبطه لاحتمال تركيب تكييف
حاليا الحمد لله عزل العربية بالنسبة للصوت كويس بس عاوز اراجع على كاوتش الابواب
عزل الحرارة بالنسبة للموتور العزل بتاع حوض الموتور اللي راكب ف الحته اللي قدام التابلوة كويس اه بس شكلا عاوز اظبطه لان كان فيه ناحيه وقعت وانا عملتها عازل مفضض اي كلام كده ولزقته بالكله
و لاحظت ان العربية مش فيها عزل من تحت الكبوت لحد الدواسات فبفكر اركب عزل من تحت التابلوة لحد الدواسات علشان يلحم مع عزل ارضيه العربية
والقوائم احط فيها حاجه برضه
فبدور على عزل كويس ومعرفش مش مقتنع بكفائة عزل اللباد المفضض او عاوز اشوف عزل ارفع في السمك
علشان كده كنت عاوز انزل القاهره اشوف محلات العوازل في ( السبتيه و المناصرة و شارع الجمهورية و كلود بك ونجيب الريحاني )
- عاوز اظبط تاكيهات للعربية علشان دخله الشتا
- عاوز اروح للكهربائي لاني شاكك ان في قفله او ماس في كهربا العدادات حصلت ومستمره ( لاني فكيتها وغيرت لمض ونظفت العدادات ) لانه من ساعه ما فكيتها لحد دلوقت غيرت مفتاح بكره توطيه وتعليه نور العدادات 3 مرات وانتوا عارفين صعب قد ايه اني الاقي عدادات مكسورة اخد منها المفتاح ده
- عاوز اشوف طريقة اضبط بيها سقف العربية من جوه
لان لما غيرت كسوة فرش السقف السروجي عملها كويس اه بس في الاخر راح شادد الكسوة بين حلوق الابواب من فوق مع ان المفروض ان السقف ده من فل وله كلبسات بتثبته فحته انه شادد الفل بالكلبسات ع حلوق الابواب خنقاني ومحسساني اني راكب تاكسي
- عاوز اشوف حد بيصلح كشافات لان الكشاف اللي عندي ورا المربع بيسرب مياه ف العربيه وده ناتج من ان البلاستيك الابيض ده سايح من ورا لمضه نتيجه تركيب لمضه عاليه حرارتها سيحت اللمبه والقاعده بتاعتها



- عاوز اصلح عوامه البنزين دائما قرائتها غلط و بدئت تبقى غلط اكتر لما بدئت حكايه قفله او ماس العدادات
-
عاوز اشتري شماسات اصليه بنفس اللون و قوائم بلاستيك لداخل العربية فكده عاوز انزل عزبه شلبي واحتمال وانا هناك اشوف العدادات ولو لقيت العداد اللي بيبقى فيه مقياس ضغط الزيت والبطارية

- التأكيد على توصيلات هوايات فتحات التكييف وعمل اي تجهيزات لموضوع التكييف يعني لو حاجه سعرها رخيص اعملها علشان بعد كده مش ارجع افك التابلوة والكنسولة ولو ينفع انا اركب التكييف ولا عربياتنا محتاجه حد فني يشغله عليها انا لسه مش ليا خبره او حاجه بس بحب اعمل شغلي في العربية

- عاوز استقر على فرش او كسوة للعربية ومحتار اكشف فرش العربية الاصلي اتمتع بيه ولا اخليه زي ما هو وا غير الكسوة وهل اجيبها جلد ( عندي بنت عمرها سنه واكيد الامر مش يسلم من سفر او حاجه وانها بتاكل تبهدل لي العربية)

- اراجع ع العفشه لاني بحس في بعض الاحيان باصوات فى الجنب ناحيتي قدام

دي الحاجات اللي عاوز اعملها وفي دماغي حاليا و مش عارف اخد ايه الاول وارتب الموضوع مع اعتبار اني مزنوق ف الشغل ومش متوفر وقت كبير فعلى الاغلب ان التنفيذ هيكون على مراحل

[michohat]

