اكسنت rb جابت فتيس بعد اول 100 كيلو و موقف غريب من التوكيل

[AHMEDCAR]

بالظبط كده زى ما العنوان بيقول بالظبط

اخويا اشترى اكسنت جديده اوتماتيك بالقسط من معرض قدام البيت عندنا

و جيه فى يوم الاستلام لقيت عداد العربيه عامل 65 كيلو متر قولت كويس استلمت العربيه بما ان اخويا مالوش فى الاتوماتيك خالص و لسه ماخلصتش شارع المعرض لقيت العربيه بتعمل معايا نتشه غريبه جدا قولت يمكن علشان البنزين خلاص بيشطب اروح احط بنزين و اجرب

و بالفعل فولت العربيه و لقيت برضو نفس الكلام بيحصل العربيه بتفصل فى النقل بين الغيارات بشكل غبى و تقوم نتشه نتش جامد جدا و تمشى بعد كده و المصيبه الاكبر ان اخرها 80 و ده بسبب ان الفتيس مابيزودش عن السرعه الثالثه و بيفضل معلق عليها مابيرضاش ينزل عنها غير مع غلق الماتور و ادارته مره اخرى

قومت لفيت و رجعت على المعرض تانى و قولتله انا مش هستلم العربيه دى طبعا كان يوم مايعلم بيه الا ربنا و قالى الفيصل بينى و بينك التوكيل و انت معاك ضمان روح صلحها فى الضمان و بعد كلام كتير و وجع قلب اكتر استقرينا على انى اروح معاه تانى يوم الصبح التوكيل نكشف عليها لو مشكله بسيطه زى فيشه واقعه ولا حاجه كان بها لكن لو حاجه كبيره انا ماليش فيه

المهم روحت التوكيل الجديد اللى على طريق الاسماعيليه و سلمتهم العربيه من الساعه 10 صباحا و انا قاعد بتفرج عليهم فى الصيانه كل شويه يفكوا و يركبوا و يجربوا ميه مليون حاجه

غيرنا كنترول الفتيس و كنتروس الماتور و حساسات الفتيس و برضو نفس العيب موجود

افتكرت على طول صديقى ابو ليلى و مشكله عربيته السيراتوا قولت لازم اكلمه اخد رائيه و للاسف ماكنش معايا رقمه فكلمه حبيبى كريم منير اللى بجد هو اسم على مسمى كريم و هو كريم

و ادانى رقم التليفون و كلمه ابو ليلى و دوشه و فى التليفون بس بجد الراجل طلع محترم جدا و صدره رحب لكل الاستسارات و غير كده فضل متابعنى طول اليوم بجد الف الف شكرا ليه

المهم و صلت فى الاخر انى نزلت الورشه علشان افهم فى ايه لقيت المهندس بيقولى العربيه دى فيها فتيس و احنا هنصلحه
قولتله نعم انا لسه مارخصتش العربيه و مامشيتش بيها 100 كيلو تقولى نفك فتيس ازاى الكلام ده

بصراحه و الحق يقال قالى طيب انا هاحاول محاوله و ربنا يسهل

سابنى نص ساعه و رجع قالى رجع العربيه دى للمعرض اللى انت اخدتها منه و احنا هنكلمه يديلك واحده تانيه انا بلمت و انا واقف قدامه حسيت ان فى حاجه غلط

قولتله انت بتتكلم جد قالى جد و الله و لو مش مصدق خلى العربيه هنا و تعالى كمان اسبوع علشان نكون خلصنا الاجاءات و تاخد الجديده

طبعا انا قولت كمان اسبوع و فى التوكيل يعنى هيصلحوا الفتيس و يدوهالى تانى قولتله لا شكر انا هرجع بيها المعرض و عملت احتياطى اخدت رقم الشاسيه و الماتور بتوع العربيه و احتياطى علشان مايلبشونيش فيها تانى

و رجعتها المعرض الكلام ده كان يوم خميس المعرض قالى يوم الاحد الاستلام ان شاء الله قولت مافيش مشكله جيه يوم الاحد قالى اللون مش موجود انا كنت مختار فيرانى فقالى فى نبيتى و فضى
بس للاسف العربيه زادت 1000 جنيه و ده مش فى ايدينا و الكلام ده قامت خناقه جديده ازاى انا مستلم فى السعر القديم و تدنى بعد كده لون تانى و عاوز تزود فلوس عليا من هنا لهنا استقريت انى هدفع 500 فقط لا غير و الحمد لله صاحب المعرض غالبا حب يخدمنى بعد القرف اللى انا شوفته ده كلها و جابلى اللون الفيرانى برضو و الحمد لله استلمت العربيه امبارح

بعد موقف لا يصدق من التوكيل

[Sniper1612]

مبدئياً مبرووك العربية و ربنا يديك خيرها و يكفيك شرها و شر الطريق و معلش هو ممكن يكون عيب صناعة و الحمد الله اتحل اهو و خدت عربية تانية

[YahiaAshraf]

الف مبروك يا باشا وربنا يحفظهالك

[mohamed hossam elemam]

مبروك عليك وربنا يوفئك فيها ان شاء الله

[jojojojojo]

اولا الف مبروك علي العربيه وبتحصل الموضوع ده كتير في جميع انواع العربيات المهم انهم غيروها الحمد لله