هل 78000 سعر مناسب b15 2011

[silentman84]

المشاركة الأصلية كتبت بواسطة عصام غنايم ايووووووووووووووووووووه بوظوا التوكيل علينا وخلوه يتدلع بزياده العربيه انا ركبتها فعلاٌ جميله بس لما التوكيل فى كام شهر يزود 8 آلاف جنيه ده حرام والمفروض اننا نبدى الاستياء على الاقل علشان ميسوقش فيها لان كده طمع من سعرها الاول والتوكيل بيكسب صح ؟ يبقى ليه الاسلوب الزباله ده انا طبعاٌ عارف ان ملاكها الحاليين فرحانين بزيادة السعر ( بدليل ان قريت موضوع واحد عايز يبيع ب 75 ألف عربيه جايبها من كام شهر ب 70 ألف ) بس بصفه عامه اللى التوكيل بيعمله ده طمع وجشع واستغلال ومتنسوش ان كل توكيل بيبقى له عيون داخل منتديات السيارات الكبيره ( زى مصر موتورز ) يعمل المصيبه من دول ويشمشم ايه اخبار رد فعل الناس ( ده حتى ساعات لما يحبوا يعملوا مصيبه يطلعوها اشاعه اول ويشوفوا رد فعل الناس لو عدت يعملوا العمله وهما متطمنين ) وطبعاٌ ده وضع البلد اجمالاٌ يبقى اقل واجب علينا اننا نعارض اللى بيحصل ده ( صحيح العربيه حلوه وانا معاها ) بس مش مع التوكيل وعلى فكره توكيل لسه بادئ و منتشرش فى السوق ويبقى ده تفكيره ( استغلال وطمع من الأول ) انا والله اخاف اجيب منهم عربيه لأن العربيه فى الأول قطع غيارها هتبقى حكر عليه ومش موجوده فى السوق ( وطبعاٌ مبدأ الاستغلال موجود ) يبقى هيعمل فيى ايه لو احتجتله فى خبطه ولا حاجه كبيره فى العربيه ؟؟؟؟؟؟؟؟؟؟ اكيد هيظبطنى خلاصة كلامى اننا منجريش ندافع عن توكيل بيحاول يسرق اخواتنا اللى عايزين يشتروا العربيه ( واللى لو احنا مكانهم مش هنبقى مبسوطين بالزياده الكبيره دى ( كده زودها 12% ) من حقها ) وبخاصه ان محدش فينا هيقسم مع صاحب التوكيل يبقى ليه اساعده انه يسرق اخويا ؟ على العموم ده رأيى الشخصى وآسف مقدماٌ لأى حد ممكن يزعل من كلامى

كلامك مظبوط وده كنت عايز اقوله وسبق انى اتكلمت على المبالغه فى السعر وجشع وطمع التجار وده مش موجود فى العربيه دى بس لا فى اى توكيل تانى سواء كورى ولا يابانى مش عارف التجار بتعمل كده ليه احنا اللى بنخليهم يعملوا كدا فينا ويدبحونا ويسلخونا ويشونا على الجنبين زى السمك المشوى ولو نقف يد واحده مع بعض مش حنخلى اى توكيل منهم يدلع ونوقفه لحده ساعتها يحترم نفسه ويبيع بالسعر الرسمى وفى مثال ابو الفتوح نزل ثمن الام 11 من 75 الف الى 69900 لما الناس اشتكت من تسقيف الماتور والتقفيل بتاعها وبدأت مبيعاتها تقل فقالك لا انزل السعر علشان ارضى الناس والعربيه ماتقفش عندى على الفاضى وبرده كسبان منها يعنى ينزل 5000 جنيه وبرده كسبان فما بالك بقى 8000 جنيه زياده فى الجاك يبقى التاجر كسبان اد ايه وانا معترف انها عربيه كويسه بس بدون مبالغه فى السعر وزى ما التجار عامله حزب علينا احنا كمان نعمل حزب عليهم يعنى منتدى الجاك مثلا كل الناس اللى عاجباها العربيه وعايزه تشتريها تجمع نفسها ونتفق مثلا مش حنشترى الا مايظبطوا السعر ياكدا ياإما خليها عندكم زى مالناس بتعمل كدا بره فى اوروبا وامريكا لما اى حد يستغلهم لازم نقف واقفه يد واحده مش فى منتدى الجاك بس لا فى كل الانواع والفئات يمكن نقدر نغير من الوضع السىء الحالى من نحيه طمع التجار ونظام الاحتكار

[temo]

احيكم على الكلام الجميل ده
ولاكن لا جدوى
مش في التجار والوكلاء
ولكن فينا

كنا ماشتريناش الطماطم لما بقى سعرها 10 جنيه !!

[سيف الدين سعيد]

المشاركة الأصلية كتبت بواسطة temo احيكم على الكلام الجميل ده ولاكن لا جدوى مش في التجار والوكلاء ولكن فينا كنا ماشتريناش الطماطم لما بقى سعرها 10 جنيه !!

كلامك مظبوط . والعربيه مش حاتقف سوقها . وماتفتكرش ان كل الناس اللى عايزه تشترى عربيه ايا كان نوعها اعضاء فى منتديات سيارات او حتى حايقتنعم بموضوع المقاطعه دا .

[ahmed1981]

المشاركة الأصلية كتبت بواسطة سيف الدين سعيد كلامك مظبوط . والعربيه مش حاتقف سوقها . وماتفتكرش ان كل الناس اللى عايزه تشترى عربيه ايا كان نوعها اعضاء فى منتديات سيارات او حتى حايقتنعم بموضوع المقاطعه دا .

العربيات هي التي ستؤدب بعضها

كل شوية عربية جديدة تنزل وتاكل الجو لغاية لما تنزل واحدة أحسن منها تضربها
والصين ما بيناموش
وزي ما الجاك طلعت فجأة بدون تاريخ أو أي مقدمات سنجد غيرها يطلع بنفس الطريقة ويضرب الجاك
والمستهلك هو المستفيد

وعموماً المتوقع حالياً هو دخول سيارات أوروبية المنافسة في السوق لضرب السيارات الآسيوية
كل سنة جمارك الأوروبي تنزل 10%
كمان سنتين الأوروبي هيضرب الياباني والكوري ويمكن الصيني كمان
لذلك بعض التوكيلات بتحاول على قد ما تقدر تجمع أعلى مكاسب قبل تغير الوضع

[د.كمال]

الكلام ده قلناه من10 سنين ومفيش حاجه رخصت .......شوف لما الدايو اول منزلت كانت ب45 الف وكورى شوف دلوقتى بكام وتقفيل محلى والانسر اول منزلت 2002 كانت ب72 الف شوف دلوئتى بكام ......مفيش حاجه بترخص فى بلدنا واللى مش هيركب عربيه دلوئتى مش هيعرف يركب بعد كده ............شوف الحديد والاسمنت بئوا بكام وكانوا بكام ............خلينا نعيش فى الواقع المرير احسن منعيش فى اوهام جميله.....