عربية تقيلة ولا خفيفة؟؟؟ طبعا الخفيفة أحسن

[borio1704]

المشاركة الأصلية كتبت بواسطة aymanemen السلام عليكم تسلم إيدك ودماغك يا هندسة ...... بس فيه حاجه عايز أستوعبها أكتر أنت قلت : إحنا كنا اتكلمنا قبل كده على نظام التعليق وإنه يشيل وزن العربية ويحافظ على ثبات وضعيتها... طيب وزنه هو أخباره إيه؟؟؟ يعني وزن نظام التعليق نفسه مهم ولا لأ؟؟؟؟ في الحقيقة كل ما كان أجزاء نظام التعليق خفيفة كل ما كان ليها القدرة إنها تمسك في الطريق أحسن، لإنها بتبقى خفيفة فالسست بتحرك العجل بسهولة وتخليه دايما ملامس للأرض بكل تفاصيلها، وزن أجزاء التعليق دي بيسموها "الكتلة غير المحمولة" أو "Unsprung Mass"، العربيات الجديدة بيبقى فيها مقصات ألومنيوم عشان السبب ده، ومن أحسن الطرق عشان نقلل الوزن ده هي تركيب جنوط ألومنيوم (كثافة الألومنيوم = ⅓ كثافة الحديد). مش واخد بالي ؟؟؟؟؟ كنت متصور أن العجل لو أثقل فوزنه العالي يساعده على الالتصاق بالأرض أفضل ..... يعني إزاي السوست بتحرك العجل الخفيف أفضل ؟؟؟؟ كنت فاهم أن العجل بيتحرك صعوداً وهبوطاً أثناء حركة السيارة بناءاً على تضاريس الطريق على أن تقوم السوست بامتصاص هذه الحركة ومنع وصولها للركاب ..... يعني المفروض أن قوة ضغط السوست على العجل يكون لها علاقة فقط بوزن الجزء المحمول العلوي مع كمية الطاقة التي تخزن في السوست بناءاً على تصميمه والمواد المصنع منها .... وبالتالي فالكتلة ( الغير محمولة ) الخاصة بالعجل المفترض ألا تؤثر على قوة السوست الضاغطة عليها ... وكنت أظن لذلك أن زيادة هذه الكتلة الغير محمولة والموجودة على الأرض مباشرة تؤدي لاستقرار أفضل للعجل على الأرض !!!!! ومع معلومات حضرتك دي يبقى عندي لخبطة كبيرة في الموضوع ............... معلش يا هندسة ... أرجو ما أكنش زهقتك بس والله عايز أفهم الموضوع بوضوح ألف شكر مقدماً وجزاك الله عنا خيراً

أزهق إزاي بس؟؟؟ والله الأسئلة دي هي اللي أنا باستفيد منها ، لإني بحاول أدور على معلومة موثقة عشان أقدر أرد وأنا متأكد


أولا.. عايز أوضح إن الكتلة غير المحمولة (أو "غير المنبوضة") ما هياش العجل وبس... إنما داخل فيها كل ما يمت لنظام التعليق




فيه ناس بتقول لو الجزء ده اتحرك مع المطبات .. يبقى ده وزن غير محمول
ولو الجزء ده اتحرك مع جسم العربية... يبقى دة وزن محمول

والأجزاء اللي تعتبر وزن غير محمول هي:
* الجنوط والكاوتش
* وصلات التعليق (المقصات - الاستابليزر - الشدادات)
* جهاز الفرامل (الطنابير والتيل)
* السست والمساعدين
* الكبالن (في الدفع الأمامي) أو أعمدة نقل الحركة (في الدفع الخلفي)
* عمود الكردان والكورونا (في الدفع الخلفي) خاصة إذا كانت مجموعة نقل الحركة من النوع المتصل
* وصلات التوجيه








طيب... خلينا نجاوب بقى

كلام حضرتك مظبوط... بس في حالة إن الأرض تكون مستوية، وكمان الموضوع بيستوجب إن الكاوتش هو نفسه يكون (High Profile) أو ارتفاع جانب الإطار يكون كبير، بحيث إن الكاوتش يبقى هو نفسه بقى عبارة عن سوستة بتمتص الصدمات قبل ما تنقلها للعجل

