[حسام البورسعيدى]

السلام عليكم ورحمة الله وبركاته

اكيد كتير مننا بيلاحظ عند تزويد الميه بالريداتير او القربة وجود صدأ فى الميه وده طبعا ممكن يسبب سخونة للموتور ومشاكل كتير ..

وكتير مننا بيروح لمتخصص ريداتير علشان يغسل دورة الميه وياخد منه 15 او 20 جنيه .. مع ان ممكن يعملها بنفسه ..


طبعا علشان تغسل دورة الميه هتحتاج خرطوم ميه وبنسة و مفك ..

1- اول حاجة هنفك خرطوم الراجع من الموتور (الخرطوم اللى بترجع فيه الميه من الموتور للريداتير تانى .. وده اللى بيكون واصل فى الريداتير من فوق) وهنفكه بفك الكلبس او الافيز اللى مربوط بيه (ممكن نفكه من ناحية الموتور او من ناحية الريداتير الاتنين واحد)

2- وبعدين هتفتح غطا الريداتير وتدور العربية وتفتح المية على اخرها (خرطوم الميه) وتحط الخرطوم فى فتحة الريداتير وتبدأ تزود بنزين جامد (على RPM 4 او 5) باستمرار لمده دقيقتين او تلاته ..

هتلاحظ فى الاول ان الميه الخارجة من الموتور مليانه صدأ وبعدين تبدا تنضف ..

3-وبعدين شيل خرطوم الميه من الريداتير واستنى لما كل الميه تخرج من الموتور ..

4- وبعدين تبطل العربية بسرعة وتركب خرطوم الريداتير مكانه تانى ..

5- وبعدين هتدور العربية وبسرعة تبدأ تحط ميه فى الريداتير ويستحسن تحط ميه خضرا او حمرا ..

وبعد الريداتير ما يتملا اقفل الغطا وافتح القربة وزود فيها ميه لغاية علامة MAX ..



وكده تبقى انت غسلت دورة الميه وغيرت الميه بنفسك من غير صنايعية ووجع قلب ...


يا رب الموضوع يعجبكم وتستفيدوا منه ...