المشاركة الأصلية كتبت بواسطة ahmedelbannan
احب اشكر المنتدى و كل اعضائه على المساعده الكبيره فى اختيارى الى انا باعتبره موفق للهيونداى. ده اول مشاركه ليا فاعزرونى لو افكارى مش مرتبه.
انا اشتريت العربيه شهر 3 الى فات من اوتو سمير ريان "خليجى" ب 133 الف الكماليات الأساسيه (اوتوماتيك 6 نقلات + ستيبترونيك + 4 زجاج كهرباء + 1 زجاج اوتوماتيك للسائق - كاست (CD MP3+ AUX+ USB) الكماليات الأضافيه (كاست بلو توث - جنوط 16 - فتحه سقف - طاره و مقبض فتيس جلد + اضافات نيكل فى الشبكه الأماميه و مقبض الفتيس + غطاء للحت الى تحت التكييف ده ملقتهاش فى الوكيل)
دفعت 1100 جنيه تأمين 3 سنين ضد عيوب الصناعه من عند شركه AAA
سافرت بالعربيه اول مجبتها شرم الشيخ و رجعت من ساعتها باسوقها فى القاهره
و كانت ديه ملاحظاتى الايجابيه الأول
* العربيه واسعه جدا و عريضه انا 180 سم و 110 كج و من النوع الى بحب ارجع الكرسى, الى كان قاعد فى الكنبه الخلفه واحد صحبى و كان مستريح و هو حوالى 170 سم .
* الشنطه الخلفيه واسعه و مسطحه و ديه ميزه لما تحب تحط امتر من شنطه.
* بالنسبه للعربيات الموجود فى السوق اعتقد (الموضوع ده اذواق) ان تصميم العربيه الخارجى جديد جدا و متقدم و هيفضل شويه لحد ميقدم.
* بالنسبه للتابلوه شكله جديد و جميل و بصراحه انا شايف ان شضافه الكاست ال DVD الى موجود فى شارع دمشق ب 3000 جنيه بيخلى التابلوه اكنه فى عربيه اعلى و اغلى كتير
* الجنط ال 16 بيجمع بين الشكل و العمليه العفشه كويسه انشف من الانترا القديمه بس اثبت منها على الطريق. الجنط ال 15 اعتقد انه هينعم العربيه فى المطبات و ال 17 هيخلى شكل العربيه احلى.
* الباور انعم من كل العربيات الى سقتها (انا سقت عدد مش بطال) بس ده فى عيب هقوله تحت.
*العربيه كويسه فى استهلاكها للبنزين انا بعمل حوالى 9 لتر فى ال 100 كم لما اكون ماشى بأدب.
*العربيه جبت بيها 200 بس مكنتش مستريح و على السرعه ديه العربيه خفيفه جدا السرعه الى حسيت انها مناسبه للعربيه 150-160 لازم مننساش ان ديه عربيه كورى.
*فى صيانه الألف رحت الأقصى مركز نضيف و الناس محترمه.
السلبيات
* الجير بوكس ال 6 نقلات موفر للبنزين بس بصراحه ميت جدا التسارع مش كويس و الكيك دون بيعلى صوت الموتور جدا لو عايز تجرى لازم تقلب ستيبترونيك.
* الباور الكهربائى خفيف جدا لدرجه اوفر و مش بيتقل مع السرعه العاليه و مش بيخليك متفاعل مع الطريق و الغرز بتبقى مقلقه عشان الباور حساس جدا.
* العربيه الى معايا مش ABS و الفرامل الى ورا تيل مش دسك مش مبسوط من ثبات العربيه مه الفرامل الجامده.
عموما
* انا مبسوط من العربيه و قادر اتعايش مع عيوبها مريحه و هاديه تاخدك من نقطه لنقطه بشياكه و راحه.
* ديه مش عربيه المانى متتوقعش منها اداء عالى بعد ال 140 من ناحيه الثبات العربيه مخففين وزنها عشان توفر فى البنزين و خلو الباور كهربا مش طرمبه زيت عشان طرمبه الزيت برده بنحمل على الموتور فبتستهلك بنزين.
العربيه ديه اخدت جوايز بالهبل لدرجه ان مسئولين من فولكس انبهروا من روعه و جوده تصميم خامات الصالون و طلبه من مصممين الجولف يتعلموا منها.
عربيات سابقه و حاليه
1995 هيونداى اكسل 1500 GLS
1999 سيات ابيزا 1000 CC تعديل موتور و عفشه 1600 CC
2000 دايو ليجنزا 2000 CC
1998 BMW 1600 CC كوبيه تعديل موتور و عفشه 2800 CC
2004 كيا سيكترا 1600
2010 كيا كارنز 1600 وكيل
2012 هيونداى الانترا 1600 خليجى
اى سؤال او استفسار انا تحت امر اعضاء المنتدى
|
مشكور و ملحظاتك مفيده جدا جدا
بس عايز اعرف هي سعر الخليجي منها كام دلوقتي و ايه فئات الخليجي
و بيختلف عن المصري في ايه ؟؟
و شكرا