ازاى اطنش الكلاكسات

[حمادة ونور]

المشاركة الأصلية كتبت بواسطة azzat 55 أعمل ودن من طين وودن من عجين عشان لو قعدت تسمع كلاكسات العربيات فى مصر هيجيلك أنهيار عصبى

انا فعلا جالى انهيار عصبى

[Hisham.Elgazzar]

حاول تسوق بطريقة دفاعية يعنى دايما تبقى فى الصدارة وتحاول توسع لنفسك الطريق
وماتزنقش على حد وتدى الغيار المناسب وخصوصا وسط الزحمة لازم تنجز وتسحب بالعربية بعيد عن الدوشة والكلاكسات وقرفها
مستحيل واحد هيزمرلك وسط الزحمة لأن الطريق واقف
وماتسيبش عشرة متر مابينك ومابين اللى قدامك لما الطريق يبقى زحمة عشان لو عملت كده اللى وراك هيجننك بالكلاكسات ، مش معقولة هتقفل الإزاز وتعيش الساونا مع الراديو فى عز الحر ساعة الظهر والا حتى بالليل، الحل انك تدافع عن نفسك وسط الطريق وتنجز بسرعة فى الزحمة ، وطبعا تحترس من خطأ الغير

لما بقى تطلع على طريق فاضى او تكون الدنيا هادية تمشى براحتك فى الطريق زى منتا عاوز
وماتركزش مع الكلاكسات كتير عشان هتتعب انا عارف انه فيه ناس مستفزة

اللى مستعجل خليه يجرى ، كلها بتصب فى بلاعة واحدة ، وحسبى الله ونعم الوكيل فى كل سواق مش بيراعى الناس على الطريق

[sayed2077]

بص يا ريس بالنسبالى انا معايا 128
فى الصيف للاسف لانى معنديش تكيف بضطر انى افتح زجاج العربيه علشان مستويش جوه العربيه بس طبعا لو الدنيا بتتقلب على بعض انا ماليش دعوه بحد خالص وكل واحد يعمل اللى عاوزة ما دام انا شايف نفسى مش غلط ده فى الصيف فى الشتا بقى قافل الازاز عليا ومشغل التسجيل ويولع الجميع برا هههههههه وانصحك تعمل كدا علشان لاقدر الله ميحصلكش حاجه من الهم الى بنشوفوه من سواقين الميكروباصات والناس اللى بتحب تزمر على الفاضى

[ahmed_zamalek7]

انتو من الكلاكسات بقى انا بقى مخنوق من الكلاكسات والضوء واليكسر عليك خصوصا انى من الزقازيق يعنى سواق التاكس يعرض العربيه فى نص الشارع عشان يركب الزبون ولا سواق الميكروباص اليمشى ويكسر على اى حد ملوش دعوه ولا بقى العربيجيه البيحبو يخدو غرز بالكرو والله السواقه بقيت مجهده والعربيه بقيت حسره مش رفاهيه

[akerima]

انا مع كلام اخونا Hisham.Elgazzar خلي اللي عايز يعدي يعدي وهو بعد كده حر وخلي بالك لان في بعض الحالات بيبقي المستعجل وعايز يعديك فعلا وراه حاجة ضرورية

ححكيلك موقف حصل معايا خلاني باخد بالي اوي قبل ما اقفل علي حد ولا ارخم علية

كنت مرة ماشي علي الترام في الاسكندرية بعد نادي اسبورتنج وكنت طالع علي شارع ابو قير والشارع اللي يطلعك علي ابوقير ضيق ومايعديش الا عربية واحدة وبالعافية وكان معايا واحد صاحبي وبنتكلم ونهزر وفجاه جه واحد في ضهري هاتك يا كلاكسات ودوشة وساعتها الشيطان لعب في دماغي وقلت رخامة برخامة وخصوصا ان الشارع فيه مطبات غلسة هدي علي قد ما تقدر وفعلا هراني كلاكسات لغاية ما قربنا نطلع شارع ابو قير قمت معدية وللاسف اول ما بصيت في العربية لقيت معاه واحد مريض علي الكنبة الللي ورا والناس بتحاول تفوقة لغاية ما اكيد كان رايح بيه مستشفي او حاجة

مش عايز اقولكوا ساعتها ايه اللي حصلي او انا كنت عايز اعمل في نفسي ايه وطبعا لولا انة مستعجل كان نزل اداني ميت جذمة ومعاه الف حق

في النهاية ظروف الناس الله اعلم بيها وكونك تقدر تعدي اللي وراك وانت مش مستعجل افتحلة طريق جايز يكون دا سبب ان ربنا يفتحلك ابواب رحمتة وتكون بكده حليت مشكلة بني ادم الله اعلم بيه

وخلي بالكوا ان احنا اليومين دول بجد حتي لو الطريق فاضي برضة ممشينها رخامة ولو انت كل مشاويرك ممشيها رالي بتيجي لما حد يكلكس في ضهرك تسوق الرخامة وجايز لو حتي الطريق مفتوح يمين بتمسك شمالك وتضرب اشارتك زي ماكتير من الناس بتعمل علي السريع - طب فيها ايه لو عايز تمشي براحتك ما تمشي يمين من الاول ولا امشي شمال ولما تبقي في عربية في ضهرك عديها شمال وبعدين امشي شمال تاني

من الاخر لو اللي بيكلكس في ضهرك دا شايف ان الدنيا واقفة وبرضة عما فرح طنشة تماما لكن لو عندك فرصة انك تعدية عدية - انت حترتاح من الدوشة وحتروح باذن الله وانت نفسيتك حلوة ومعندكش حرق دم وهو كمان الله اعلم بيه جايز يكون فعلا وراه حاجة مهمة