المشاركة الأصلية كتبت بواسطة أيمن الروبي استاذي الفاضل انا مستخدمتش العبوه دي قبل كده علشان اقدر احكم عليها بس اللي اعرفه ان اللي بيشيل جلفنة الصاج انك تسلط عيله نار زي ما بعض الصنايعيه بيعملو علشان يشيلو الدهان القديم بس من مواصفات العبوه انها بتتحمل درجة حراره عاليه بتوصل لـ500 درجه مئويه لو الكلام ده صح تبقي فعاله والمفروض كمان يكون من خصائصها انها متتأثرش بالصنفره يبقي فعلا دي حاجه كويسه المهم ان السمكري لازم يشيل العربيه علي الصاج علشان تعرف ترش الماده دي والمفروض ان هي تكون شفافه ازاي طيب السمكري يشيل البوية ويجيب العربية ع الصاج من غير ما يحرق البويه بالنار وكمان الفواصل بيتمشي عليها بماده زي السليكون اسمها شيشلوك ودي تمن العبوه منها 120 جنيه والشيشلوك ده هتلاقيه في فواصل البي ام والمرسيدس والفولكس ده بقي مبيتشلش نهائي اقتح اي مرسيدس وبس علي الفواصل هتلاقي ريجه كده كأنها معموله بفرشه هو ده الشيشلوك بس احنا مبنعملوش للزباين الا بالطل لأن العبوه غاليه وبتحتاج حرفيه في رسمها علي الفواصل وبتحي مالفواصل من الصدأ وفك البنط بتاعتها وكمان مبتقبلش رش غير مره واحده يعيني لو غيرت لون العربيه مشتحيل اللون الجديد يمسك فيها انا عارف ان الكلام ده ممكن اول مره تسمعه وممكن متستوعبوش علطول بس دي تريكات فنيه للدهان واتمني ان العبوه اللي انت اشترتها تكون فعاله ضد الصدأ او البارومه واكتر ما يحزنني ان فيه بعض الصنايعيه لما ييجو يشتغلو في الموديلات الحديثه يعملو نفسيهم بيكرمو الزبون ويحرقولو العربيه علي الصاج علشان يأسسوها من جديد وهما ما يعرفوش انهم كده بيشيلو جلفنة الصاج لأن العربيات الحديثه مجلفنه ضد الصدأ مش زي عربياتنا ولكن ميزة عربياتنا ان صاجها محمل تقدر تعمله مرمات ويعيش تاني

افتكر اني جبت الماده دي قبل كده لما كان عظم السقف كان فاصل من الصاج بتاع السقف والسمكري جابها علشان يلزق بيها عظم السقف بالسقف
هل ف وسيلة اقدر اجرب بيها الاسبراي ده مثلا ارشه علي صاج واحاول اصنفرة ولا اعمل فيه ايه

المشاركة الأصلية كتبت بواسطة أيمن الروبي معلومه تانية البتيومين مبيتحطش عليه مصلب المصلب بيخليه يقطع ويبوظ بس برده بيكون محتاج وقت ينشف ولو خفيته بشوية تنر صغيرين يخليه ينشف اسرع ولازم تتطهر العربيه من تحت علشان ترشه

البتيومين اللي جبته هو العبوة دي
http://www.liqui-moly.de/liquimoly/p...b=web_arab.nsf


والتاجر قال لي ضيف عليه مصلب وانت بترشه وانا مش استفسرت منه على اساس ان اللي هيرشه هيكون فاهم

على فكره انا اتمنى اني اعمل عربيتي عندك لاني بحب اوي الناس اللي بتكون فاهمه في شغلها كده والتكنيكات دي بس علشان بعد المسافه واني في هيكون صعب عليا كل يوم اجي مصر وارجع تاني متأخر لاني بحب اشوف واتابع شغل العربية بعيني
ده لما كنت بعملها هنا المره اللي فاتت الي الدوكو بتاعها طلع بايظ كنت بروح للعربيه مره الصبح وانا رايح الشغل و برجع من الشغل عليها واكمل معاهم لحد ما يقفلوا شغل واروح مع الصنايعيه

