مركز كيا سيرفس المعادى....إحذررووووووووو ة

[engtarek]

عن تجارب شخصيه و مع زملاء و مشاكل مقرؤه فى المنتديات....احذر من التعامل مع هذا المركز النصـــــــــــــــــــــ ــــاب بجميع المقاييس...قطع غيار بتتبدل و العربيه بتتبهدل ,شوف بيسوقوا عربيات الناس هناك ازاى كأنها بفلوس حرام و كل اللى بيحصل ان العربيه بتدخل تغير زيت و فلتر و يتغسل الحوض و تتقلب و خلاص على كده و بيتفك منها قطع الغيار الاصليه و يتحط قطع غيار مضروبه و انت ولا دارى بأى حاجه حضرتك قاعد جوة مش شايف حاجه...و من الأخر أ/محمد السيد بتاع AAA صديق شخصى مقرب جدا أ/ لسعد رشاد مدير و صاحب المركز و البعض بيقول شركاء ((الله أعلم)) فى هذا المركز عشان كده كل الشغل بيروح عليه و كلم أ/محمد سيد قله اروح فين يقولك روح هذا المركز !!!! وتيجى تسأل اى حد من اللى بيعملوا صيانات محدش بيشكر , واحد بيعمل صيانه لعربيه كارينز صيانه 10000 غيروا فيها حاجات ب1780 جنيه الفاتورة فى الاخر ليه و الراجل كان هيتشل منهم و واحد صيانه ال50000 دفع 2750 و كان رايح مغير زيت و فلتر انا قارنت الفواتير دى بفواتير ناس عامله صيانه فى التوكيل لقيت فواتير التوكيل اقل من الارقام دى بكتير !!! وازاى ده بعد عدد الكيلوات ده بس و واحد بيشحن فريون يقولوا ده بره الضمان AAA و الشحن ب 250جنيه اللى هو ب 140 او 150 فى اى حته فى الدنيا و صيانه ال5000 كيلو ب 150جنيه انا شخصيا دى جننتنى عشان التوكيل اللى هو وكيل العربيه نفسه بيعملها ببلاش ازاى انت تاخد فيها 150 جنيه و ليه عشان بيراجع على الزيت و السوائل اللى هى انت ممكن تعملها بعنيك المجردة او عند ميكانيكى ب 20 جنيه و يغسلك العربيه و يقولك خلصت بجد عيب اوى و AAA بتعوض فى مشاكل بسيطه مرايه , فانوس ....الحاجات الخفيفه دى لكن فى المشكل الكبيرة بيقولك اى مسكنات و خلاص عشان ميتطلعش تعويض للعميل , بصراحه شركه غير مريحه فى التعامل و الدليل ابحث هنا فى الموقع و فى نايل موتورز هتلاقى ناس كاتبه عن مشاكل فى عربيتها و متحلتش لحد الان و هما مأمنين فى AAA اظن ان العميل المفروض تتحل مشكلتوا ايا كانت نوعها امال اسمه ضمان ازاى , انا بجد ورا الموضوع ده و هجمع الناس اللى ليها مشاكل و هشوف محامى و هنشوف ايه الجراء القانونى اللى ممكن يتخذ ضد هذه الشركات و المراكز النصابه
انا عرفت حاجه جديدة من جار ليا بيشترى كارينز خليجى من سمير ريان...قالى ان اساس تعامل AAA مع سمير ريان لان المندوب اللى هناك اقنعه بيهم بس انا حكيتله القصه النهاردة...انا جبت رقم موبايل الحاج سمير من جارى و ناوى اكلمه انشاء الله و احدد معاه معاد عشان نتكلم فى الموضوع ده يأما يجيب شركة الناس تثق فيها و مراكز تحل مشاكل الناس فعلا يأما يشوف صرفه معاهم عشان بجد مينفعش كده انا كتبت الموضوع النهارده((http://masrmotors.com/vb/showthread.php?t=61980&page=3)) جالى كذا رساله على الخاص بخصوص شكاوى منهم , اللى محتاج رقم الحاج سمير كبدايه يبعتلى على الخاص وانا ابعتهوله عشان مش عاوز اقتحم خصوصياته و منه ليه على طول...مينفعش ياجدعان نسيب حقنا و فلوسنا يروحوا هدر

[deblabolbol80]

ربنا معاك و يوفقك علي فعل الخير فعلا كدير من المراكز دي نصابييين
بالتوفيق

[اشرف عبدة]

بسم الله الرحمن الرحيم

نحن لا نبدأ بالتحذير ولكن نبدأ بالتذكير التذكير بالله العلى الكبير وبنبيه الصالح الكريم محمد بن عبد الله الصادق الوعد الامين


" إذا جائكم فاسق بنبأ فتبينوا أن تصيبو قوماً بجهاله فتصبحوا على ما فعلتم نادمين"ٍٍ

اما بعد...