إنما في حالة إن المطبات صغيرة وكتير .. الحالة هنا بتختلف


هسألك سؤال ، ولما تجاوب عليه أعتقد الصورة هتبقى أوضح

أنهي أسهل... تحريك وزن تقيل أم تحريك وزن خفيف؟

الخفيف أسهل طبعا


طيب... أنهي أصعب في السيطرة عليه... الوزن التقيل ولا الوزن الخفيف؟؟

أكيد الوزن التقيل


طيب ليه؟؟؟

عشان كل ما زاد الوزن.. زاد معاه ما يسمى بـ"القصور الذاتي" أو الـInertia


الحقيقة إنه لما وزن أجزاء جهاز التعليق بيبقى أثقل .. تحريكها بيبقى أصعب... بس لما بتتحرك .. حركتها هتبقى قوية وتوقيفها كمان هيبقى أصعب

جرب كده تجيب كورة قدم "كفر" وتربطها بحبل.. وبعدين امسك الحبل وحاول تحرك الكورة فوق وتحت بحيث يفضل الحبل مشدود

اعمل نفس الحركة دي تاني... بس غيّر الكورة بواحدة تانية أخف (أو حتى بالونة)، وشوف الفرق

في الحالة الأولانية.. هتضطر تبذل مجهود عشان تسيطر على الكورة
في الحالة التانية هتقدر بكل سهولة تجيب الكورة (أو البالونة) مطرح ما انت عايز



الكلام ده شبيه جدا برد الفعل اللي بيحصل على السوست .. لو العفشة تقيلة.. هنحتاج سوست قوية وناشفة عشان نسيطر على وزن العفشة .. وده ممكن ييجي على حساب الراحة.. يمكن ده أحد الأسباب اللي كانت بتخلي العربيات المريحة القديمة ثباتها ضعيف.




المشكلة دي بتظهر بوضوح لما تبقى ماشي على أرض فيها مطبات صغيرة كتير... لو عفشة العربية كانت تقيلة.. هتحس إن العربية طايرة فوق الطريق ومش قادر تسيطر على العربية كويس لو ماشي بسرعة عالية.. عشان المطبات بتنطر العجل بعيد عن الأرض .. ولإن التعليق تقيل.. فعلى بال ما العجل يرجع يلمس الأرض تاني بتكون عدت مدة طويلة نسبيا بسبب بعد المسافة .



إنما لو العفشة خفيفة... السوست هتقدر ترجّع العجل للأرض بسهولة، وبالتالي مش هنفقد حاجة من ثبات العربية.

أرجو إن الصورة بقت أوضح



...

[aymanemen]

المشكلة دي بتظهر بوضوح لما تبقى ماشي على أرض فيها مطبات صغيرة كتير... لو عفشة العربية كانت تقيلة.. هتحس إن العربية طايرة فوق الطريق ومش قادر تسيطر على العربية كويس لو ماشي بسرعة عالية.. عشان المطبات بتنطر العجل بعيد عن الأرض .. ولإن التعليق تقيل.. فعلى بال ما العجل يرجع يلمس الأرض تاني بتكون عدت مدة طويلة نسبيا بسبب بعد المسافة .



إنما لو العفشة خفيفة... السوست هتقدر ترجّع العجل للأرض بسهولة، وبالتالي مش هنفقد حاجة من ثبات العربية.

أرجو إن الصورة بقت أوضح
[/SIZE]


...[/QUOTE]

أول ما قرأت إللي حضرتك كاتبه أنا قلت ( معلم )
دلوقتي فهمتك قوي قوي
القصور الذاتي في الاتجاه الرأسي للكتلة الغير محمولة تؤدي زيادته ( تبعاً لزيادة الكتلة ) إلى تقليل الاتصال بين العجل والأرض .......

تسلم يا هندسة .... والله معلم

أتمنى أتعرف عليك بس أنت مانع الرسائل الخاصة

[borio1704]

المرة دي هنتكلم عن أهم الأنظمة التكنولوجية اللي دخلت على العربيات عشان تحسن من ثبات السيارات...

الهدف الأساسي لمعظم أنظمة تحسين الثبات هو محاولة تقليل زحلقة الكاوتش فوق السطح اللي ماشية عليه العربية بهدف الحفاظ على العربية ماشية في خط سيرها الأصلي




على فكرة... كل الأنظمة دي وغيرها... هدفها الأساسي منع وقوع الحوادث بسبب ضعف السيطرة على العربية في المواقف الطارئة، عشان كده بيسموها أنظمة السلامة النشطة "Active Safety Systems"، لإنها بتعمل باستمرار على منع وقوع الحوادث طول ما العربية شغالة.





