هوندا أو اكسنت مستعمل و لا فيرنا أو سبيرانزا جديد

[dr3mb]

فيرنا جديد طبعا

[Tota El Masry]

المشاركة الأصلية كتبت بواسطة صانع الخيال هههههههههههههههههههه انتى بتفتحى موجة كوميدى كتير ايه العسل دا كلو لو معاكى كاش حق الزيرو هاتى زيرو احسن اما لو ميكملش حق الزيرو يبقى خليكى فى المستعمل لحد ما تحوشى وتبيعها وتجيبى زيرو لان انا هعمل كدا بردو والاكسنت عربية جميلة انا هجيبها ان شاء الله واى خدمة

جزاكم الله خيراً أخي "صانع الخيال" و ربنا يديك خيرها و يكفيك شرها و يرزقنا جميعاً بالصالح الحلال

[Tota El Masry]

المشاركة الأصلية كتبت بواسطة screamseko ههههههههههههههههههههههههه بصي يا توته من الاخر تعتمد علي سواقتك يعني سوقتي في الشارع وسط العربيات ولمين وشمال والدنيا حلوه ومحتاجه بس تقوية قلب يبقي خليكي في الزيرو وحتتعودي عليه بسرعه وربنا يباركلك فيه ان شاء الله ولو لا والدنيا صعبه شوية ولسه بتاخدي وتدي مع الطريق يبقي عليكي وعالمستعمل النضيف 128 ولا حاجه تعد معاكي سنه ولا سنه ونص وبعد كده تطيري عالزيرو وتبقي اجدعها من ايها محترف في مصر :D:D وويوم محتبعيها مش حتخسري فيها كتير وفرصه تكوني جمعتي تمن زيرو نضيف وياحبذا فيرنا اوتو حمرا ويسلام لو في بينك ^^ ربنا يهديكي للي فيه الخير والنصيب ان شاء الله اخوكي في الله محمد

_________________________ __

جزاكم الله خيراً أخي محمد
فيرنا بينك أوتو - والله لو حشتري أوتو يبقى فوشيا أو تركواز بلاش البينك لحسن المعلم بعضشي يفككها الله أكبر زي مسرحية سيدتي الجميلة لما فك عربية فؤاد المهندس البمبي المسخسخ
أنا شفت لون I30 ما شاء الله لا قوة إلا بالله و السليز مان قالي أركبيها و ساعتها كانت بحاجة و تسعين بس بصراحة مش بحب أحط رجلي في حاجة أكبر من إمكانياتي
"أنا ملكة طالما إني على قدي"
و ربنا دائماً بيديني 72 قيراط و لله الحمد و في قمة الرضا عن حالي بس ربنا يرضى عني و عنكم جميعاً

[Tota El Masry]

أخوتي الكرام

بصوا بقى فيه ناس بتقول : " تغور من وش منصور و غبور"
و من تجربة البعض بقول: " أبو الفتوح زي ما تيجي زي ما تروح"

يبقى ورقة و قلم و نحسب و نستخير ربنا زي ما الرسول الكريم قال : أعقلها و توكل يعني أحسب الأول و استخير ثم أتوكل:

مستعمل محترم(1600 سي سي)
= 50 ألف+سوم + تأمين + صيانة و تغيير فرش = 55 : 60 ألف
مستعمل نص نص(800 إلى 1200 سي سي)
= 25 ألف+سوم + تأمين + صيانة و تغيير فرش = 35: 40ألف
يفضل مع توتة من 8 : 15 الف خلال خمس سنين بتوع القرض

جديد فيرنا (1600 سي سي)
= 69ألف+ رسوم+تأمين+شنطة عدة و إنذار = 75 ألف
و توتة تستلف من سواقين التوكتوك أربع مخرومة تكمل بيهم بس حاجة محترمة تعيش و بياعة
جديد سبيرانزا (1300 سي سي)
= 56 ألف+ رسوم+تأمين+شنطة عدة و اكسسوارات = 60 ألف
يعني بارك الله فيما رزق و مد لحافك على قد رجليك و أشرب مقالب صيني و يمكن ربنا لو أحسنت الظن فيه و حافظت على عربيتك تعيش الـ 5 سنين بتوع القرض