[mOuStaFa_ERTU]

المشاركة الأصلية كتبت بواسطة محمدصلاح القاضى اولا ازيكم كلكم واااااااااااحشنى موووووووت والله العظيم وربنا يجمعنا على خير بأذن الله ثانيا انا مستغرب حاجه انكم ساعات تبقى الرابطه نايمه فى العسل اوووى وساعات الحماس بيبقى عالى اوووووى اووووى وربنا ميقطعش لكم حماس ابدااا طبعا كل سنه وانتم طيبين بمناسبه العيد وربنا ديما يعوده بألف خير وصحه وسعاده عليكم جميعا ثالثا احنا لازم نتقابل فى العيد رسمى يعنى مفيش كلام رابعا عربيتى طالبه شوية شغل بتوع يومين شغل بس على حق ربنا اولا انا نفضت لموضوع بليه الدبرياج لانى اللى عرفته انها طالما بتصرخ تبقى علمت فى الديسك ومن باب الاحتياط يتغير فقولت اما تبقى العمليه اتبهدلت خالص تبقى شغلانه واحده وخلاص ثانيا كانت العربيه اتحكت منى فى غطا بلاعه من بتوع الصرف كان الشارع مليان مايه والعربيه حكت فيه لانه مش باين من ارتفاع المايه تخيل بقا لو عربيه جديده كانت اتشعلقت فى الهوا المهم بصيت اما روحت على الاثار لقيت الحمد لله مفيش حاجه تماما لكن اللى زعلنى منظر العربيه من تحت وهى فى حتت الانتر كوت مش موجود عليها وعليها طبقه صدا سطحى فكنت عايز اعمل دا حاليا لكن مش عارف ايه الماده المظبوطه اللى بشتريها وهل ممكن ادهنها انا بالفرشه ولا لازم مسدس بويا ؟؟!!!! لان طبعا هدهن العربيه كلها من تحت ومش عارف ايه التجهيز اللى مفروض يتعمل بشكل مظبوط عشان الامور تبقى مظبوطه وتعيش ؟؟؟ دا طبعا طلب من ايمن الروبى لازم يرد عليا فيه لانه التخصص هنا

ماتستغربش يا قاضى هكذا حال الدنيا
ياباشا انت اتخبطت مرة انا بتخبط كل يوم فى نفس البلاعة بس غصب عندى هشام جالى البيت وشافها وملهاش حل بلاعة فى المدخل وواحدة فى المخرج لدرجة انى فكرة اعملها نفق فى بطن العربية
ربنا يعينك وعايزين نتجمع فى العيد او نسهر الوقفه مع بعض

[أيمن الروبي]

المشاركة الأصلية كتبت بواسطة mostafa3tef ماتستغربش يا قاضى هكذا حال الدنيا ياباشا انت اتخبطت مرة انا بتخبط كل يوم فى نفس البلاعة بس غصب عندى هشام جالى البيت وشافها وملهاش حل بلاعة فى المدخل وواحدة فى المخرج لدرجة انى فكرة اعملها نفق فى بطن العربية ربنا يعينك وعايزين نتجمع فى العيد او نسهر الوقفه مع بعض

عامل ايه يا صفي واحشني يا بني ووحشاني فكاهتك
مقولتليش ايه رأيك في فردة الكاوتش دي دي اللي راكبه عندي واللي جبتلك سعرها
http://www.masrmotors.com/vb/showthr...80993&page=274

[mOuStaFa_ERTU]

المشاركة الأصلية كتبت بواسطة أيمن الروبي شكرا يا اتش علي رأيك الجميل ده وان شاء الله بعد العيد هحاول اجيلك يوم بدري نعمل الكربراتير ولو مصطفي هيستني يبقي احنا الاتنين مع بعض علي فكرة نسيت اقولك الميكانيكي لعب في مسمار الهوا قبل مسافر واعتقد ده برده اللي خلي سحب البنزين عالي

ااوك
نروح سوا بعد العيد بس انت تيجى وانا احكيلك عاللى جرى