سؤال هام بخصوص السيراتو 2010

[etsh1413202]

هي العربيه كويسه ..... بس هنا فى مصر مش مقياس ابدا ان العربيه الى بتتباع كتير عربيه خرافيه

هتلائي ان افضل الفئات في العالم هى اقل مبيعا في مصر حتى لو سعرها مناسب ..... زى المازدا 3 والفورد فوكاس والفيات ليينا والسوزوكي sx4 ............ كل دى عربيات برقبه السيراتو بس السوق هنا تفكيره غريب ..... وما تبنيش تقييمك للعربيه انها وحشه عشان بتتباع وهى كسر زيرو ...... هتلاقى الانسر شارك والكرولا وموديلات كتير بتتباع كسر زيرو

بس رايى الشخصي متفق مع الدكتور عبد السلام ....... توكل على الله وهات النترا

[مورو]

كدا انتو ريحتونى الله يكرمكم

[khaled al sharif]

بسم الله الرحمن الرحيم
الحقيقة دي أول مشاركة لي في المنتدي من ساعة ما تعرفت وإشتركت فيه ... طبعا شاركت بأراء بسيطة لأني كنت بتابع النتدي وإتجاهاته ... والحقيقة هو منتدي جيد جدا وعملي وإن كان بحس أحيانا إن في مشاركات إما لهدف منها الدعاية لفئة سيارات معينة أو التأثير علي سمعة بعض السيارات وطبعا صوابعك مش زي بعض وحرية التعبير مكفولة للجميع المهم تعالوا بقه للغرض من المشاركة دي
أخوكم بيسوق ملاكي من سنة 79 حتي الأن يعني من ايام ماكنت في الجامعة
سوقت الياباني والإيطالي والألماني والأمريكاني وأقصد بسوقت يعني السيارة كانت بتعد معايا علي الأقل من ثلاث سنوات حتي خمسة فيما عدا الكامري ظلت معايا لحد ماتركت السعودية ونزلت نهائي يعني حوالي سبع سنين
المهم أنا إشتريت كيا الفورتي أو النيو سيراتو زي الناس ما بتحب تسميها السيارة عامله معايا 1800 كيلو وهي مواصفات خليجي هاي لاين
طبعا مش عشان إشتريت السيارة ها أبتدي أعمل ليها دعاية سواء سلبا أو إيجابا للأسباب التالية
حكمك علي السيارة أيا كان درجة خبرتك بالسيارة سوف ينقصه كثير من النواحي الفنية والتقنيه إللي أصبحت أصعب من ذي قبل
أي سيارة أيا كانت ماركتها عرضة لأخطاء التصنيع وليس أدل علي ذلك من سحب شركات عملاقة ملايين السيارات من أسواق عالمية وليس محلية كأسواقنا مع الإعتراف بوجود أخطاء قد تكلف الناس أحيانا حياتها كما في ال2ونص سيارة ياباني أللي سحبتهم تيونا عشان دواسة البنزين بتعلق بتنزل وما بتطلعش ...ده مش معناه توتا وحشه
للأسف الوكيل عايز يكسب كام دي أول متحكم في سعر السيارة وأسعار الصيانة وقطع الغيار وقد لا يكون للأمر علاقة من بعيد أو قريب بدرجة جودة السيارة من عدمه
كمان معايير الحكم علي السيارة بيختلف من ثقافة بلد لثقافة بلد أخر يعني مثلا مثلا بلد زي أمريكا أو ألمانيا طرق سوبر مفيهاش ربع متر بايظ وفيه حرية تجارة ومنافسة شريفة بدون ضرائب تعسفية ومستوي دخول متنوعة لكنها بأي حال ليست مثل مستوي دخولنا اللي هايشتري سيارة هناك هاتكون ليه معايير مختلفة عنا في مصر مثلا ههما هايهتموا بالمظهر الجمالي ومعايير السلامة وجودة الخامات ... إخنا ها نهتم بالعفشة القوية وأسعار الصيانة وقطع الغيار وسعر ما بعد البيع ... الثقافة ومستوي الدخول بيخلي مثلا الكيا الخليجي يتمتع بمزايا ترفيهية أعلي من الكيا المسوقة في مصر لأن مستوي الدخل والثقافة العامة ما زالت هي المتحكم الرئيسي يعني في أوربا مفيش مشكلة يجرب السيارة دي ولو معجبتوش مش ها يشتري النوع ده تاني ... معاه فلوس
أخر حاجه لازم تسأل نفسك إنت عايز السيارة ليه .. عائلية ولا سبور شخصية ولا للعمل مشوار طويل يومي مشوار صغير يومي ولا كل ده
تعالوا بقه زمنكم بتقولوا قلنا ياعم وجعت دمغنا إنت جربت السراتو وحشه ولا حلوه ... يبقي مفهمتش إللي أنا قلته ... ده رايا وبتحكمه خبرتي وثقافتي ... ممكن تكون دي أفخم سيارة سوقتها عشان مركبتش قبل كده غير الأقل منها أو ممكن تكون أسوأسيارة عشات ركبت أفخم منها .... وبعدين لا يمكن تحكم علي سياره فنيا أو متانة خامات وقوة متور إلا بعد فترة في رأي مش أقل من عشرة الاف كيلوا متر .... عموما السيراتو متور قوي فنش معقول جدا أوبشن عالي بسعر مناسب ويتبقي التجربة هل السيارة ستثبت أنها بحق مميزه ولا لا.... العفشه ناشفه شويه بس ده مش عيب لأن فيه عربيات كتير سوقتها ماركات قوية عفشتها ناشفة وأثبتت كفاءة .... خامات التابلوه مش فاخمة فرست كلس وده متوقع ولما تكون بتشتري سيارة بالسعر ده بس له ميزه إنه سهل التنظيف .... شكل السيارة هجومي شوية ودي حاجه ناس بتحبها وناس تانيه ها تفضل الشكل الوقور زي الكروز أو غيرها ... أزواق ونصيحة لكل إللي عايز يشتري سيارة لازم يحدد زوقه أولا وبعدين يسأل عن المفاضله مش معايا كذا أشتري إيه ... معلش عندي كلام كتير بس عشان الشغل إللي عنه سؤال محدد عن السيراتو ممكن أرد عليه لو كنت أعرف ... وحبي لجميع أعضاء المنتدي المحترمين

