الحمد لله أخيرا 405

[kashtoot]

السلام عليكم و رحمة الله و بركاته

أخيرا و بفضل الله تعالى اشتريت حبيبة قلبى بيجو 405 مو 91 فرنساوى و الحمد لله العربية حالتها كويسة جدا بس ناقصها compressor التكييف بس مش مشكلة , ناوى أجيبه على مهلى إن شاء الله
بس هوه فى حاجه واحده بس؟
دى أول عربية ليا
فيا ريت حد يقولى هل فى حاجات بتتغير أول لما أستلمها؟ و أحطلها زيت إيه؟ و أحافظ عليها إزاى؟يا ريت تفيدونى فى الموضوع ده.
وفى سؤال كمان
يا ترى أخلى صاحب العربية يعملى توكيل و لا نعمل عقد بيع؟ أيهما أحسن؟
ويا ريت حد يقولى أرفع الصور إزاى؟

[بدر بسيونى]

الف الف مبروك ربنا يبارلك فيها ويديك خيرها ويكفيك شرها وبالنسبة للزيت موبيل 10 الف والورق ماعنديش فكرة والله

[pioneer1234]

مبروك
ياريت لو تقول لي سعرها كام

[خالداعزالناس]

الف الف مبروك عليك السياره
ياريت لو تقرير بعد التجربه ..... ويكون بالصور

[miam0502788391]

الف مبروك ربنا يديلك خيرها ويكفيك شرها
ثانيا يا ريت تغير كل السيور اللى فى العربية خصوصا سير الكاتينة لأنت انت متعرفش هو ماشى اد ايه واصلى ولا لأ
ثالثا غير كل الزيوت ومعلش هى مصاريف فى الأول بس هتريحك بعد كده يعنى غير زيت الفتيس والمحرك وشوف مستوى زيت الفرامل والباور
بالنسبة لنوع الزيت هو اشهر الأنواع موبيل وشيل واسو أكتر حاجة الناس بستخدمها هو الموبيل
موضوع توكيل او بيع ده سيان مش هيفرق انما يعتمد على حضرتك لو انت مش هتنقل الرخصة دلوقتى يبقى اعمل توكيل وامشى بيه لحد ما تيجى تنقل الرخصة ,,, ولو انت هتخاص كله مرة واحدة يبقى اطلع انت وصاحب السيارة على الشهر العقارى وخليه يعملك عقد بالبيع وطبعا خد رخصة العربية ومتنساش يكون اسم المالك اللى فى الرخصة هو اللى موجود فى عقد البيع وبعدين اطلع على المرور واطلب نقل الرخصة باسمك بالعقد اللى معاك
ومتنساش تخلى المالك يجيبلك شهادة المخالفات وبراءة الزمة قبل ما تدفع فلوسك