رد: نفسي اعمل مشروع ومش عارف ابدا منين
اولا خد بكلام ابو نورا العلّامة فى المجال ده ....
وطالما حضرتك عندك استعداد للبداية بكل تعبها وخسايرها يبقى ندخل على تنى نقطة (الاختيار)
نحط شوية اسئلة مع بعض ونحاول نجاوب عنها
طالما كده كده مش عارفين اى حاجه معينة (تجارة-صيانة-..... الخ) يبقى اللى هايحكمنا نمرة 1 هو رأس المال يعنى شوف امكنياتك ايه وفكر فى حد 3/4 المبلغ اللى معاك بحد اقصى 80% يعنى لو معاك مثلا 100 الف اعمل حسابك المشروع ما يعديش 80 الف تمام؟؟؟
كل ما كبر رأس المال كل ما الاختيارت بتبقى اسهل وخصوصا المكان وده اساس اى مشروع او فكرة مشروع المكان اللى بتفتح فيه لو عندك فى العبور اعمل دراسة للمكان شوف ناقصة ايه ؟؟؟
خدمات : غسيل- كاوتش- ترصيص
صيانة:ميكانيكا-كهرباء - تكييف-عفشة- ......الخ
تجارة: قطع غيار - اكسسوار وكماليات .....
لغاية كده بقى عندنا 3 محاور نفكر فيهم على حسب اولا: رأس المال ثانيا: متطلبات المكان
لان طبعا كل مكان وله احتياجاته كويس
من ناحية الخدمات اساسى فيها مستوى الخدمة اللى بتقدمها يعنى الغسيل مثلا يكون من الاخر وباسعار معقولة ومنافسة ومعامله حلوه وبعض الحركات (هدايا وكلام فارغ كده زى العروض)
من ناحية الصيانة: تعتمد فى المقام الاول على مهارة الصنايعى ثم ضميرة ثم اجرته
من ناحية التجارة اهم شىء المصدر اللى بتشترى منه (تاجر جمله-مستورد-مصنع) وكل ما كان السعر اللى بتشترى بيه اقل كل ما كان المكسب اكبر وماتنساش عامل الجوده حاول توفره على قد ماتقدر حتى لو هاتتخص فى الحاجات النضيفة بس شغل مضمون يعنى
كويس لغاية كده ؟؟؟؟؟؟
انا عندى اقتراح او رأى وعن نفسى كنت بتمنى اعمله وحاول برضه تشوف دراسات جدوى عن كل حاجه معروضه عليك عشان تلم الامور وتقربها من تفكيرك
المغسله(محطة خدمة سيارات) تغيير زيت- غسيل-كاوتش
طبعا ده يعتبر من اكتر الحاجات اللى بتعتمد على المكان كمساحة ومش شرط يكون فى مكان معروف لان العميل هايجيلك على الصيت مش عشان فاتح فى شارع عمومى
المعدات مش بتتكلف قوى والخامات اللى بتشتغل بيها برضه مش غالية
اولويات المشروع ده هى مساحة المكان وكل ما كان كبير كل ما كان افضل تنى اولوية بقى هى الادارة عشان العمال والصنايعية ما يضايقوش حد من الزباين وده من ضمن الحركات الى نبهك ليها ابو نورا (والادارة الحازمة الحليمة مطلوبة فى كل شىء) بعد كده بقى تيجى الافكار والعروض واداء افضل خدمة بأقل سعر ولعلمك هاتتعب قوى فى الموضوع ده بالذات فى البداية عشان تعمل زبون ييجى المكان عشان الخدمة المتميزة اللى فيه والخدمة المتميزة=مجهود اكبر لكن فى النهاية العائد اكبر بكتير ان شاء الله
لغاية كده نقف ونفكر شويتين تلاتة عشرة ونستأنف قريبا ان شاء الله
__________________
صلى على رسول الله
---------------------
|