[sherifabden]

بسم الله الرحمن الرحيم
النهاردة هتكلم عن ذكرياتي في الجماهيرية العربية الليبية الشعبية الاشتراكية العظمى
اه والله اسمها دا
اسم طوييل عريض
رحنا هناك سنة 2005
ورجعنا 15 / 3 / 2011
يعني ست سنين
وعلى فكرة هتكلم بطريقة مختصرة ومنجزة
نبدا على بركة الله
بسم الله الرحمن الرحيم
بدات القصة ان والدي (استاذ جامعي) طلع اعارة لليبيا سنة 2004 وراح اول سنة لوحدة وقعد تقريبا سنة
رجع بعد السنة دي
وقعد شهرين
بعد كده قرر انه ياخدنا معاه لليبيا علشان منقعدش لوحدنا في مصر (اصل انا كنت صغير )
وطبعا بما اني كنت صغير فانا مكنتش اعرف اي حاجة عن ليبيا
مكنتش اعرف ايه ليبيا اصلا
سافرنا من سوهاج للاسكندرية بقطار
ووصلنا للاسكندرية وركبنا اوتوبيس ودانا لحد بنغازي
وتقريبا اخدنا يوم كامل في سفرية الاوتوبيس دي
اول لما وصلنا بنغازي ركبنا طيارة وكانت اول مرة في حياتي ركبت فيها طيارة
ورحنا لحتة في الجنوب الشرقي اسمها الكفرة لو حد يعرفها
وصلنا للبيت والبيوت في ليبيا عبارة عن فيلات بس حجمها صغير وبتتكون من دورين وكل دور عبارة عن شقة كبيرة 250 متر ولكل بيت باب مستقل وقدام كل باب فيه جنينة 20 متر تقريبا
وبيسموها في ليبيا الاحواش
وكنا بنسافر مصر كل سنة وبنقعد شهر فيها
وكان نظام السفر كالاتي
1/ والدي يباخد اجازة من الجامعة هناك (على فكرة اسمها جامعة قاريونس ) لمدة شهر
2/ بناخد طيارة من الكفرة لبنغازي
3/ نقعد في فندق في بنغازي لمدة يومين تلاتة على حسب موعد الطيارة
4/ بناخد طيارة من بنغازي للقاهرة
5/ لما نوصل القاهرة بنعمل حاجتين
يا اما بناخد تاكسي بيجو يوصلنا لسوهاج وبياخد 500 جنيه
يا اما بنسافر بقطر
6/ بنقعد في مصر شهر واحد
بعد كده بيتكرر السيناريو تاني
والحكاية دي بتحصل كل سنة
......................... ........
قبل ما اتكلم على رجوعي لمصر اثناء الثورة الليبية
احب اقول كام حاجة عن عيشة الليبين
والكلام دا كله والله صح
1/ اي واحد في لبيبا معاه مش اقل من عربيتين
2/ لو الواحد عربيته اتخدشت خدشة بسيطة يرميها ويجيب واحدة زيرو
3/ اقل بنزين موجود في ليبيا 93 واعلى واحد 99
4/ اسعار الحاجات في ليبيا رخيصة جدا وبالذات العربيات لدرجة اننا في ليبيا كنا بنصرف كتيير والله من غير ما الفلوس تتاثر
5/ العربيات الصيني غير موجودة ابدا في ليبيا
6/ الطرق في ليبيا نظيفة جدا ومفيهاش مطب واحد
طبعا الكلام دا كله غير موجود في مصر
اخر جزئية هتكلم عليها عودتي الى مصر
اثناء ثورة 25 يناير كنا في ليبيا
وكنا متابعين اخبار الثورة اول باول
وبعد ما تنحي حسني حمارك
بدات الثورة الليبية
في الاول افتكرنا الموضوع هيخلص على خير
لكن لما بدات الحرب والضرب والكلام دا كله
قررنا اننا نرجع لمصر
طبعا ساعتها كانت الطرق اللي بين الكفرة اللي احنا فيها وبنغازي مليانة ضرب ومقطوعة وحاجة منيلة بستين نيلة
فقررنا ناجل موضوع العودة دا
وعلى فكرة المنطقة اللي احنا فيها منطقة هادية جدا وكانت بعيدة عن الصراعات والحروب دي
بس برضه الحكاية راحة نفسية لاننا مكناش مرتاحين نفسيا خالص
وجاء يوم العودة
كنت قاعد انا والاسرة لقيت واحد بيتصل بوالدي رد عليه
طلع استاذ جامعة من اللي كانوا معانا
لقيت ابويا مرتبك ومتوتر
بعد ما المكالمة خلصت
قالي جهزوا كل حاجة هنرجع مصر النهاردة
انا اتفاجات
المهم بدانا نجهز في الشنط والحاجات وكنا متلخبطين خالص جداااااا
المهم خلصنا توضيب كل حاجة
واتكلنا على الله
العربية جت (كان نوعاه هيونداي h1 )
حملنا الشنط
اتكلنا على الله
وكانت الساعة 3 العصر
لما طلع علينا الليل بدات انا اخاف ليطلع علينا حد من بتوع القذافي دول
وصلنا لكمين تابع للثوار
وقفوا العربية
اول لما عرفوا اننا مصريين
فتحوا السكة وخلونا نعدي والحكاية دي استمرت في كل الكماين
وبصراحة كانت اخلاقهم كويسة في التعامل معانا
لحد ما وصلنا لمعبر السلوم
والرحلة دي اخدت 17 ساعة
لما وصلنا لمعبر السلوم وخلصنا الاجرائات
دورنا على عربية تودينا حتى للقاهرة
لقينا اوتوبيس كبير رايح للاسكندرية عايز 300 جنيه
ولقينا مكروباص رايح اصلا لسوهاج وهياخد الف جنيه
والدي قرر انه ياخد المكروباص اريح ليه
وفعلا المكروباص ودانا من السلوم لحد باب البيت
ورجعت بيتي تاني
بعد رحلة عودة استغرقت اكتر من 24 ساعة
وحسيت اد ايه مصر كانت وحشاني
والغربة فعلا كانت وحشة
لكن بصراحة انا كنت مبسوط جدا هناك
لكن بقيت مبسوط اكتر وانا بدخل بيتي
طبعا القصة مختصرة ومفيهاش تفاصيل كتير
لكن انا عارف اد ايه المواضيع الطويلة بتبقا مملة للاعضاء
وتقبلوا تحياتي
اعضاء مصر موتورز الاعزاء