عربيتى والنص نقل

[geo]

ده بوسة عنيفة
معلش
ان شاء الله تبقي زي الفل

[فاطومه المصريه]

قدر الله وما شاء فعل
الحمد لله ع كل شى

[أبو عامر]

قدر الله وما شاء فعل
فداك يا أخي وان شاء الله تتظبط وتبقي تمام

[المناور]

الحمد لله الموضوع خلص والباب اتعدل هو صحيح مارجعش زى الأول لانه مردود على البارد بس الحمد لله اهو رجع يفتح ويقفل تانى وده المهم عندى .

وللى ما فهمش القصة من الشعر اللى قلته - على فرض اننا تنزلنا وقلنا عليه شعر - فالموضوع انى كنت راكن العربية تحت البيت كالعادة المهم لقيت التليفون بيرن على الساعة 11.30 بالليل من واحد معرفتى من اصحاب المحلات اللى تحت بيتنا ولقيته بيقولى فيه ناس عايزاك المهم نزلت لقيته بيستقبلنى وبيقولى فيه خبر بخصوص العربية !! فقلتله خير ؟ قالى هيا بس اتخبطت خبطة بسيطة وهيا واقفة ، قلتله نعم !! روحت بسرعة على العربية ولقيت المنظر اللى انتم شفتوه ده .

أنا قلت مين عمل كده لاقيت راجل طالعلى وبيقولى اللى انت تؤمر بيه أنا حانفذه عايز تودى العربية لسمكرى ماشى عايز تغير الباب برضو ماشى الراجل كان شكله مقلق انى اعمل هوليلة وامسك فى خناقه ، الغريب انى كنت هادى جدا بشكل أنا ماكنتش متصوره يعنى لا انفعلت ولا زعقت ولا حاجة كل اللى نازل عليا انى عمال اقول الحمد لله .

المهم الراجل طلع سواق عربية نص نقل وكان عليها بضاعة وبيحملوها لمحل من المحلات المهم البيه ركن العربية عند الناصية التانية عند حتة منحدرة شوية وممور العربية والانقح انه كان كاسر العجل وساب العربية علشان يساعد الناس اللى بتشيل ، طبعا العربية اتحركت من مكانها وراحت معدية الشارع ودخلت فى جنب عربيتى .

واضح بقى ان هدوئى ده طمع الراجل فيا فقالى تعالى معايا عند سمكرى اعرفه وحايظبطهالك أو لو تحب اديك الفلوس وانت تروح للى انت عايزه ، طبعا انا اصريت على انى اروح لسمكرى تبعى علشان واحد صاحبى قبل كده عربيته اتخبطت من سواق برضو ووداه لسمكرى تبعه راح عمله شغل اى كلام وقلبه سريع سريع ، فصممت على رأيى انى اروح للسمكرى بتاعى .
بعدين راح واحد سأله طيب عدلة الباب تعملها كام قاله دى تخلص عند السمكرى ب 50 جنيه ، أنا سمعت الكلمة دى وركبنى العصبى وصوتى على عليه يعنى مش كفاية غلطان وكمان عايز تنصب عليا ، عرفت بعد كده ان الراجل طلع شغال عند واحد جارى فى العمارة وأول ما عرف نزلى علطول وقالى الراجل ده تبعى واللى انت تؤمر بيه حايتعمل وراح مزعق للسواق على الكلام اللى قاله وقاله الراجل ده جارى وانت غلطان يعنى اللى هو عايز يعمله حايتعمل يعنى يغير باب يروح لسمكرى اللى هو عايزه يتعمل وتكاليف التصليح كلها عليك ده حق ربنا ولازم تلتزم بيه .

بعد ما اتفقنا على كده اخدنى صاحبى اللى بلغنى بالخبر على جنب وقالى بما اننا اتفقنا مع الراجل والموضوع اتلم أنا شايف انك تخلى التكلقة بالنص بينك وبينه الراجل ده برضو سواق وغلبان فقلتله ربنا يعدلها .

روحت لواحد سمكرى قالى واحد صاحبى عليه فلقيته أول ماشاف الخبطة قالى الباب عايز يتغير طيب يا ريس ده يعمله كام قالى فى حدود 400 جنيه غير الرش اللى حاياخده طبعا الكلام ده مادخلش دماغى روحت مكلم الميكانيكى بتاعى وقالى سيبك منه وتعالالى انا حاظبطك راح مكلم سمكرى تبعه ووصاه عليا المهم من هنا لهنا اتفقنا ان اهم حاجة ان الباب يفتح ويقفل مش مهم اللون والكلام ده وخلصنا الاتفاق على انه يعدل الباب على البارد ب 100 جنيه وخلصلى الباب فعلا وأنا كنت كلمت السواق وعرفته الدنيا ماشية ازاى وقلتله أنا حادفع النص وانت النص ففرح الراجل جدا وجابلى الفلوس على البيت .

اللى كان مدايقنى انه من أول صاحبى اللى فى المحل مرورا بالناس والسمكرى والميكانيكى والكل بيقولى بلاش العوض وده راجل سواق غلبان والحمد لله الموضوع جه على قد كده ، مش عارف ليه الناس واخدة فكرة ان اللى معاه عربية ده يبقى واحد الفلوس على قلبه قد كده !!

والحمد لله على كل حال

مش قولتلك غير اسم المناور ده ادي يا عم اخرة المناوره عربيتك خدت قلم علي خدها مخدتتهوش واحدة من جوزها في ساعة الظهرية معلش يا جميل قدر الله وما شاء قعل وبسيطة لعلمك علي البارد وهترجع زي ما كانت