المشاركة الأصلية كتبت بواسطة رورة
السلام عليكم ورحمة الله وبركاته
الأخ الفاضل ابو كمال انا جديدة با لمنتدى والحقيقة اني سجلت فيه بس عشان الموضوع دة..
انا وزوجي وأطفالي الاثنين (دون سن المدرسة) نقيم بالكويت وزوجي قرر اننا ننزل مصر بر ان شاء الله في منتصف شهر يوليو القادم..
وبالرغم من حماسه الشديد إلا اني متخوفة جدا من موضوع السفر بر، مش عشان حوادث لا قدرالله لأن الأعمار بيد الله والي هيحصل في السيارة هيحصل في الطيارة
بس لأني لسة جاية من العمرة من يومين وكنت مسافرين بر انا و زوجي واطفالي وشفنا بهدلة ما بعدها بهدلة
وخاصة اطفالي الي تعبو مني جامد مع ملاحظة اننا كنا مسافرين بالباص واعدنا عالحدود يوم كامل منتظرين بسبب الزحمة الشديدة
المهم كنت عيزة اعرف تجربة حضرتك في السفر بر مع الزوجة والأطفال وخاصة العودة، لأني دورت كتير في مشاركات حضرتك ومش لئيت اي موضوع عن كدة
وكمان كنت عيزة اعرف الرحلة هتتكلف كام بالظبط
هو زوجي ناوي لسة يشتري سيارة ننزل بيها يا إنفوي يا بليزير مش هيخرج عن السيارتين دول
عيزة اعرف كل كبيرة وصغيرة بخصوص التكاليف.. يعني مثلا المصاريف قبل السفر داخل الكويت، داخل السعودية، داخل الجمارك المصرية، (تذكرة العبارة السريعة للفرد وهل الأطفال اقل من 6 سنين بياخدو عليهم حاجة)
يعني كل قرش بيتصرف في السفر بر
وكمان مدة الرحلة اد ايه.. يعني احنا مثلا من المدينة لحد الكويت اخدت منا الرحلة بدون الوقوف فترة كبيرة في المنافذ السعودية حوالي 12 ساعة
اما واحنا رايحين مكة خدت مننا الرحلة من الكويت لمكة يوم ونصف مع الوقوف في الجمارك يوم بحاله
ممكن حضرتك تفيدني بخصوص الأسئلة دي
انا عرفة ان اسئلتي كتير بس فعلا انا قلقانة جدا من موضوع السفر بر
وعلافكرة، احنا الهدف الأساسي لنزول مصر بالسيارة هو عدم البهدلة بعيالنا فمصر والمواصلات والقرف وحضرتك اكيد عارف
وكمان التكاسي بأت غالية جدا.. يعني لو نزلنا بالسيارة، هل التكلفة هتكون اقل
وهل فعلا هتغنينا عن التعب في المواصلات
وهل تستاهل البهدلة
معلش تقلت عليك وانا اسفة للإطالة
|
أختى العزيزة .... أولا الف شكر لحضرتك لتسجيلك فى المنتدى و لثقتك الغالية
ثانيا أنا مع حضرتك فى كل اللى عايزة تسألى فيه و ان شاء الله هجاوبك عليه نقطة نقطة و بالتفصيل
اول حاجة اقولها لك انى كنت فى العمرة معاكم
و لسة راجع من 3 ايام انا كمان الحمد لله .... بس كنت مسافر بعربيتى و لأنى كنت فى العربية الحدود خدت فيها حوالى ساعتين أو 3 ساعات بس و طبعا ده علشان الزحمة الشديدة جدا و ان كل الناس استغلت الاجازة و كانو طالعين عمرة ... ربنا يتقبل من الجميع يا رب ... انما فى الايام العادية الحدود بتاخد بالكتير نص ساعة فى الكويت و السعودية
و لعلمك مانزلتش من العربية لا انا ولا مراتى وكان معايا البنات واحدة سنتين وواحدة 9 شهور
انما فى الباصات الوضع مختلف و اكيد حضرتك شفتى بنفسك و جربتى فى العمرة (و ماتزعليش علشان الاجر على مقدار التعب ان شاء الله)
بالنسبة لرحلة العودة من مصر كانت ممتعة جدا الحمد لله و كانت احسن بكتير من رحلة الذهاب اللى كنت فيها لوحدى ... الفكرة كلها انها عاوزة تخطيط صح و شوية تنظيم و طبعا تسهيل ربنا فى الاول و الاخر ... التنظيم ده بيكون فى ظبط مواعيدك على العبارة و تظبيط الوقت على قد ما تقدروا علشان تعرفوا تدخلوا بعض المدن و تريحوا فيها شوية فى اى اوتيل او نزل اذا استدعى الامر ... و طبعا واضح لحضرتك لو ماكنش الموضوع عجب مراتى ماكانتش وافقت اننا نروح العمرة برى .......
