هو أنا لازم ألبس نظارة ليلية عشان أسوق في اسكندرية؟؟؟؟؟؟؟؟؟؟

[akerima]

بما اننا اسكنرانية زي بعض - انا شايف ان معظم شوارع اسكندرية منورة وكتير من الشوارع الجانبية كمان فايه الداعي انك تمشي بنور عربيتك منور علطول نور النور بس لما يبقي الشارع ضلمة ومش شايف فعلا بس بجد لما بلاقي حد في المقابل منور نور العربية والشارع منور بيشلني هوا نور العربية حيعملك اية زيادة عن نور الشارع انت كدا شايف وكدا شايف اية لزمة ان انت تعميني وانا ماشي

[borio1704]

المشاركة الأصلية كتبت بواسطة akerima بما اننا اسكنرانية زي بعض - انا شايف ان معظم شوارع اسكندرية منورة وكتير من الشوارع الجانبية كمان فايه الداعي انك تمشي بنور عربيتك منور علطول نور النور بس لما يبقي الشارع ضلمة ومش شايف فعلا بس بجد لما بلاقي حد في المقابل منور نور العربية والشارع منور بيشلني هوا نور العربية حيعملك اية زيادة عن نور الشارع انت كدا شايف وكدا شايف اية لزمة ان انت تعميني وانا ماشي

أهلا بيك يا أستاذ عكرمة

إنت عندك حق فعلا لما يكون اللي منور النور ده مركب لمبات زينون من اللي بتعمي بجد، أو نور العربية مش مضبوط، يعني اتجاهه منور لفوق شوية أو على جنب شوية،
بس أنا مش معاك إن أي حد منور النور حيعميك وهو ماشي

ليه؟؟؟؟؟؟؟؟؟؟؟؟؟

إذا عرف السبب... بطل العجب

حضرتك نورت نور عربيتك قبل كده؟؟؟؟

حضرتك خدت بالك إن نور العربية له شكل معين؟؟؟؟؟؟؟؟؟؟؟... زي اللي في الصورة ده:
Car Main Light.gif

أكيد ما خدتش بالك

ببساطة كده ومن غير زعل

حضرتك عارف إن النور ده متصمم بالشكل ده لسبب وجيه؟؟؟؟؟

حضرتك عارف إن التصميم ده بيخللي استحالة النور يعميك أبداً؟؟؟؟؟؟

حضرتك عارف إن قانون المرور في أي دولة في العالم... بما فيهم مصر.... بيلزمك إنك تنور النور من أول ما المغرب يأذن؟؟؟؟؟ ولو ما نورتش تاخد مخالفة؟؟؟؟ طبعا لو ضباط المرور عندنا عرفوا المعلومة دي... صباح المخالفات في اسكندرية



النور متصمم بالشكل ده بحيث إن الجهة اليمين تنور أعلى من الشمال، بحيث إن الجهة الشمال ما تبقاش أعلى من مستوى كبوت العربية المقابلة، يعني عمر ما النور حييجي في وشك
شوف الصورة دي كده... ده شكل إضاءة العربيات اللي مقابلة بعض
Opposite Cars.gif

طب ليه الجهة اليمين أعلى؟؟؟؟
عشان تنور على العلامات المرورية اللي ممكن تكون في الطريق (وعادة بتكون على يمين الطريق)، وجرب كدة إنك تسافر على الصحراوي بالليل وتشوف العلامات منورة قوي كده ليه

يبقى ليه أطفي نور العربية مادام بيساعدني أشوف كويس، ومش بيضايق حد تاني، وكمان فيه قانون بيلزمني... يا راجل دا أن في الشوارع المضلمة اللي مليانة مطبات وحفر بيقولولك طفي النور... أنهي عقل يقول كده؟؟؟؟؟؟ ولما تقع في مطب يكسرلك مقص... حاستفيد إيه؟؟؟؟

معلش أنا ممكن أكون قليل الذوق شوية، بس صدقني لما تعرف الملومات اللي قلتهالك دي.. هتعمل زي، وتتشل من اللي بيقوللك "طفي النور"

[borio1704]

معلش... معلومات إضافية

موضوع تصميم النور ده قاعدة عامة في كل العربيات بلا استثناء، حتى عربيات النقل والأوتوبيس..... لو حد أخد باله، مفيش أتوبيس أو عربية نقل حديثة (وبكرر... حديثة) فوانيسها أعلى من أي عربية ملاكي عادية، لأن القاعدة ماشية على الكل.

بس القاعدة دي معكوسة في البلاد اللي دركسيونها على اليمين.. زي انجلترا واليابان مثلا... بيعني هناك الفوانيس بتنور عالي على الشمال، لإن المقابل بيبقى في اليمين

على فكرة... أنا أخويا معاه عربية ياباني اشترالها فانوس استعمال، طلع فانوس ياباني... يعني بينور عالي على الشمال..... طبعا مش عايز أقوللكو كمية الخناقات اللي بيتخانقها كل يوم ،

بس لو أنا مطرحو لازم أطفي النور
...

[Egy News]

ههههههههههههههههههههههههه و الله ضحكتني
بجد الواحد بيقابل حاجات عجيبه اليومين دول

[akerima]

استاذي borio1704

انا عارف طبعا تصميم الفوانيس مبني علي اية لكن بالنسبة للطرق عندنا في مصر التصميم دا ما بيساعدش كتير لان كل المسافة اللي بتبقي مابيني ما بين حضرتك وانت معدي من جنبي يادوبك اللي يعدي مرايتك من مرايتي يبقي مهما يكون فانوسك الشمال واطي ححس بيه خارم عنيا - دا ان فرض ان العربيات في بلدنا كلها ملتزمة بقوة الفوانيس الاستوك اللي نازلة مع العربية انا ساكن في ميامي ودايما مشاويري باخدها من الملك حفني عشان طبعا جمال عبد الناصر لا يطاق تخيل باه كمية المشاريع اللي جاية في وشي بتبقي عملة ازاي والعربيات اللي ركنة علي الجنبين ومايمنعش كمان مشروعين علي كام تاكسي راكن في وسط الشارع بيركب ناس وكل دا وفي ناس جاية في وشك مولعة نورها :fun_ 36_1_4[1]: