[محمود حسين المتحدة]

السادة الاعضاءالمحترمين.. انا الحقيقة انا عندى مشاركة يمكن يكون فيها معلومات مش سارة للناس اللى مركبة فلاتر المياة اللى بتحتوى على ميمبرين
الحقيقة انا راجل بتاع تسويق واشتغلت فى اكثر من منتج خلال حياتى العملية اللى تقريبا بقالها دلوقتى 18 سنة
المهم انى اشتغلت فى موضوع فلاتر المياة ده تقريبا كان الكلام سنة 2004 وكانت ساعتها الفلاتر دى حاجة تعتبر جديدة ولسة غالية وبصراحة مكسبها ظريف .. وكانت الفكرة من خلال صديق لى بيشتغل فى مجال الفلاتر دى بقاله سنتين ساعتها .. وبالفعل خدنا تدريب على طريقة الشرح وكيفية عمل تحليل لنسبة الاملاح باستخدام جهاز ال TDS وكمان الطريقة بتاعة الفصل الايونى لمركبات المياة واللى بيعملها الفنى قدامك باستخدام عينة مياة من الفلتر وعينة اخرى من مياة الحنفية واللى طبعا بتكون نتيجة المشاهدة ليها بتخللى العميل ياخد قرار وقتى بانه يشترى الفلتر لانه بيشوف فى عينة المياة اللى من الحنفية بيلاقى حاجات خضراء زى الطحالب اللى بتكون موجودة فى المياة الراكدة وكمان حاجات لونها بنى زى لون الصدأ اللى فى المواسير ..
وبالفعل اشتغلنا فيها فترة الحمد لله مش كبيرة يعنى تقريبا شهر وركبنا لعدد مش كبير والحمد لله.. ولكنه كان عندنا متابعات على بيعات كتيرة جدا احنا اصلا ناس محترفة فى التسويق ..ولكنه من ستر ربنا علينا وعشان منشيلش ذنب حد .. اكتشفت الحقيقة بتاعة الموضوع بسرعة من خلال حديث ودى مع صديقى اللى كان عرفنى بالمنتجات دى وكانت المفاجأة الغير سارة ....
الحقيقة انه اكتشفت اولا انه طريقة العرض لميزات الفلتر بها نوع من انواع الغش وهو ما يسمى بالتحليل الايونى اللى شرحته بالاعلى وذلك لانه اكتشفت انه الالوان الخضراء والبنى اللى هى المفروض بيتم تعريف العميل بيها على انها طحالب وصدأ دى هى الالوان الطبيعية للاملاح الموجودة فى المياة ولكن بعد تأينها باستخدام جهاز البريستيتور على ما اتذكر اسمه - الموضوع قديم - وده معناه انها مش حاجة وحشة فى المياة ولا حاجة.. والاهم من ذلك وهو فعلا الشىء اللى انا عملت المشاركة دى عشان احذر الناس منه وهو انه السر فى عدم ظهور تلك الاشياء فى عينة المياة المأخوذة من الفلتر هو انه انظمة الفلاتر اللى بتعمل على اساس ضخ المياة بموتور الفلتر من خلال المسام الضيقة جدا بالممبرين العملية دى بتتسبب فى نزع الاملاح سواء الضارة او المفيدة واللى بيحتاجها الجسم فعلا عشان ما يحصلش هشهشة عظام للانسان بمعنى انه بيضر ضرر اكثر من الفائدة اللى بيعملها وعليه بصراحة انا وقفت نشاطى فى هذا المجال من ساعتها ...
ولو الناس فعلا عايزة تستخدم فلاتر واعوذ بالله من كلمة انا ... انصح بانه يمكن الاعتماد على الفلاتر ولكن التى لا تحتوى على الميمبرين وفى نظرى فلتر فيه 3 مراحل لتنقية الشوائب بالاضافة الى وحدة المعالجة واللى بتسمى بالالترا فيلوت او U V عشان على حد علمى هى بتنقى الشوائب وتعمل على قتل البكتريا او الفيروثات لو لا قدر الله كان فى حاجة زى كدة ( دى كانت نصيحة صديقى لى انا شخصيا )....
والله اعلم بس هى دى تجربتى مع الموضوع وعن نفسى رميت الفلتر اللى كنت ركبته عندى ساعتها وبشرب مياة عادية من الحنفية وبدون اى فلتر
النصيحة لوجه الله ... ومتشكر جدا لوقتكم