http://www.masrmotors.com/vb/showthread.php?t=24012
الرابط اللي فوق كان موضوع "ساخن جدا" بين عشاق الشاهين وبين كارهيها
طبعا انا حسيت (ومش انا بس اللي حسيت كده) ان الموضوع قلب لخناقة
وطبعا الردود ع الموضوع ده كانت "على قفه مين يشيل" وانا لو حبيت اعلق محدش هيشوف تعليقي
انا هقول رايي بمنتهى الحيادية (مع اني اكتر واحد بيكره الشاهين في مصر معرفش ليه)
اولا : المميزات
1 عربية عملية جدا وقوية وتستحمل طرق مصر المنيلة بستين نيلة
2 عالية عن الارض ودا بيخليها تعدي اي مطب بسهولة
3 قطع غيارها ممكن تلاقيها في كل حتة في مصر
4 الميكانيكية بيفهموا في العربية اكتر ما بيفهموا في الميكانيكا نفسها ههههه
5 اعطال العربية سهلة الاصلاح وغير معقدة
6 الصاج الخارجي قوي جدا ويتحمل الصدمات
7 الطارة بتاعت الشاهين حلوة اوووووييييي وشكلها جميل
8 الطابلوة شكله حلو اوي وخاماته معقولة جدا
9 في ناس بتركب بنزين 80 على العربية وبيقولوا العربية حلوة ومفيهاش اي مشاكل (بس انا مبنصحش الناس انها تحط بنزين 80 لانه زي المخدرات ضرره بيظهر بعد فترة وممكن العربية تتدمنه هههههههه)
10 اماكن الزراير عملية جدا وقريبة السواق ودي بتريحه جدا في السواقة
ثانيا : العيوب
1 صوت الماتور عالي حبتين بس في ناس بتعتبر صوت الماتور صوت رياضي وحلو وكل واحد ينام على الجنب اللي يرحو
2 العربية ضيقة من جوه بس حل الحكاية دي انك تركب فرش جديد ويكون كوري او ياباني ودا هيحل المشكلة بنسبة 95%
3 الشنطة ضيقة شوية على الرغم ان الحجم الخارجي للعربية بيخليك تعتقد ان الشنطة كبيرة
4 الكاسيت بتاع العربية زي الزفت بس حل الحكاية دي انك تركب كاسيت جديد والحكاية دي نفعت مع كل ركاب الشاهين
5 الاكصدامات بتاعت العربية بلاستيك ودا بيخليها تتكسر لابسط صدمة (لكن في نفس الوقت الاكصدام سعره رخيص يعني اللى معاه شاهين يكسر في الاكصدام براحته هههههه )
6 بطانة الابواب وحشة جدا جدا جدا
7 العدادات مش واضحة بس حل الحكاية دي انك تركب لمبة اقوى من اللمبة بتاعت العدادات وساعتها الاضاءة هتبقا حلوة قوي
8 العربية بتسخن بسرعة بس حل الحكاية دي انك تركب مروحة اكبر للتبريد
9 العربية مش ثابتة على السرعات فوق المتوسطة 80 لفوق وبتميل من ابسط مناورة ليك
كده انا انتهيت من كتابة الموضوع دا
اتمنى اني اكون افتدكم
بس بمنتهى الصراحة
الشاهين عربية مناسبة للي بيدور على عربية عملية وتستحمل معاه
وغير مناسبة للي عايز عربية فيها كماليات ورفاهيات والذي منه
وتقبلوا تحياتي
