[د/أحمد عصام]

اخيرا وبعد بحث لمدة سنة ونص واقتراحات وافتكسات من الكهربائيه والفنين الحل النهائي لمشكلة كانت في عربيتي وفي اكتر من مالك للسيراتو اشتكى منها المشكلة كانت
نور العربية بيرعش لما اقف بالعربية ولما بدوس على الرعاش بتاع العالي بتروح الرعشة لفترة قصيرة وترجع تاني وبلاقي نور التابلوة بيرعش معاها ولما بدوس بنزين بتروح الرعشة ايضا واول ما اقف ترجع تاني يعني الرعشة دي مبتظهرش الا وانا واقف ومش في كل الاوقات بس غالبا وانا واقف موجودة وخصوصا لو مشغل التكييف وكمان الكاسيت كان بيفصل مع الفرامل او تقليب النور العالي

طبعا في كهربائية قالو الدينامو وتانين قالو البطارية وفي ناس قالو الاتنين وناس قالو الارضي وعملت كل حاجة لحد مايئست وقولت ان دي مشكلة مش هتتحل وتعايشت معاها لحد ما في يوم قررت اطلع الحل وقعدت انا وعربيتي استفردت بيها وبدأت افكر وجبت دينامو وبطارية من عربية شغالة وركبتهم واكتشفت ان المشكله هي هي يعني لا دينامو ولا بطارية وبصرف النظر عن طريقة التفكير وصلت للحل واللي كنت فرحان جدا اني عرفتة بس مش على قد غيظي انه هايف اوي كدة

المهم الحل ان فيشة الضفيرة بتاعة الكهربا اللي موجوده في علبة الفيوزات مش راكبة كويس او فيها مشكلة لما دوست على الفيشة اختفت الرعشة نهائيا وصوت العربيه اتغير وبقى افضل وسحبها فرق جامد حتى انوار العربية الداخلية زادت بشكل ملحوظ جدا وكمان صوت الكلاكس والكاسيت معدش بيفصل نهائيا اثناء القياده اذن المشكلة في هذة الفيشة هي راكبة كويس بس لما ادوس عليها بتختفي وفكيت علبة الفيوزات ونضفت الفيشة وركبتها التاني اختفت الرعشة بس بترجع على فترات متباعدة وطبعا اكيد لازم تتغير او يبقى في اصلاح ليها بس اهم حاجة اننا عرفنا المشكلة اتمنى لو حد عندة معلومة ممكن تفيد في طريقة تغير الفيشة او نلاقيها فين او اسعارها انا اختفت المشكلة نهائيا بقالي شهر رجعت مرة واحدة وعملت نفس الي عملتة واختفت تاني وشغالة تمام وبدأت اكتشف عربيتي من جديد

انا مبخلتش بالحل على الأعضاء وحبيت افيد المتضررين امثالي واتمنى من الخبراء المساعدة والاراء اذا امكن وشكرااااااااااااا