تجربة ناجحة جداً مع المنتدى - نيسان صني 2004

[AbOnOrA]

لازم تعمل صيانة شاملة للموتور والعفشه
بالنسبة للموتور لازم تبص على جوان غطا التاكيهات وتربيط الغطاء
ويتغير له طقم سيور كاتينة ودينمو وتكييف
وتبص على بليه سير الكاتينة هى كمان يفضل تغييرها
وتغيير فلاتر زيت وبنزين وهواء
وينظف بوابه الانجكشن
وتغير طقم بوجيهات
واخيرا يراجع على قواعد الموتور والفتيس علشان موضوع الرجرجة ده
وبعدين العفشه لازم يتبص على علبه الدريكسيون والبارات بتاعتها والجلب والمقصات والمساعدين وبلى العجل وكاوتشات المساعد والجلب كلها وبعدين تغير طقم تيل وتبص على الديسكات والطنابير

انا بصراحة لو صاحب مركز صيانة وانت جيتلى بالعربيه عاملة العداد ده من غير ولا صيانة هقولك لازم نغير الحاجات ديه الاول وبعدين نشوف ايه المشاكل اللى فى العربيه

لكن طبيعى العربيه تبقى عاملة المشاكل ديه بعد كل المدة ديه من غير اى صيانات وكويس انها معطلتش منك خالص علشان خد بالك فيه حاجات خطيرة زى سير الكاتينة لو اتقطع منك الموتور كله هيحتاج عمرة وديه اصعب حاجة ممكن تعملها عندك بالذات فحاول تشد العربيه بسرعة حتى ولو مرحلة مرحلة

نسيت اقولك بعد كل ده تبص على الكاوتش لو محتاك يتغير تغيرة وتراجع على الجنوط وترصيصها وتاخد العربيه لبتاع زوايا تظبط عنده بعد شغل العفشة ولو فيه حاجة فى العفشة ترجع للورشة تانى تظبط وبعدين ترجع للزوايا

[hendyms]

كلام جميل جداً، و إن كنت بصراحة مش فاهم بعض المصطلحات اللي حضرتك استعملتها، أو بصراحة معظمها، لكن على العموم: بالنسبة للكاوتش، فده الحاجة الوحيدة اللي بتابعها باستمرار عشان إنت عارف إن الطرق هنا في السعودية كلها طرق سريعة، و أي مشكلة في الكوتش ممكن تسبب كارثة لا سمح الله.
عموماً، بعد رد حضرتك دا أنا أمامي حل من إثنين:
1- إما إن أنا أطبع رد حضرتك ده و أروح بيه عند ميكانيكي كويس يظبطهولي.
2- أو أروح توكيل نيسان يكشفوا على العربية و يدوني لستة فيها الحاجات اللي محتاجة تتظبط و بعدها آخدها أعملها برة.
النصيحة اللي حضرتك هتقولها هآخد بيها إن شاء الله.
جزاك الله خيراً على اهتمامك.

[AbOnOrA]

بص حضرتك لو هنا فى مصر هسالك عايز الاوفر ولا الاضمن والاوفر فى مصر انك تجيب قطع الغيار بنفسك من بره اصلية ومن موزعين معتمدين وكل حاجة بس هتبقى اوفر من التوكيل وتروح لميكانيكى شاطر وموثوق فيه يعملك الشغل

ولو عايز الاضمن هتروح التوكيل او مركز خدمة معتمد يركبلك قطع الغيار ويعملك الشغل ويديك ضمان على التركيب والقطع

بس انا مش متاكد بصراحة ايه الاوفر وايه الاضمن عند حضرتك

[hendyms]

سلام عليكم
فكرة إن أنا أروح عند مركز صيانة معتمد (غير التوكيل) ما كنتش على بالي، عموماً يبدو إنها فكرة كويسة جداً لأنه أكيد هيكون أرخص من التوكيل، هحاول إني أسأل على مركز صيانة موثوق فيه و أدي لحضرتك رد إن شاء الله.

[د0تامر محمد]

المشاركة الأصلية كتبت بواسطة AboNoRa لازم تعمل صيانة شاملة للموتور والعفشه بالنسبة للموتور لازم تبص على جوان غطا التاكيهات وتربيط الغطاء ويتغير له طقم سيور كاتينة ودينمو وتكييف وتبص على بليه سير الكاتينة هى كمان يفضل تغييرها وتغيير فلاتر زيت وبنزين وهواء وينظف بوابه الانجكشن وتغير طقم بوجيهات واخيرا يراجع على قواعد الموتور والفتيس علشان موضوع الرجرجة ده وبعدين العفشه لازم يتبص على علبه الدريكسيون والبارات بتاعتها والجلب والمقصات والمساعدين وبلى العجل وكاوتشات المساعد والجلب كلها وبعدين تغير طقم تيل وتبص على الديسكات والطنابير انا بصراحة لو صاحب مركز صيانة وانت جيتلى بالعربيه عاملة العداد ده من غير ولا صيانة هقولك لازم نغير الحاجات ديه الاول وبعدين نشوف ايه المشاكل اللى فى العربيه لكن طبيعى العربيه تبقى عاملة المشاكل ديه بعد كل المدة ديه من غير اى صيانات وكويس انها معطلتش منك خالص علشان خد بالك فيه حاجات خطيرة زى سير الكاتينة لو اتقطع منك الموتور كله هيحتاج عمرة وديه اصعب حاجة ممكن تعملها عندك بالذات فحاول تشد العربيه بسرعة حتى ولو مرحلة مرحلة نسيت اقولك بعد كل ده تبص على الكاوتش لو محتاك يتغير تغيرة وتراجع على الجنوط وترصيصها وتاخد العربيه لبتاع زوايا تظبط عنده بعد شغل العفشة ولو فيه حاجة فى العفشة ترجع للورشة تانى تظبط وبعدين ترجع للزوايا

بارك الله فيك يا أبو نورا نصائح غالية
تصحيح بسيط سير كاتينة الصنى جنزير حديد