[joophy]

أتفق معاك يا اتش فى ان السوق المصرى له اتجاه مختلف تماما حيث انه السوق الوحيد اللى اسعار المستعمل فيه بتزيد مش بتنزل على عكس الدنيا كلها كذلك معرفش احنا ليه مصرين على الكورى لحد ما سعره بقى اعلى من عربيات تانية كتير احسن وانضف منه. يعنى احنا ليه مثلا ما بنفكرش فى عربية زى السيات او الفولكس العربيات دى يا جماعة ممتازة وبنفس السعر تقريبا وفى نفس الوقت عوامل الامان اكتر بكتير . على فكرة انا كنت بافكر فى سيات كوردوبا بس لما لقيت الناس كلها رايحة على السيراتو غيرت رأى بس دلوقتى بعد كلامك انت والدكتور انا هعيد تفكير من تانى عموما الف شكر ليكم جميعا.

[Dr. Bolbolan]

المشاركة الأصلية كتبت بواسطة joophy أتفق معاك يا اتش فى ان السوق المصرى له اتجاه مختلف تماما حيث انه السوق الوحيد اللى اسعار المستعمل فيه بتزيد مش بتنزل على عكس الدنيا كلها كذلك معرفش احنا ليه مصرين على الكورى لحد ما سعره بقى اعلى من عربيات تانية كتير احسن وانضف منه. يعنى احنا ليه مثلا ما بنفكرش فى عربية زى السيات او الفولكس العربيات دى يا جماعة ممتازة وبنفس السعر تقريبا وفى نفس الوقت عوامل الامان اكتر بكتير . على فكرة انا كنت بافكر فى سيات كوردوبا بس لما لقيت الناس كلها رايحة على السيراتو غيرت رأى بس دلوقتى بعد كلامك انت والدكتور انا هعيد تفكير من تانى عموما الف شكر ليكم جميعا.

والله أنا مش عاوز كلامى يتفهم غلط ! أنا عملت موضوع عن انطباعى لآول 700كم للسيراتو ! يعنى ماركبتش

منهم 400كم وقل ت انطباعى الآولى بس مع خبرة 45 سنه فى السيارات ! والنتيجه اللى وصلت لها يمكن أستاذ

خالد الشريف لمح لها ! وهى ان كل سياره لها عيوبها و مميزاتها ! والسيراتو بالذات زى ما أنا شايف لا تصلح

للغالبيه العظمى للناس اللى فى مصر ! أقصد الناس اللى بتدور على السياره المعجزه اللى مافيهاش غلطه واللى

مش ح توجع دماغه ! لكن فيه بعض الناس واللى أنا منهم ممكن تتغاضى عن حاجات مقابل حاجات تانيه !

لذلك فى مشاركتين سابقتين اللى سألونى صراحة أو حملونى أمانة انهم يشتروا سيراتو ولا النترا ؟

أنا قلت له النترا ! مع ان أنا نفسلى لسه شارى السيراتو ! بس علشان أخليهم فى المضمون ! ولآنى يمكن أغير

رأيى بعد كام شهر أو سنه ! ما أبقاش ضللت أحد !

Dr. Bolbolan ptmnlo123per122