المشكلة أني استخرت ربنا و حلمت بحاجة شبه (سبيرانزاA113- هيوندايI10-شيفروليه سبارك - كيا بيكانتو)

بس نفسي مرتاحة للفيرنا الهاف مانيوال الزيرو للأسباب التالية:
1- موتور 1600 سي سي و تكيف تلاجة و ركبتها كثير تاكسي و إيجار(4)
2- قطع غيار متوفرة و لو إن آخر الفيرنا يناير 2013 و الإنتاج حيقف(5)
3- أي بلية في بيبي كلاس ممكن يصلحها في غمضة عين(5)
4- سعر إعادة البيع حلو جداً و دورته قصيرة(4)
5- ممكن آخد العيلة معايا في مشاوير البيت(3)
6- الصيانة قريبة من البيت جداً(4)

و في نفس الوقت سبيرانزا رائعة للأسباب التالية:
1- سعرها مناسب كبداية لسيارة شبابية سوبر ميني في فئتها(5)
2- صيني مش حتتحسد قوي و حجيبها شامبين (الأحمر ملفت للنظر قوي)(2)
3- أوبشنز رائعة(سنترال-ريموت-فوانيس شبورة-طي مقاعد-راديو سي دي)(5)
4- ممكن أركنها في أي حتة و خصوصاً إن شارعنا جراج المنطقة كلها و زحمة(3)
5- موفرة في البنزين جداً(5)

نيجي للعيوب:
الفيرنا:
1- بعض الكماليات الهامة ناقصة(سنترال-ريموت-فوانيس الشبورة)(2)
2- بتستهلك بنزين شويتين(3)
3- بتعوم على السرعات العالية و مش فرامل ABS (1)
4- ناس بتشتكي من التوكيل زي كل توكيلات مصر(4)
5- سعرها غالي شويتين بالنظر للتقفيل المصري ( و لو إني بشجع المصري)(3)
6- سعرها مكلف حالياً بالنسبة لي في أدنى فئة(5)

سبيرانزا:
1- موتور صغير و سحبها مش قد كده(4)
2- خامات الصنع فيها جدال(4)
3- قطع الغيار غير متوفرة و غير معمرة(4)
4- ناس بتشتكي من التوكيل زي كل توكيلات مصر(4)
5-صغيرة الحجم لا تتسع لأربع أشخاص بالغين ( حجم مصري أصيل)(4)
6- الصيانة بعيدة عن البيت جداً (2)

ندي نقاط لكل بند من 1 إلى 5 درجات من الأعلى للأقل في المميزات و العكس للعيوب زي ما بعمل في كل حاجة في حياتي

النتيجة(وجهة نظري الشخصية من خلال سماعي لملاك السيارتين و جولتي في النت و الله أعلى و أعلم بالحقيقة و "في السماء رزقكم و ما توعدون"):
الفيرنا 25 مميزات إلى 18 عيوب
سبيرانزا 21 مميزات إلى 22 عيوب

و في النهاية كل شيء نسبي
الفيرنا مميزاتها 58% و عيوبها 42% من التقييم النهائي
سبيرانزا مميزاتها 48% و عيوبها 52% من التقييم النهائي

لذا أريد تجربة أحدكم الفعلية العقل قبل القلب و لا القلب قبل العقل
فلاخاب من استشار
و لا ضل من استخار

و نسألكم الدعاء بإن ربنا ينورلي بصيرتي يهديني للصالح

أختكم توتة المصري

[خالداعزالناس]

هيونداى فيرنا ,,,,,,, أفضل الحلول