المشاركة الأصلية كتبت بواسطة احمد السباعى
الحقوني يا جماعة لوجي تعبانة قوي ... من اسبوعين فجأة بقيت تبطل و تكركر و تعمل حاجات غريبة و ماكنتش بتدور اصلا ... لغاية ماودتها التوكيل قالولي محتاجة ثروتل بادي جديد و طبعا مش موجود و هي في الضمان طبعا مش هجن في عقلي واروح اشتريته من بره لاني عرفت ان تمنه 1300 جنيه
و من ساعتها و هي تعبانة و مستنية الثروتل و محدش عاوز يجيبهولها انا خايفة يحصلها حاجة
روحت بيها التوكيل قالولي منقدرش نعملك حاجة لازم تستني قطعة الغيار
روحت بيها ورشة عندنا في اسكندرية متخصصين في الرينو ناس محترمة جدا مشفتش زيهم ماشاء الله
المهندس عمل حاجات كده و قالي خلاص كده مش محتاجة حاجة تتغير و قولتله ظبطلي الدبرياج عشان لعبوا فيه في التوكيل عملوا حاجة مش مظبوطة وظبطه
تاني يوم خرجت بيها زفتني في الشارع و انتوا عارفين الشعب المصري بس يلاقي بنت لازم يحرق دمها حتى لو ماشية زي الفل فما بالكوا و العربية مبطلة و مش عاوزة تمشي في كل اشارة
كأني حبة اريح شوية في نص الشارع
روحت في ساعتها رجعتلهم قالي العربية مافيهاش حاجة زي الفل و قالي هاخليلك الدبرياج على ظبطة الشركة قالي اكيد ده عيب سواقة
لانه جربها كانت زي الفل معاه
و من ساعتها و هي مش طبيعية خالص مش عارفة اعمل ايه
الغريبة انها بتبطل حتى و انا مش حاطة رجلي اصلا على الدبرياج مش غريبة دي؟؟ و النهاردة كنت دايسة بنزين علآخر متخيلين و لا كاني دايسة حاجة مؤشر الآر بي ام في مكانه
انصحوني اعمل ايه مع بتوع التوكيل و اللا فعلا مش محتاجة اغيرلها حاجة؟؟؟ >>>>>>>>منقول
|
اللى جاى دا كان احدى الردود على الموضوع
بسم الله اولا ان شاء الله تتحل و بسيطة ان شاء الله ثانيا العيب ده بسيط جدا و ان شاء الله حله سهل ليه؟ من كلام حضرتك لسببين 1-لان حضرتك بتقولي ان لما الراجل بيسوقها بتبقي زي العسل صح ؟؟ 2-و ده الاهم : ليه العربية ليه بتبطل في حاله حضرتك ؟ من وصف حضرتك ان الار بي ام مش بيرفع معناه ان العداد مش لاقي لفات يعدها صح ؟ و طالما ان الموتور مش بيطلع لفات كتير اذا مفيش داخل معقول داخله علشان كده بتبطل يعني ايه داخل ؟؟ يعني وقود ---- مثال بسيط لو البنزين بتاع حضرتك خلص.... العربيه بتبطل صح ؟؟؟ طب لو البنزين موجود في العربيه بس مش بيوصل للمحرك مش هيا هيا نفس النتيجه... ان البنزين مش واصل و هي دي مشكلة حضرتك طب حضرتك تعملي ايه؟؟؟ مكالمه تليفون صغيره لكذا فرع للتوكيل يمكن تلاقي القطعه في اي فرع تاني طب فرضا اتسددت خالص و حضرتك ملقتيش يبقي نصيحه مني اعرفي منهم ميعاد وصول القطعة بس طبعا لازم بجدية يعني حضرتك تروحي و تحسسيهم اد ايه الموضوع مسبب مشكلة لحرتك و ان حضرتك هتركني العربيه مش هتحركيها و انك عاوزة منهم ميعاد محدد يفضل لو موثق و ان شاء الله تتحل في اقرب مما تتخيلي و نصيحه مني اللوجان عربيه اكثر من رائعة معلومة بسيطة انا مهندس ميكانيكا
واخيرا المشكلة اتحلت كالاتى:
الحمد لله جات في ساعتها اتصلت الصبح اهدد بجمعية حقوق المستهلك جاتلي قبل الفطار بشوية متخيل ؟؟
و فعلا العربية اتظبطت اتاري الدبرياج كان متشعلق عالي قوي معرفش لاقيت العربية كلها ناعمة و رجعت احلى من الاول
الصراحة في ناس هناك ذوق جدا و الله ربنا يباركلهم
ربنا يجازيك خير على ردك و تعبك و لكل من تعب نفسه بالمشاركة فعلا منتدانا احلى المنتديات مافيش حد فيه بيغلب