[I.ABUBAKR]

السلام عليكم ورحمه الله
في البدايه احب اقول ان الموضع ده( تجديد الرخصه بالتليفون )
شغال فعلا وجددت الرخصه من خلاله مرتين
والخدمه مجانا بدون اي مصاريف زياده
اول مره من حوالي سنه لما قريت الخبر علي الفيس بوك انه قامت وحده مرور ابيس بادخال خدمه تجديد الرخصه اليكترونيا من خلال اتصال العميل بالوحده المختصه بالمرور علي الرقم 4260222
وكانت رخصه عربيتي علي وشك الانتهاء
فتصلت بالرقم المذكور وانا اكاد اكون متاكد من ان الرد هيكون محبط وان مفيش الكلام ده
ولكن الحقيق اني ذهلت لما لقيت موظفه ردت علي التليفون وبكل ادب وذوق قلتلي ايوه الخدمه موجوده لو تحب تجدد الرخصه ممكن تديني بياناتك
الخدمه وقتها كانت للتجديد بدون فحص او حظر
وحتي لا اطيل هكتب الخطوات في نقاط سريعه
1- الاتصال بالوحده المختصه ت 4260222
2- هتطلب الموظفه منك الاسم ورقم السياره وهتراجع معاك بعض البيانات
3- هتطلب منك تتصل تاني يوم علشان يكونو عملو شهاده المخالفات وتعرف عليك مخلافات ولا لا
4- هتتصل تاني يوم وان شاء الله ميكونش في مخالفات
5- هتحدد معاك يوم علشان تروح تخلص الرخصه غالبا هيكون اليوم التالي لاتصالك
6- هتروح في ميعادك علي المرور وتدخل وحده التجديد الاليكتروني وهنا هتتصدم لانك هتحس انك مش في وحده مرور ايه ده نظافه ،موظفين ذوق ، ومحترمين ،وتكييف ، وكمان في استراحه وكراسي جلد اه احمدك يا رب .
7- حضرتك هتقابل الموظف المختص هيسالك هتجدد كام سنه ويحسب المطلوب كله وسيادتك هتدفع وانت قاعد باشا هينده علي موظف تاني ياخد الفلوس يدفع الضريبه والتامين الاجباري ويرجعلك ياخد ملفك وطيران يروح يطبع الرخصه
8- مبروك الرخصه خلصت في 15 دقيقه بدون ادني مجهود
المره الثانيه من يومين
عندي تجديد والمر ه دي عندي فحص قولت وماله اتصل اسال
اتصلت ردت علي الموظفه لو سمحتي عايز اجدد الرخصه يا تري الخدمه لسه شغاله
وكان الرد اني الخدمه شغاله ، طيب انا عندي فحص وكان الرد مفيش مشكله حضرتك افحص بس وهات ورق الفحص واحنا نكمل الباقي
وبالفعل جددت الرخصه بنفس الطريقه هيزيد فقط خطوه الفحص هتعملها بنفسك
والحمد لله الفحص خلص في 10 دقائق
ورغم اني فيه بعض السلبيات شوفتها الا ان الموضوع في المجمل كويس واسهل من الاول بكتير