تجربة سنتان مع A113

[eng/walaaeldeen]

المشاركة الأصلية كتبت بواسطة mhamdy75 مشكور على نقل التجربة وعلى التقرير وجرب تحب العربيه هاتحبك انا كان عندى زمان فيات 132 كانت دائماً لمّا تحب تعطل تعملها تحت البيت أو جنب ميكانيكى وده كلام جد والله

السلام عليكم
فعلا في عربيات بتكون اصيله مش خسيسه
زمان كان معايا 505 الحمد لله عمرها ما عطلت بره المنيا كانت اصيله بمعني الكلمه توصلني من السفر وبعدين تديني في مصاريف المهم وانا مسافر حتى وهي عطلانه كانت تطلع من البلد احس انها سياره تانيه خالص
والله المستعان

[nawwara]

جزاك الله خيرا على نقلك لتجربتك
لعل غيرك يستفيد بها
وربنا يعوض عليك خير ان شاء الله
انا قريبى شاريها من سنتين ومطلعة عينه ومكفرة سيئاته برده

[queen]

والله انا هقفل بيها 8 ألاف ان شاء الله وربنا يستر
مقدرش احكم عليها دلوقتى خاصه انى خبطتها اكثر من مره وغيرت المساعد مرتين لكن عيبها الاساسى العفشه ناشفه جدا وبتحسسسسنى بكل ذرة تراب فى الأرض . وتكييفها ضعيف بصراحه مبيعملش حاجه فى الصيف
لكن بالمقارنه بسعرها تعتبر كويسه أوى . ومفيش عربيه كامله الكمال لله وحده
وفعلا جرب تحب العربيه هتحبك

[shoshovet]

اولا تسلم ايدك علي نقلك لتجربتك مع 113
وربنا يعوضك احسن منها ان شاء الله
ومعلش بقي اسمحلي اني اختلف معاك في شوية حاجات
1- البطارية تعبت (قد يكون نوعها مش قد كده وخلي بالك ان اي بطارية وخاصة الجافة لها عمر افتراضي اعتقد 3 سنين ولو العربية سبتها مده كبيرة من غير ما تدورها ده بيأثر علي البطارية اي كان نوعها) وعموما البطارية مقدور عليها.
2- هو الماتور عموما صوتة عالي شويه وده لان عزل الصالون مش قد كده والماتور تحس انك لما تفتح الكابوت انه داخل علي الصالون بس ما دام الاداء تمام و مفيش هزة ولا حاجة خلاص كبر دماغك (وبعدين ممكن يكون بيعلي وانت في الزحمة ولما المروحة بتشتغل).
3- العفشة ناشفة شوية بس انا عندي اللحمد لله العفشة بقت تمام والحل بسيط ( تملأ العجل نيتروجين وبالتالي الضغط هيفضل ثابت ومش هيزيد مع الحرارة وما تنساش اي مطب لازم تاخذه علي الهادي السرعة تقريبا من 10-15 وواحدة واحدة هتتعود علي الطريقة دي)
وبعدين الاصوات اللي عندك ناحيه اليمين بعد الحادثة ولا هي كده من الاول (بس ربنا يصبرك لان الهاجات دي بتخلي الواحد زهقان من العربية واليوم اللي جابها فيه)
4- بانسبة للكاوتش فالصح انك كل 10000 او 8000 كم تدور عشان التاكل يبقي واحد في 4 فرد (انا لقيت الكلام ده مكتوب في الكاتلوج الاجنبي بتاع العربية).
5- بالنسبة للبلاستيك بتاع المساحة فده حصل معايا تقريبا بعد سنة و3 شهور (حجة بسيطة).
6- الكاسيت دي اكيد مشكلة (بس انا لقيت بردة ان الصح انك وانت بتدور العربية لازم يكون الكاسيت والنوار مغلقة لان اثناء الدوران كهربة العربية مش بتكون ثابتة وده ممكن يأثر علي الحاجت دي)
7-بالنسبة للضمان (فانا شخصيا نفسي اطلع بس اديني بقول خليك معاهم وربنا يسترها).
8- اما بالنسبة للفتيس فانا معاك انه ساعات بيعض (بس انا رحت للتوكيل والصراحة انهم حلوا لي الموضوع هما علوا الدبرياج شويه والمهندس قالي اغير الدواسات اللي انا كنت شاريها لانها ناشفة ومش بتخليك تتدوس علي الاخر وعدها المشكلة اتحلت الا اذا انت نسيت ولم تدوس علي الاخر ).

وعلي اي حال ربنا يصبرك وعلي فكرة انا معايا 113 وما شاء الله داخلة علي سنتين الا ربع (27000 وشوية فكة) واللحمد لله زي الفل ولا اذكر اني رحت بيها مرة لميكانيكي او عفشجي( بس انا من النوع اللي بيحافظ علي الحاجة زيادة عن اللزوم).

وكل سنة وانت طيب

[maxxatta]

شكرا لكل من رد وشكرنى
على فكرة على رغم العيوب او المشاكل الى ذكرتها انا بحب عربيتى لكن الى مزعل الواحد هو انها كان ممكن تكون افضل لو التوكيل اهتم بالتقفيل