ولإن الأنظمة كتير وأسمائها متعددة وممكن تختلف من شركة للتانية... فهنتكلم بسرعة وبإيجاز عن أهمها والمؤثر منها في الثبات والغرض منها والفكرة في تشغيلها



نظام منع غلق الفرامل (Anti-lock Braking System (ABS

هو نظام يمنع إن الفرامل تقفش لما نضغط عليها بقوة في الحالات الطارئة

ونقدر نقول إنه أول تكنولوجيا تم اختراعها للسلامة النشطة، وهو كمان يعتبر الأساس لأي نظام تاني موجود في السيارات للسلامة أو الثبات.





النظام مكون باختصار من وحدة تحكم موجودة بين ماستر الفرامل الرئيسي والعجلات، مهمتها هي توزيع ضغط الفرامل (على شكل نبضات متتابعة) على العجلة اللي الفرامل قفشت فيها، وبيتم الكلام ده عن طريق حساسات على كل عجلة بتدي معلومات للكمبيوتر الرئيسي، وبناء عليه بتوزع وحدة التحكم الضغط على العجلة المحتاجة تغيير في ضغط الفرامل.




نظام توزيع قوة الفرامل (Electronic Brake-Force Distribution (EBD

هو نظام لإعادة توزيع قوة ضغط الفرامل على العجلات على حسب الحمل وسرعة العربية بهدف تقليل مسافة الفرملة

في العادة... الفرامل بتبقى مظبوطة بحيث تبقى قوة الفرامل اللي قدام أقوى من اللي ورا، وده بسبب إن انتقال الوزن على العجلات الأمامية في الفرملة بيخلي الوزن الفعلي فوق العجلات الأمامية أكبر من اللي ورا بكتير،



المشكلة بقى لو العربية محملة ، فيبقى العجل اللي ورا بقى عليه وزن أكبر من الأول، ساعتها هنحتاج نزود قوة الفرملة على العجلات الخلفية عشان نقلل مسافة الفرامل.







نظام السيطرة على التماسك (Traction Control System (TCS

هو نظام هدفه منع انزلاق أي عجلة من عجلات السيارة، وخاصة عجلات الاندفاع، أثناء الانطلاق أو المشي بالسيارة.

النظام ده من وجهة نظري أقوى نظام تم اختراعه حتى الآن.. وزي ما احنا شايفين... أداؤه بيتم أثناء الانطلاق... مش أثناء الفرملة

وفكرة عمله بتم برضو عن طريق الكمبيوتر وحساسات على العجلات، ولو حصل مثلا إن عجلة من العجلات بدأت تفقد التماسك مع الطريق (خرجت عن الطريق المتسفلت مثلا.. أو لو كنا سايقين عربية 4×4 على رملة ناعمة وبدأت عجلة تفوت).. بيبدأ الكمبيوتر تشتغل ويدي أوامره

بس هنا بأحد 3 طرق:

الطريقة الأولى: الفرامل تتدخل عند العجلة اللي بتلف زيادة عن اللزوم وتفرملها عشان سرعتها تبقى زي باقي العجلات، ودي غالبا بتبقى في حالة عجلة أو اتنين في جنب واحد من السيارة لما بيكون فيه رملة في الطريق أو الطريق غير متماثل.



طبعا.. الطريقة دي محتاجة إن العربية يكون فيها ABS


الطريقة التانية: تقليل قوة الموتور، وبالتالي العجلات كلها هتلف بسرعة أقل وما يحصلش دوران زايد عن الحد، ودي الطريقة اللي عادة بنشوفها في نظام الثلوج، أو لو دخلت منعطف بسرعة أكبر من الحد اللي يخلي العربية ماشية في مسارها الصحيح.