و البهدله كلها بتاعت السفر برا الى مصر تتلخص فيما يلى:-
1- بهدلة الاجراءات فى نويبع المصرية أو العقبة الاردنية فى انتظار العبارة و الحجز للركوب فيها و ده يوم ما بيكتر بيكون 3 أو 4 ساعات .... الا بقى لو العبارة اتلغت أو اتأخرتوا عليها فا ممكن تستنوا 10 ساعات او حتى يوم كامل (أهمية التخطيط و التنظيم ) و حتى فى الحالة دى فيه فنادق ممكن يتم بها قضاء الليلة
2- الحمامات (أكرمكم الله) فى الطريق و البنزينات غالبا ما تكون غير مناسبة و يمكن التغلب على ذلك بــ (استعمال حمامات المطاعم مثلا أو النزل أو الفنادق)...
3-التعب من القيادة .. و يمكن ايضا التغلب عليها بالراحة فى منتصف الطريق لمدة كام ساعة فى اى نزل (بتحل المشكلة دى تماما) و طبعا الاستعداد بالنسكافيه و القهوة و المنبهات و خلافه
و بالنسبة للعربيتين اللى ناويين على واحدة منهم ان شاء الله هيبقوا مريحين جدا فى السفر و خصوصا ان الكراسى اللى ورا ممكن يتم طويها و يصبح خلف العربية واسع جدا وملائم للشنط و لنوم الاطفال عند الحاجة بس يا ريت ماتزودوش السرعة عن 140 او 150 علشان حضرتك عارف ثبات الجيبات مابيبقاش كويس قوى على السرعات العالية انا كمان ماكنتش بزود عن السرعة دى ......
بالنسبة للتكاليف لن تتعدى 350 ان شاء الله و لو فتحت قوى هتكون 400 دينار و ده طبعا رايح جاى و دى تكاليف كل حاجة من الاف الى الياء
30 دينار تربتك من النادى الاهلى الكويتى
18 دينار لعمل فيز المررو لشخصين من السفارة السعودية و طبعا الاطفال على جواز حضرتك
40 دينار بنزين بالكتير قوى لأن بنزين السعودية رخيص جدا
مش فاكر العبارة كانت بكام لأنها كانت بالدولار بصراحة بس انا فاكر الجيبات كانت اغلى من الصالون حاجة بسيطة
و كمان مش فاكر الفرد كان بكام (بس هى عموما العبارة اغلى ما فى الموضوع)
و بالنسبة للاطفال بس بياخدو 50 جنيه مصرى على كل طفل
بياخدو حوالى 1000 الى 1200 جنيه فى الجمارك فى مصر
و طبعا بقى مصاريف شخصية ,,, اكل .. فنادق .. و ما الى ذلك
المهم زى ما قلت لحضرتك لن تتعدى 350 او 400 دينار باى حال من الاحوال.....مع الفنادق و الاكل و كل شئ
و لعلمك انا طلعت الرحلة دى لوحدى من خمس سنين و كلفتنى 200 دينار بس رايح جاى ... بس كنت لوحدى ساعتها زى ما قلت لك و كانت العبارة ارخص و مصاريف جمارك مصر اقل من دلوقتى
مدة الرحلة من الباب للباب 40 ساعة بالتمام و الكمال بكل ما فيها من استراحات و انتظار و كل شئ
و هى المسافة عموما برده من الباب للباب 2300 كيلو متر و لعلم حضرتك انا ساكن فى طنطا
و بإذن الله النزول فى العربية هيخلى اجازتكم فى مصر زى الفل و مافيهاش اى تعب مواصلات و لا انتظار و لا اى حاجة .... لما كنا نحب نروح اى حتة نقوم لامين نفسنا فى العربية و منطلقين ,,,, اسكندرية بقى مطروح ,,, شرم ,, الساحل الشمالى ,,, العين السخنة ,,, مفيش اى مشكلة على الاطلاق ...........
و بصراحة الاجازة الحلوة دى تستاهل تعب السفر البرى و زيادة احسن من البهدلة فى المواصلات و التاكسيات
انا بصراحة لو ماكنتش العربية معايا معرفش كنت هعمل ايه
و كمان هتبقى اوفر من الطيران رايح جاى مع ايجار عربية فى مصر او حتى المواصلات العادية
و ربنا يوفقكم ان شاء الله و تروحوا و ترجعوا بالف سلامة
و اى اسئلة تانية انا تحت امر حضرتك فى اى وقت