عندى مشكلة فى فيتيس السيارة أرجوا الافادة
يوم الاحد الماضى وفجاة وانا ماشى بالسيارة لقيت الفيتيس الاوتوماتيك فصل فجأة ، ركنت على جنب وفتحت الكبوت ومبقتيش عارف اعمل ايه لقيت كل حاجة تمام ، لايوجد تسريب زيت مثلا أو سلك مقطوع
المهم : دورت تانى ونقلت وجربت امشى لقيت السيارة مشيت شوية ( 10 متر ) وفصلت تانى - وفضلت أعمل كده لحد ماروحت وركنتها
وتانى يوم ودتها للميكانيكى - بجوار البيت - وكشف عليها وصدمنى وقاللى : الفتيس ده باظ ولازم يتغير لان تكلفة أصلاحه تساوى واحد تانى استيراد ، وبعد تلقى الصدمة واستيعاب الموقف وعدم وصولى مع الميكانيكى لسبب منطقى وملموس لهذا العيب المفاجئ وان ده ممكن يحصل لكل الناس وان ده من اكبرعيوب فيتيس النوبيرا الاوتوماتيك - توكلت على الله وقررت اغير الفتيس بواحد تانى استيراد
يوم الثلاثاء نزلنا انا والصنايعى للحرفيين واشترينا فيتيس ب 1200 جنيه بعد الفصال وكمان اشتريت 4 ليتر زيت فيتيس موبيل بسعر 180 جنيه ، وتم تركيب الفيتيس وتم تدويره بزيت فتيس مصرى اولا ( للتنظيف ) 4 ليتر ب 40 جنيه
ثم غيره الميكانيكى بزيت موبيل وطلعنا جربنا
وهنا المشكلة بالنسبة لى :
السحب اصبح كويس جدا وخصوصا فى الطلعة الاولى
صوت السيارة اصبح عالى جدا عن الاول
نقل الفيتيس من الاول الى الثانى ثم الى الثالث مشوارهم طويل ( بتنقل متأخر )
عداد لفات الموتور فى النقلة الاولى يصل الى 3000 لفة ثم عند النقل للنقلة الثانية ينزل العداد الى 2500 ثم 2000 لفة ثم يصعد العداد الى 3000 لفة مرة اخرى فى النقلة الثانية وعند وصوله للنقلة الثالثة ينزل العداد مرة اخرى
اصبح استهلاك البنزين عالى جدا
عند الشكوى للميكانيكى لم يقتنع بما قولته سابقا - لان الفيتيس بيطبع
اصبحت خائف جدا من السيارة وبفكر ابيعها
وبفكر مرة تانية اوديها لمتخصص فى الفيتيس ( مثل محمد الونش فى الحرفيين مثلا ) بس خايف يرجعنى لنقطة البداية من أول وجديد
وهناك من نصحنى ان احولها لفيتيس عادى واريح دماغى وأخرون حذرونى من هذه الخطوة
بصراحة مش عارف أعمل أيه
ارجوا الافادة من خبراء الدايو وخصوصا المهندس : سمير عياد
وشكرا مقدما لكل الاعضاء واسف على الاطالة
ملحوظة ك
نسيت أقولكم ان تكلفة الميكانيكى 200 جنيه - 25 جنيه للصنايعى 50 مواصلات ومشال
وشكرا
|