الطريقة التالتة: تركيز قوة الموتور على العجلة الأكثر التصاقا بالأرض وتقليل القوة على العجلة اللي بتفوت، وده بيتم عن طريق استخدام جيل جديد من التروس التفاضلية (الكورونا) وبتبقى فيها كلتش (قابض فاصل) على كل عجلة،









نظام السيطرة الإلكترونية على الثبات (Electronic Stability Control (ESC

أو

ESC – Electronic Stability Control
ESP – Electronic Stability Program
VSC – Vehicle Stability Control


نظام الـESC له نفس هدف الـTCS وهو منع انزلاق العجلات أثناء المشي، بس يختلف في حاجة واحدة.. إن الحساسات مش بس على العجلات، إنما فيه حساسات تانية مهمتها إنها تحس بالتسارع والقوى الطاردة المركزية (G-force) اللي بتحصل في الملفات بالإضافة لدرجة ميل الدركسيون (زي اللي بقت موجودة في الموبايلات الحديثة دلوقتي)،




فلو كانت العربية داخلة ملف بسرعة أكبر من اللازم وممكن يحصل لها "انعطاف زائد" أو "انعطاف ناقص"، ساعتها الكمبيوتر بيتدخل بنفس الطرق اللي اتكلمنا عليها في نظام الـTCS من شوية.






نظام السيطرة الإلكترونية على التعليق (Electronically Controlled Suspension (ECS

الهدف الرئيسي من نظام السيطرة على التعليق هو تكييف نظام التعليق (المساعدين بالذات) مع المتغيرات الموجودة في الطريق،

الكلام ده بيتم عن طريق استخدام مساعدين من نوع خاص يمكن تغيير قوة التخميد فيهم بحيث إن المساعد الواحد ممكن يبقى طري أو ممكن يبقى ناشف حسب الحاجة



طبعا فيه حساسات على العجل بتحس بحركة العجل وهو طالع ونازل بالإضافة لحساسات تانية موجودة في جسم السيارة .. وبناء على فرق الحركة بين العجل والجسم فالكمبيوتر المركزي بياخد الإشارات دي ويحللها ويدي أوامر بتغيير قوة المساعدين حسب الحاجة.





نظام السيطرة ضد الانقلاب (Control of Roll Stability (ARC

النظام ده أكتر استخداماته في سيارات النقل وعربيات الـ4×4 المتقدمة





طبعا الهدف منه باين من إسمه، وطريقة عمله إنهم بيحطوا حساسين.. واحد في أعلى السيارة والتاني في الأسفل، والحساسين دول بيحسوا بزاوية ميل العربية، والكمبيوتر بياخد منهم الإشارات ويدي أوامر للفرامل والموتور والمساعدين للتدخل عند الحاجة... وده كله بغرض إن زاوية الميل ما توصلش لنقطة الانقلاب.





كويس جدا..

دي أهم الأنظمة الإلكترونية اللي دخات على السيارات لتحسين الثبات على الطريق

فاضل حاجة واحد هنتكلم عليها، وبتأثر على ثبات السيارات بشكل كبير... خصوصا على السرعات العالية، وهي حاليا بقت علم مستقل..

الإيرودايناميكس... أو ... ديناميكا الهواء

أشوفكو قريب إن شاء الله...



...

[sherifabden]

بسم الله ما شاء الله انتا راجل عبقري جدا ربنا يباركلك يا رب

[borio1704]

المشاركة الأصلية كتبت بواسطة sherifabden بسم الله ما شاء الله انتا راجل عبقري جدا ربنا يباركلك يا رب

الله يكرمك

الموضوع مش عبقرية ولا حاجة... هي شغف وحب للسيارات... بيساعدها قراية وبحث عن المعلومة

أنا كنت زيك كده من حوالي 25 سنه... كنت عارف الفروق بين كل الموديلات الموجودة في وقتها... وحافظ أسعارهم كلهم... وبحب السواقة جدا (وما زلت)... ومتابع مجلة "سبور أوتو" بانتظام لمدة 10 سنين على الأقل... وكنت كمان متحمس لسيارات تويوتا في الوقت اللي كان كل الناس في مصر شايفة إن العربيات الياباني لسه بدري عليها... وكان ليا تصميمات هندسية للسيارات من سنك تقريبا.

كل الحب والحماس ده خلاني أذاكر كويس علشان أدخل هندسة لإني كان نفسي اشتغل في تصميم السيارات

صحيح إنه ما حصلش... بس قدرت أفيد اللي حواليا بمعلومة أنا شايف إن الناس كلها لازم تعرفها

ربنا يكرمك كده وتبقى أحسن مني



...