بصوا يا جماعه الصوره دى هيا دى عقدتى اللى منكده عليا فى السواقه

[SHERIF MARLBORO]

المشاركة الأصلية كتبت بواسطة ahmedraafat00 ما هو انا ياباشا بخاف لو خدتها على واسع اخبط او احك فى العربيه اللى عالجنب التانى

طيب بتاف ليه مهو انت هتشوف فى مرايت الجنب ازاى كانت هاتحك ولا لا؟؟صح؟

[mm_champion]

ولا عقدة ولا حاجة انا بقالي برضه حوالي 6 شهور بسوق , وكله مر بالموضوع ده , وعن نفسي الباب عندي فيه خدش بسب الركنات , بالنسبة للصورة اللي انت حاططها أولا حاول تدخل براحة خالص ( لو عربيتك مانيول هات الأول وامشي دبرياج بس ) عشان لو حسيت انك هتخبط تلحق تفرمل ولو خبطت متبقاش فيها حاجة , المهم خليك مركز عينك على طرفي كبوت العربية , وبعد ما تاخد اللفة تبص في المراية اليمين والشمال عشان تشوف جوانب العربية هتدخل ولا لأ , بس شوية شوية هتخدها وانت على التاني كمان هههههههههههه
بالتوفيق

[ahmedraafat00]

المشاركة الأصلية كتبت بواسطة د.هبه77 هو اولا متعتبرهاش عقدة دة اهم شئ ثانيا قبلها تدي فلاشر انتظار عشان اللي وراك ميبكبسش ثالثا بقي لو زمر متركش معاه لان انت من حقك توصل للمكان اللي انت عايزة من الطريق اللي انت تعرفه وزي ما استاذ شريف قالك لو لقيت نفسك خلاص هتخبط في العربيات اللي عالشمال في الشارع الجانبي ممكن تاخدها علي مرتين يعني ارجع تاني مارشدير شوية صغيرين وانت كاسر الدركسيون اقصي شمال ...... وبعدها اقف واكسر الدركسيون يمين وادخل في الشارع الجانبي وممكن تجرب الموضوع دة في مكان معليهوش ضغط وفي اوقات غير الذروة

شكرا يا د- هبه على الرد والنصيحه وان شاء الله هنفذ النصايح وربنا يقدم اللى فيه الخير

[ahmedraafat00]

المشاركة الأصلية كتبت بواسطة SheNo0o ممكن اسالك سؤال انت عندك حاجه في نظرك ؟ انا عندي المشكله دي ف المسافات والابعاد لان عندي عين مش مظبوطه وفيها حول وكده بالتالي الجمب اليمين عندي مش مظبوط بس وسع لنفسك وانت داخل شويه وحمل علي الجمب المظبوط عندك القريب منك وامن برده علي الجمب اليمين البعيد عنك وممكن كمان علي فكرة يكون مش العيب فيك واهم حاجه متخليهاش عقده عندك ممكن تكون مشكله الناس الي ركنه طالعين برة الشارع جدااا والركنه مش مظبوطه ف عادي يامعلم متقلقش نفسك واتكل علي الله وكله بيخبط يعني مانت عارف انا اتخبطت الجمب كله والعربيه واقفه وانا في البيت فوق

لا معنديش حاجه وهقولك حاجه انا لما كنت رايح اعمل الرخصه اول مره وقع وقعه جامده عالسلم ففى واحد ست اللى تقريبا بتمضى على الملف شافتنى مش ماشى كويس فعملتلى كومسيون طبى و روحت الكومسيون الطبى وكشفوا عليا و على نظرى وطلعت لائق ومكتبوليش حتى نضاره طبيه !
وطبعا شكرا ياباشا على ردك واهتمامك وفعلا في ناس بتبقى راكنه ركنات غبيه وبيزعلوا لما يتحكوا

[ahmedraafat00]

المشاركة الأصلية كتبت بواسطة mm_champion ولا عقدة ولا حاجة انا بقالي برضه حوالي 6 شهور بسوق , وكله مر بالموضوع ده , وعن نفسي الباب عندي فيه خدش بسب الركنات , بالنسبة للصورة اللي انت حاططها أولا حاول تدخل براحة خالص ( لو عربيتك مانيول هات الأول وامشي دبرياج بس ) عشان لو حسيت انك هتخبط تلحق تفرمل ولو خبطت متبقاش فيها حاجة , المهم خليك مركز عينك على طرفي كبوت العربية , وبعد ما تاخد اللفة تبص في المراية اليمين والشمال عشان تشوف جوانب العربية هتدخل ولا لأ , بس شوية شوية هتخدها وانت على التاني كمان هههههههههههه بالتوفيق

شكرا يا باشا على ردك واهتمامك و ان شاء الله هنفذ النصايح دى بس عندى سؤال بما اننا لسه جداد فى السواقه انا ساعات بحس ان بوظ العربيه خلاص هيخبط ولو نزلت بصيت بلاقى فى مسافه كافيه انها تعدينى هل انا لوحدى كده ولا حضرتك واغلب اللى الناس مروا بالمرحله دى ؟