نحن دائماً نرحب بجميع الأراء سواء كان الرأي نصيحة للتعديل من شيئ خطأ اوكان الرأى بالشكر في الخدمة وحسن الأستقبال والمعاملة


ولكن...


للأسف الشديد نجد بعض الأراء التى قد لا تستحق حتى التعليق عليها من مركز كبير له اسمه وسمعته مثل مركزنا لكن عندما يصل الامر الى الإساءةلسمعة مركزنا واتهامه بالسرقة والغش فلابد من الرد الصارم والحازم


وليس الرد مجرد كلام اوكتابة على شخص مجهول سجل نفسه يوماً ما وكتب يحذر من التعامل مع مركزنا بغرض التشويه والإساءه لا أكثر.


لكن المركز سيقوم بإتخاذ كافة الإجراءات القانونية ضد من قام بكتابة هذا الكلام والإبلاغ عنه حتى يتسنى لعملائنا معرفة الحقيقة وكذلك ليكون عبرة لمن تسول له نفسه تلفيق الإتهامات والأكاذيب الباطلة لتشويه سمعة مركزنا العريق.


وسوف نقوم بالرد على كل ماجاء بكلامه.


وهذا بالطبع ليس بغرض تبرءة ساحتنا امام عملائنا حيث ان عملاؤنا يعلمو ما نقوم به من خدمات وصيانة جيده وأمانة في التعامل ولكن الرد هو لمن لا يعرف ماهو (مركز كيات سيرفس المعادي).


أولاً:


قيادة سيارات العملاء تتم بواسطة مهندسين الاستقبال المتخصصين والمدربين على أحدث مستوى أو من خلال مدير الصيانة للتجربة في حالة وجود اى مشكلة بالسيارة وذلك في وجود العميل "يعني مفيش حد بيسوق عربيات الناس كأنها بفلوس حرام"


ثانياً:


لمصلحة من ان مركز له اسمه وسمعته وثقة عملائه ان يتم فك قطع الغيار وتبديلها (هذا لا يحدث في ورشة ميكانيكا عاديه فما بالك بمركز خدمة معتمد)


كما نود ان نشير الى ان عملية الصيانة بالكامل تتم تحت نظر العميل حيث ان المركز مراقب بالكاميرت مراقبة مستمرة وليس من قبل افراد المركز ومشرفيه فقط وانما من قبل العميل ايضاً حيث يشاهد بنفسه جميع اجراءات الصيانة لحظة بلحظة.


ومن زارنا بالفعل يعرف هذا جيداً.


ومع ذلك فإن المركز يتحدى من يدعي ان بسيارته قطع غيار غيراصلية تم تريكبها بالمركز او ان اى سيارة كانت لا تحتاج الى قطع غيار وتم تغيرها عمداً.


ولكن اعداء النجاح مثلك لا يعرفون سوى الكذب والتضليل.


ثالثاً:


فيما يخص السيد /محمد السيد


فقد ادعى صاحب التحذير ان له صداقه شخصية بمدير المركز فمن اين لك بهذه المعلومة اذا كنت قد حضرت الى المركز مرة او مرتين؟


كيف توقعت هذه المعلومه إلا إذا كنت تعمل في هذا المجال ولك غرض غير معلوم لعملائنا ولكن معلوم تماماً لنا.


عموماً فإن السيد /محمد السيد ماهو إلا مراقب على عمله وذلك لمتابعة الضمان على السيارات والتأكد من خدمة العملاء على اكمل وجه والتأكد من عدم وجود اى شكوى لأن شركة ترابل ايه تهتم بخدمة ما بعد البيع أكثر من بيع الضمان فقط وهذا بالطبع معلوم للجميع.


حيث انها شركة لها اسمها وسمعتها في داخل مصر وخارجها.


رابعاً:


هو فيما يخص ادعاءك انه لا يوجد احد يشكر في المركز ارد عليك بسؤال كيف ذلك وعملاؤنا تزداد يوماً بعد يوم؟


وفيما يخص الشكاوى فلست انت من يتوجه اليه بالشكاوى فأرقم الشكاوى معروفة لجميع عملاءنا


ولكن للعلم فهي كالأتى:

01001222366


01013330111


وقسم الشكاوى لم يسجل اي شكوى لم تحل حتى الأن ونحن نرجو من العميل الذي له شكوى ولم تحل الاتصال بهذه الارقام بقسم الشكاوى وعدم التردد وهذا فقط لزيادة الثقة بين عملائنا ومركزنا الذي من اسباب نجاحه ثقة عملائنا فيه (وهذا ما لاتعلمه).


خامساً:


ان تدعى ايضاً ان صيانة الكارينز 10000كم ب 1780ج وأن هذا العميل كاد يصيبه الشلل منا؟


فنحيطك علماً ان المركز قرر بأن من لديه فاتورة تحمل ختم مركزنا موضح بها ان صيانة 1000كم بمبلغ 1780ج عليه التقدم بها الينا وأخذ سيارة كارينز موديل 2012 جديده مقابل هذه الفاتورة وهذا فقط لإثبات عدم مصداقية الحاقد على مركزنا والمدعى بالكذب علينا.


