الله ينور عليك وتسلم ايدك اللى كتبت الكلام الجميل ده
وفعلا كلمة حسبى الله ونعم الوكيل هى عكس م الناس فاهماها (انها دعاء عليهم بانتقامم ربنا ) وانما هى استعانة بالله وشكوى اليه
وانا كتبتها وانا بضحك لانى عارف انه هيزعل منها لانه كان كاتب كلام عبارة عن نكتة من ماركة طبق طبقنا ضرب طبقكو يعنى مكانش فيه راى معين
وكنت ناوى ارد عليه واراضيه وافهمه انه ميزعلش لان دى شكوى الى الله واستعانة بالله على التريقة على كلامنا مش دعوة عليه لكنك سبقتنى
ثانيا اهم مافى اختيار السيارة او اى شىء مدى احتياجك ليه وكيفية استعمالك ثم اخيرا امكانياتك المادية هيا بقى اللى هيكون لها القول الفصل
فاذا كانت الامكانيات المادية تكفى الجميع ( ربنا يزيد ويبارك لكل الناس) يبقى تشوف احتياجاتك ايه
عندك اسرة مثلا عددها كبير ومشاويرك كتيره يبقى عربية كبيرة لكن اسرتك صغيرة ومشاويرك بسيطة يبقى عربية متوسطة مثلا وهكذا
منصبك محتاج عربية لها شكل معين او مظهر معين يبققى الوضع مختلف وهكذا
وانا شخصيا
(دى تجربتى الشخصية) كنت ناوى اجيب نص نقل لانها اللى تتحمل شغلى تصور بقى
ولكن وانا راكب الميكروباس وواقف فى كمين لقيت الظابط بيعامل سواق النص نقل معاملة سيئة فغيرت رايى لانى بسافر مصر كلها وبقابل كماين كتير وطبعاعايز عربية واسعة علشان بضاعتى وقوية تتحمل البهدلة وشيك الناس تعاملنى باحترام جااااااامد وانا فيها يعنى حاجة كده خليط من الملاكى على النص نقل وكان الاختيار لللانسر
لكن فوجئت انها مش طويلة ولاكان فى دماغى النيسان ولقيتها واقفة جنبها فى المعرض وركبتها وجربتها وعجبتنى والحمد لله
اى شىء من صنع البشر طبيعى جدا انه غير كامل وانا بشيل بضاعتى فى النيسان بكميات كبير ة ومشيت بيها فى طرق وعرة وصحراوية تقولش شيروكى وطبعا ده اثر على منظر العربية لانها بتسافر كتير وبتحمل بضاعة وبتتبهدل لكنها مستحملانى الشهادة لله ولاتطلب الا الزيت والبنزين او الغاز دلوقت لانى حولتها غاز لكن لها عيوب طبعا
مثل صوت الموتور العالى بعد سرعة 130 ده انا اقبله وغيرى لايقبله لان كل واحد له ظروفه الخاصة هو عايز عربية يقفلها ويعيش بعيد ومنعزل عن الناس لكن انا احب يكون فى تفاعل بينى وبين الناس بدون شتيمة يعنى واقف جنب اتوبيس مثلا والناس متشعبطة اقول لهم سلام عليكم فكله يرد فى نفس واحد وعليكم السلام ورحمة الله وناس تهرج معايا وناس تقول اتفضل لحد ما الاشارة تفتح وهكذا فانا صوت الموتور مش سامعه بسبب الشارع
بالاضافة الى عيوب التقفيل المصرى وده راجغ لطبيعة الموظف المصرى
يعنى ممكن واحد زيى ياخد عربية كوبيسة جدا ثم يكتشف ان التكييف مش تلاجة بسبب انه محتاج شحن ( شحنه ناقص وانا شخصيا لانى من اعداء التكييف فمعرفتش دى الا بعد العربية م عملت حوالى 50 الف كيلو (عربيتى موديل 2008)
ووديتها للاسطى حسن خلاها فل
واحد تانى يلاقى الكاوتش بتاع الابواب مش راكب كويس وتالت يلاقى حاجة تالته وهكذا
لكن الاساسيات ممتازة واانا شخصيا كنت فاكر فرامل النيسان (a b s )وفوجئت انها عادية رغم انى بسوق سرعات عاليه جدا تصل الى 170 غالبا ومع ذلك كانت تكلبش العربية كانها a b s
الاكتشاف اللذيذ بقى انى كل ماشترى قطعة غيار يقول لى الراجل اتفضل الاقى مكتوب عليها لانسر اقول له عايز صنى يقول هيا هيا والكلام ده حصل بنسبة 40% وهي نسبة ممتازة ماعدا الاساسيات
واذكر احد اخواننا هنا فوجئت بيه بيقول الالنترا شياكة ووجاهة بس عيبها الفرامل بتاعتها ضعيفة واستعجبت جدا لان الفرامل دى مش كماليات دى اساسيات ده انا ممكن اصبر على اى خدش فى العربية لكن لو حسيت ان الفرامل قلت شوية اجرى اعمل ريجلاش او صفرت او لما افرمل تتزحلق وتجرى ادام شوية اجرى انضفها واصنفرها ومركبش العربية اللا وانا متطمن رغم انى اكتشفت ان 90% من الشعب المصرى فرامله بتصفر وبتزحف وفاهمين ان الصفارة دى عادى لان الفرملة قوية وكده
اخيرا اتفق معاك انها مسالة اذواق وظروف كل واحد مختلفة وبناء عليه كل واحد بيجيب غير التانى
اشكرك وارجو من الاخ ديفيل انه يتقبل كلامى
لانى على فكرة مبعرفش اشتم حد او اتريق على حد ومش عارف ده عيب واللا ميزة