المشاركة الأصلية كتبت بواسطة SAbuhashem
شرح مبسط ورانج الاسعار
التيربو كيت بيكون سعرها من ٥٠٠٠ ال-٧٠٠٠ على حسب ماركات اجزائها
وبصراحة د مينفعش معاها شرح مبسط لكن هي بتتكون من التربينة مع الواست جات ، بلو أف فالف وإنتر كولر ومواسير التوصيل استانلس كمكونات أساسية .
الفلتر الرياضي مع التيربو يفضل HKS ستايل أو زي ما بيسموها شكل المشروم غير كدة التاني أفضل وهو الشكل المخروطي ولازم معاه الكولد أير كيت وهي ماسوره ستاينلس لتوصيله بالمانيفولد وأنبوبة تانية عازلة علشان تجيب هوا بارد من برة الحوض ودة بحوالي ٢٠٠ جنيه نوع سيموتا و-١٥٠ جنيه للماسورة الستاينلس و-٢٥٠ للبايب الخارجية
الهيدر ويفضل 4 X ١ يعني ٤ مواسير خارجين من الموتور متجمعين مباشرةً في ماسوره واحده على الشكمان ودة بييجي مع التيربو كيت
الشكمان الكامل على حسب النوع في أنواع تايواني صناعتها جيدة بتبدأ من ١٠٠٠ جنيه بدون العلبة الاخيرة ( المفلر )
ال-MSD هو جهاز بيقوي الشرارة الكهربائية إلي داخلة للموتور وسعره حوالي ١٣٠٠ جنيه
منظم البنزين صمام ضغط عليه عداد بيتحكم في كمية البنزين الداخله للموتور سعره حوالي ٢٥٠ جنيه
الفلاي ويل ( الحدافه ) إذا كان دة الاسم الشائع وسعرها في الانسر بيبدأ من حوالي ٢٠٠٠ جنيه على حسب النوع والوزن وبتفرق فرق رهيب
الكلاتش الرياضي ودة بردو مينفعش نمر عليه بسرعة لكن كفاية نعرف إن أشهر الاصناف هو Exeedy ودة في الانسر إسطوانة ودسك بيبدأ من ٣٠٠٠ جنيه وكمان بيفرق عن العادي فرق كبير جداً
ال-ECU أشهر الانواع Appexi و-Greedy E-Manegment سعر الاول حوالي ٢٧٠٠ جنيه والتاني حوالي ٣٠٠٠ جنيه ودة يونيفرسال لأي عربية
أجزاء الكربون اسعارها غالية لكن بيكون لها تأثير واضح في تسارع أي عربية إرتباطاً بمعادلة الوزن للقوة المعروفة
كمثال كبوت الانسر الكربون فايبر ب-٢٥٠٠ جنيه .
كل عربية لها الاجزاء الخاصة بها وأشهر عربية بتتعدل في مصر هي الانسر ونقدر نقول أسهلها يليها الهوندا سيفيك لكن أي عربية ممكن تتعدل ويجيلها حاجتها بس بتاخد وقت
عموماً في مشروع تاني بيتعمل وهيشوف النور عن قريب وهو عربية ١٦٠٠ cc هنوصلها ال-٣٥٠ حصان إن شاء الله وربنا يبارك لصاحبها فيها
Thanks
Eng.Sherif Shaker
|
لو سمحت يا بشمهندس انا عربية والدى 132 2000 بس انا ركبت موتور 1600
و مش مستريح لية خالص ممكن تفيدنى ازاى ازود قوة العربية مع عدم الاضرار بها ان امكن
لان ادائها وحش اوى وبصراحة انا عايز اجمع بين قوة الموتور والبودى اما الكماليات فدى امرها سهل
ويا ريت لو فى خطة لتعديل ال132 تبقى حضرتك خدمتنى
وشكرا