سادساً:


شحن الفريون ثمنه فعلاً250ج وهذا الرقم صحيح وأى مركز خدمة يستخدم فريون 134 اصلي واحدث اجهزة شحن وكشف على التكييف لا يمكن ان يقبل غير هذا السعر لأن هذا السعر مقارب جداً لسعر التكلفة.


سابعاً:


صيانة 5000كم اختياريه وليست اجبارية لأن الزيت الموضوع في اغلب السيارات زيت 10000كم


فلا يضطر العميل عمل صيانة 5000كم إلا إذا حدثت مشكلة بالسيارة او كان يضع زيت5000كم وفي هذه الحالة تتم الصيانة الكاملة كما لو كانت صيانة 10000كم بجميع بنود الصيانة .


ثامناً:


بالنسبة لكلامك على لسان جارك الذي اشترى كارينز من (سمير ريان)وان مندوب الشركة اقنعه بالتعامل معهم فهذا لان اي موزع خليجي يبحث عن شركة ضمان لها اسمها وسمعتها وان تكون جاده في الضمان وخدمة مابعد البيع وليس من أجل بيع الضمان فقط ولكن من أجل الحفاظ على سمعتها المعروفة داخل وخارج مصر فمن مصلحة اى موزع خليجي في مصر ان يبيع السيارة ويسلم العميل الى يد امينة حتى تتساوى السيارة الخليجي بالوكيل بل وتزيد في الامكانيات واقل في السعر واحسن في الخدمه.


واتمنى من كاتب التحذير الاتصال ب الحاج سمير ريان او اى موزع خليجي ليعرف مدى ثقة موزعيين السيارات الخليجي في مصر بشركة ترابل ايه ومراكز الخدمة التابعة لهم.

وأخيراً أحب ان اعرف بصاحب هذا التحذير بنبذة صغيرة .


فهو شخص يعمل في نفس مجال مركزنا ولكنه لا يحاول التعامل بذمة وشرف واجتهاد لكى يكسب عملائه بل يحاول تلويث سمعت من حوله لغرض معروف في نفسه


بل وأجزم ان كل ما الحقه بمركزنا من اتهامات هي من وحي خياله المريض .


بل وأيضا استطيع القول بأن ماقاله عن مركزنا يفعله هو فالكل يعرف جيداً بأن اللص يرى الناس جميعهم لصوص والخائن ينظر للناس جميعهم على انهم خونه.


وانصحه بالاهتمام بعمله لأنه إذا ما انتبه اليه فسوف يكسب اكثر وسيرضيه الله عز وجل بدلاًمن الحقد الذي يكنه في صدره تجاه من يعملون في نفس مجاله ومن هم اكثر منه شهرة ونزاهة واخلاص.


وأود ان اخبره بأن لقائي به سوف يكون قريباً جداًعندما تصدر الأحكام العادلة ضده وهى :


أولاً: الحبس بتهمة السب والقذف والتشهير.


ثانياً:التعويض عما القاه من اتهامات باطله علينا وهذا سوف يكبده خسائر كثيره .

وأخيراً

اتمنى لعملائنا الكرام دوام التوفيق والاحترام...

ملحوظه:


نتمنى من موقع مثل مصر موتورز له اسمه وزواره ان يتأكد من كتابة اى وضوع ومعرفة هذا الشخص حتى لا يفقد مصداقيته وشفافيته. وشكراً

بعد كلام ا/ اشرف
عايزين رد يا مهندس طارق
والا كلام ا/ اشرف يبقى صحيح جملة وتفصيلا
تنويه هام الرجاء من اي عضو عند الاستعانة بكتابة اية قرانية التاكد منها من المصحف لان اول الاية هي ان جاءكم فاسق بنبأ وليس اذا.
(يا أيها الذين آمنوا إن جاءكم فاسق بنبأ فتبينوا أن تصيبوا قوما بجهالة فتصبحوا على ما فعلتم نادمين)...شكرا جزيلا

[moha4tec]

+11111111111
و يا ريت المهندس اشرف يكتب اسم المركز التانى عشان ناخد بالنا منه,و يا ريت يجيب الدليل على كلامه ,و يوضح.
و يا ريت المهندس طارق يرد على الكلام ,و يوضح للناس اسباب الكلام ده اه ,و يجيب دليل على كلامه.
و عموما المفروض لو حد بيشتكى من شىء ممكن يذكر تجربته او شكوته بدون(( اى الفاظ .و يسيب الحكم للناس)).عشان ميغلطش نفسه.
و ممكن ياخد حقه عن طريق حقوق المستهلك و كده
و مينفعش حد يدخل يكتب كلام و يمشى و ميردش على الناس .
لازم تحصل مناقشه فى الموضوع و نفهم كلنا فى اه .؟؟؟؟